2
Keriso di ave nina ma ini tora iniye
Mina dada, Keriso ideri bi egira resi ini uka mana di ave nina dudu, nari resi Vimasa auta resi ura resi iriyeduka ya rofu redori, mokena ma uka mana yokoi maka dudu na moi ada refa, vima ma uka yokoi maka dudu kana. Ebu regi ruda rena ma matuka dudu, beika yokoi ga refa, idu ave nina dudu yokoi yokoi ya kaya moi odoro rigi mokefa. Ye ya yokoi yokoi yi buni maka rofu nari rena ga moke, idu amiye bedakai di buni ka mokefa. Mina mokena Iesu Keriso ideri, ya ideri ka ameyaine:
kaere bi Sei kana ini vava nufa,
idu bi Sei sa gogo nina yokoi maka kana, mokena moigi de mokeyo.
Idu ini beika tau gade* beika tau gade: Mina bi Sei di vava ma vabara. bi fufuta masi feresi
moimai rei tavoi reyo amiye kana nisi,
amiye kana nisi
makai vata niyo.
Resi iniye moi ave risi muyena di ida mina usi diyo—
satauro odoro muyeyo mini.
Ye Sei yaku moi odoro iniye risi roka
bi roka tau gade odoro iniye mina maro.
10 Ye Iesu di rokari, Is 45.23
amiye tau gade kaere bi omari, konori ma kono gabireri kono gabireri: Ini mokenari muyena vene mina mukuna sanari toga amededi. amededi
efuka meimiyagane,
11 ma amiye tau gade afiye dudu nirausi reyagane Iesu Keriso bi Varika amiye,
ye makai dudu Baba Sei rofu vabara magedi.
Konori vabara kana kinifo rena
12 Mina dada, nai uka maida vene, ya toga Sei di ago neidesi reyadi kana, nai nemokori maka de, idu besa na amena deri makai resi ori resi tururu rena dudu, yi moi vegu rina rofu moimai refa, 13 ini adina bi Sei, kaere ya dudu ini moimai redo, ini ada rena buni rofu ura resi moimai reyaganedi.
14 Beika tau gade mumugu nina ma kayamo rena dudu ga refa, 15 ye vegu no yokoi de ma kino nufa de ameyagane, Sei di mida mida, no yokoi de nufa, mina gua amededi vene kevo ma vegu rorobo ferena di utari, vabara konori kana, kinifo resi Deut 32.5 16 vegu di ago moi gira rigedi, ye na bi Keriso di dairina medari nivasina regida, ini adina, bi na yaku rei tavoi dudu de raga resi moimai reyaka.
17 Idu rama, yi mokena vari gira aena di ori sisika rena ma Sei ma amiye utari naivo rena kana, mina fafau nai vegu rausi regida koru kana vonisi, bi ya tau gadesa ada regifa. 18 Mina resi ya ka nasa ada regedi.
Timothy ma Epaphroditus
19 Nai uka mokena bi Varika amiye Iesu Keriso ideri, mina bi evade Timothy ya rofu nifeidegida, ye beika sina ya fafau neidegidari, na egira rego. 20 Ini adina bi amiye yokoi de nai mokena kana nufa, kaere ya vene gokai amededi, mina rama uka mokedo. 21 Ina vene tau gade bi iniye di buni maka mokededi, ma Iesu Keriso yaku ini gokai mokedo kana bi de. 22 Ma ya ya diba, iniye ina gokai kana bi ya oteimaro; ina bi nasa gogo ago buni nioku diyafa, mida ini madinisa vakoi naivo rena kana. 23 Mina resi, na rofu beika gokai evade maka vata nigo ma vegidari, bi uka mokena aeda bi ya vene rofu nifeidegida. 24 Kamini na bi Varika amiye rofu mokena vari gira aeda, ye na ka evade bae negida.
25 Idu, mokeyaka buni bi Epaphroditus ya rofu nifeidegida, kaere bi nai dubuini, uni vakoi moimai ma ruda resifa amiye, ma yi nifeidena amiye kaere bi na aededo. 26 Ina bi toga ya vene vegika uka esika resi vorivori redo, ini adina bi ini gauka sina neideyadi. 27 Adina rama ina bi gauka ma muyegika reyo. Idu Sei yaku ina rofu iriyeduka reyo, ina rofu maka de, idu na rofu ka, besa iriyeduka tau tora moigida baebu. 28 Mina resi na bi ina nifeidegi uka dadigasa ameida, ye dudusa vesi ada regedi ma na kaya di uka esika rena aita niyaine. 29 Ye Varika amiye di rokari ada tau gade dudu moisi mina kana amiye moi odoro rifa, 30 ini adina, bi Keriso di moimairi, iniye di vegu ya dada no moigi resi muyegika reyo, yi moimai na rofu rei vau de reyadi, mina na aedegika reyori.

*2:7: beika tau gade: Mina bi Sei di vava ma vabara.

2:10: Is 45.23

2:10: kono gabireri: Ini mokenari muyena vene mina mukuna sanari toga amededi.

2:15: Deut 32.5