1 Kamini uriyaku gorogoro mukuna nufasa, fura di ourena medari, Mary Magdalene bi guri aeyadi sana bosi guri di ida venari fore biri riyadi bi moi etagae riyadi mina veyo. 2 Mina resi raga resi Simon Peter ma Iesu uka mado usi dina amiye yokoi rofu bosi niyo, “Bi Varika amiye guri sanari moi yakuyadi, ma una una toto ini aeyadi sana bi!”

3 Ye Peter mina usi dina amiye yokoisa guri aeyadi sana urana boyadi. 4 Ina vakoi raga regamadi, idu usi dina amiye yokoi Peter ebu resi guri sanari ina iko okisi 5 agu risi varuka buni maka veyo, idu guri ideri bi de boyo. 6 Ye Simon Peter usi okisi guri aeyadi sana dui resi varuka buni veyo. 7 Iesu di ne uruma varuka ini ada efono reyadi ka veyo; bi varuka bunisa ide, idu ini sanari maka firo risi aeyadi. 8 Kamini usi dina vene yokoi, kaere guri aeyadi sana rofu siko okiyadi, ka bi ini ideri bosi vesi mokena vari gira aeyo. 9 (Adina mina medari, Sei di ago ina toto, ye muyena dadi rae reyaine dada.) 10 Ye ini usi dina vene bi ini rautu neinei dairisi diyadi.

11 Idu Mary bi guri aeyadi sana etofaro are resi isaka nigasa agu risi ideri ne reyo ma 12 Sei di naivo naivo vima remanu varuka feyo risi Iesu di roaita aeyadi sanari amegamadi ma veyo, yokoi bi ini ada rofu ma yokoi bi ini yuka rofu. 13 Kamini nikaiteyadi, “Rema, ya bi beika resi isaka nisa?”

Ma niyo, “Nai Varika amiye bi moiyadi ma goidu aeyadi bi na toto!”

14 Mina nigasa kero resi Iesu are redo ma veyo, idu bi ina toto. 15 Ye ina rofu niyo, “Rema, beika resi isaka nisa? Ya bi kaere maina reisa?”

Ma mokeyo bi muro nari redo amiye yokoi, dada niyo, “Amiye tora, moi diyo vonisi, bi goidu aeyo na oteima ma bosi moigida.”

16 Kamini niyo, “Mary!”

Ma kero resi Hebrew agori niyo, “Rabboni!” (Mina ini adina bi “Oteimana amiye”.)

17 Ma niyo, “Ga na avaka moi, adina nai Baba rofu bi dairina kode; idu nai dubuiyaka vene rofu disi nioteima, ‘Nai Baba ma yi Baba rofu dadigida, kaere bi nai Sei ma yi Sei.’ ”

18 Ye bosi usi dina vene rofu niogau reyo, “Na yaku Varika amiye veyaka.” Resi Iesu yaku niyo ago nioteimaro.

19 Fura di ourena meda uriyenauri, ini usi dina vene bi egogo sanari ida biri risi ae gira resi ideri amegamadi, Jew vene rofu ori reyadi dada. Ye Iesu baesi ini utari are resi niyo, “Uka amuta bi yasa ameyaine.” 20 Mina ago ni vau resi bi ini vana ma aveta oteimaro, ye ada reyadi Varika amiye veyadi dada. 21 Ma dudusa niyo, “Uka amuta bi yasa. Baba yaku na nifeideyo kana, na ka ya nifeideida.” 22 Mina nisi ina fafau asa masi niyo, “Vima kikifa moifa. 23 Amiye yokoi ini vegu no moi erufugedi vonisi, bi koite makugo; ya ini vegu no de moi erufugedi vonisi, de moi koite makugo.”✡Mt 16.19; 18.18

24 Mina ituari Iesu boyori, amiye 12 yokoi roka Thomas, kaere ka roka niyadi Kakafasina,*Kakafasina: Greek agori bi Didymus. bi ina venesa de. 25 Ye ini usi dina vene yaku niyadi, “Una yaku Varika amiye veyafa!”

Idu niyo, “Ini vanari ikoko imiyadi sana vesi nai vana ebuna aesi nai vana ini aveta ideri de aegida vonisi, bi toga mokena vari gira de aegida.”

26 Gabi fura yokoi koina niyori, ini usi dina vene bi dudusa yava ideri amegamadi ma Thomas bi inasa. Bi yava ida biri risi ae gira reyadi, idu Iesu ini utari baesi are resi niyo, “Uka amuta bi yasa.” 27 Resi Thomas rofu niyo, “Yi ebuna minari aesi nai vana ve; yi vana roto risi nai aveta ideri ae. Mokena vari gira de aena ga re, idu mokena vari gira ae!”

28 Ye niyo, “Nai Varika amiye ma nai Sei!”

29 Kamini niyo, “Yi mokena vari gira aeyo, na veyo dada, idu kaere vene na de veyadi, ma mokena vari gira aeyadi bi buni mago!”

30 Ye Iesu yaku ini usi dina vene di nemokori mokena vegu tau regamo, mina buka ideri bi de bura reyo. 31 Idu mina bura reyo, Iesu bi Keriso, Sei di mida mina rofu mokena vari gira aeyaine dada, ye yi mokena vari gira aena dudu ini rokari vegu moigedi.