3
Iesu yaku Moses ebu reyo
1 Mina dada, usika ourena kikifa, kaere Sei yaku unasa raka niyo, nifeidena amiye ma Sei ma amiye utari naivo amiye tora, kaere di roka bi Iesu Keriso, mokei mona refa. Uni mokena vari gira ina rofu aena niogau reyafa. 2 Iesu bi omaro amiye rofu vegu rama reyo, Moses ka Sei di yava vene tauri naivo regi vegu rama regamo kana.✡Num 12.7 3 Adina yava akudo amiye emagui rei tora redo, idu yava iniye bi de. Mina ida yokoi makari, Moses bi Iesu kana de, ina bi rama emagui rei tora redo. 4 Adina amiye yokoi yokoi yaku yava neinei akudedi—idu beika baika noibanu akuyo amiye bi Sei. 5 Kamini naivo reyo amiye kana, Sei di yava tauri Moses yaku moimai regi vegu rama reyo, ye makai gabi beika baika rofu ago nigedi, mina fafau niokugamo. 6 Idu Keriso bi mida kana, Sei di yava fafau ini moimai regi vegu rama redo. Ma ori de dudu, uni mokena buni ma uni uka mokena nivasena rena*Bura bedakai ka meda di metonari nufa. moi gira rigifa vonisi, ye una bi ini yava.
Sei di vene asa moigedi
7 Mina dada Vima kikifa niyo kana:✡Ps 95.7–11
“Ini goroka gua neidegedi vonisi,
8 Ebene reyo medari
gagani autu sanari,
ina vene yaku ruda reyadi kana yi uka meko moi gira ga ribifa.
9 Mironari yi aufakai na ebene reyadi,
mina mo lagani 40 ri gokai vegu na yaku reyaka bi veyadi.
10 Mina dada mina tutubena vene rofu gubuyo resi
niyaka, ‘Ina vene toga toga ini uka mekori kokofu resi
nai vegu ida diba de nidedi.’
11 Nai gubuyo resi yomakai nitore reyaka:
‘Nai asa moina sana bi dui de regedi!’ ”
12 Usika ourena, vei mona refo, uka no mokena vari gira de aena yi ideri amego baebu, ye ameibobigo Sei gutuna yarena rofu ya ourefeidego dada. 13 Idu ari neineiri ya kaya ya kaya egira rebifa, “Gua” vo nidedi ituari, ye vegu no di ofa ago yaku ya yokoi di uka moi gira ga riyaine dada. 14 Adina una yaku siko ori de dudu, mokena buni metonari moi gira rigifa vonisi, ye una bi Keriso sa moimai regifa.
15 Yomakai niyo kana:✡Ps 95.7–8
“Ini goroka gua neidegedi vonisi,
ruda reyadiri kana
yi uka meko moi gira ga ribifa.”
16 Adina ago neidesi ruda reyadi vene bi kaere? Rama bi†Bura bedakai ka bedakai nufa. kaere Moses yaku ina vene tau vakoi ourefeideyo ma Egypt gagani fereyadi.✡Num 14.1–35 17 Ye kaere rofu lagani 40 fuofuori gubuyo reyo? Mina bi amiye kaere vegu no resi gagani autu sanari keto resi muyeyadi. 18 Ma mina vene kaere rofu nitore reyo bi ini asa moina sana dui de regedi bi kaere? Bi mina de neideyadi vene. 19 Mokena vari gira de aeyadi dada, gaganiri dui de reyadi ma mina vesifa.