1 Sei ma Iesu Keriso, kaere bi vegu amena vene ma muyena vene kota rego, na yaku ini nemokori ma ini ogau nigo ma ini ourefeidena amena sana dudu, bi nai ni yeiva resi nida ago bi yomini: 2 ago buni nirausi re; ari buni ma ari nori ya kaya dogo re; toro ma nioteimana tau noibanu dudu, vegu no rofu nierau resi nimatisi egira re. 3 Adina ini ari bae okigori, amiye yaku oteimana ago buni udiko regedi, idu iniye ini roaita di ura dada, neidena maka regi, mina rofu bi oteimana vene moi egogo regedi. 4 Resi ina vene bi ago rama rofu ini anema moi etae risi sisina di sina tavoi tavoi neidebigedi. 5 Idu ya kaya gokai beikari ma toe baegori, ini esika esika fadimagasa ago buni niogau rena amiye di moimai resi yi naivo naivo tau Sei rofu, bi rei mona re.

6 Adina na bi sena waini koru aira kana rausi reyadi ma nai digida di ari bi bae okiyo. 7 Na bi ruda buni ruda reyaka moi koina resi toga mokena vari gira aegamaka. 8 Sena mokena rorobo di obini na rofu ae torekai reyo, goina bi Varika amiye, mokena rorobo nufa kota redo amiye, yaku mirona medari na mago—na maka de, idu kaere kaere yaku uka mana dudu, ini ogau nigo meda tua regamadi ka obini moigedi.

9 Na rofu evade ida maina resi baegiya bi buni. 10 Adina Demas bi mina kono di vegu uka masi na ferei disi Thessalonica ri boyo. Ma Crescens bi Galatia ri diyo ma Titus bi Dalmatia ri diyo.✡2 Cor 8.23; Gal 2.3; Col 4.14; Tit 1.4; Phlm 24 11 Luke maka bi nasa. Mark afesi yasa bogedi, adina na rofu naivo naivo renari ina bi buni iniye.✡Acts 12.12, 25; 13.13; 15.37–39; Col 4.10, 14; Phlm 24 12 Na yaku Tychicus bi Ephesus ri nifeideyaka.✡Acts 20.4; Eph 6.21–22; Col 4.7–8 13 Ya baegiyari, nai ituri bou rina varuka doba Troas ri Carpus sa fereyaka, mina ma nai buka moi bae; na ura reida bi mina vibani rori bura reyadi mina ka moi bae.✡Acts 20.6

14 Alexander fore kopa moimai redo amiye yaku vegu no tau gade na rofu reyo; Varika amiye yaku ini beika reyo di obini dairi mago.✡Ps 62.12; Rom 2.6 15 Ya ka ina rofu vei mona re, adina uni oteimana ago rofu una tourage rei mona reyo.

16 Ouresi nai vegu nigira regi na kota reyori, amiye yokoi yaku na aedegi de okiyo, idu amiye tau noibanu bi na feresi diyadi. Ina rofu bi toe ga iki maraine! 17 Idu Varika amiye bi nai eta rofu are resi yeiva na maro, ye makai na dudu, ago bi ninegau rei mona rego ma tutubena idana vene tau noibanu neideyaganedi. Ma lion di venari na moi vegu riyo. 18 Varika amiye yaku vegu no tauri, na moi vegu risi ini ourefeidena amena sana omari na afei bogo. Ina rofu bi toga toga vabara niyaine! Rama.

19 Priscilla ma Aquila ma Onesiphorus di yava vene tau gade nai yuata sina nifeideida.✡Acts 18.2; 2 Tim 1.16–17 20 Erastus bi Corinth ri ameyo, ma Trophimus bi gauka reyo, ye Miletus ri fereyaka.✡Acts 19.22; 20.4; 21.29; Rom 16.23 21 Ye buni bi evade ava di ari okina koderi minari okigiya.

Eubulus yaku yuata ago ya nifeidedo ma Pudens, Linus, Claudia ma usika ourena tau noibanu ka yuata ago nifeidededi.

22 Varika amiye*Bura bedakai ka Iesu Keriso nufa. bi yi vimasa.

Sei di buni tora gade bi ya tau noibanusa.