3
Mokena rorobo rama
Nai usika ourena, nai sina metona bi Varika amiye ideri ada refa. Beika sena bura reyaka ma dudusa bura reida, mina rofu na uka toe de, ye makai regidari, ya nari resi aedego. Amiye auna no kana mina vei feide mona refa, kaere bi vegu no rededi vene ma roaita nugasi moi no nina vene. Adina una bi rama roaita nugana vene, idu una bi kaere Sei di Vima dudu, Sei nivakesi Iesu Keriso vabara masi roaita di vegu rofu, mokena vari gira de aesifa. Ye na ka nai mokena vari gira roaita di vegu rofu aegi di ida nufa. Ye yokoi yaku mokego ini mokena vari gira aena di ida bi nai ida ebu rego vonisi, na na kaya bi besa ini ida fafau aegida. Na bi vata niyaka meda 8 ri nai roaita nugaradi; na bi Israel amiye yokoi, Benjamin di rubu amiye: Hebrew vene di tutubena. Na bi uni ago gira neidegamaka bi Pharisee amiye dada. Acts 23.6; 26.5; Rom 11.1 Na Sei rofu mokei tora reyaka, ekalesia vene esika esika maraka dada; na bi mokena rorobo nufa, adina ago gira dada butigi yokoi de. Acts 8.3; 22.4; 26.9–11 Idu beika sena asanu reyaka, nai mokenari bi Keriso dada boiyo reyadi. Idu rama, mina beika tau gade reyaka ka nai mokenari bi de amedo, adina nai Varika amiye Iesu Keriso diba nina yaku mina tau gade ebu redo. Ina dada, tau gade boiyo reyadi ma nai mokenari bi sanika maka, ye Keriso asanu resi* asanu resi: Mina bi besa besa usi disi ini ago neidesi diba nisi kana. inasa gobuno regida; na kaya nai mokena rorobo ago gira dudu moina de, idu Keriso rofu mokena vari gira aena di baeyo. Ma mina bi Sei di mokena rorobo bi mokena vari gira aena fafau are redo. 10 Ye na ina ma ini dadi rae rena di vava diba nisi inasa ini esika gurauyo, mina anarauda regasa ini muyenari ina kana nigida, 11 ye ida yokoiri, bi muyenari gutuna dadi rae regida.
Metonari amedo buni mina baku regi raga rena
12 Na na kaya mina tau gade bi sena moiyaka ma bi buni iniye no yokoi de kana bi nikake de reida, idu nai kana nigika moimai gira reida, adina Iesu Keriso bi sena ini na moiyo. 13 Nai usika ourena, na na kaya reyaka mina mina: Bi sena Keriso kana nigi. de nida, idu na bi beika yokoi reida mini: beika sena nai fufutari reyaka, toto nisi beika nai budari amededi, mina urana baego di moimai gira reida. 14 Ye na bi beika buni bi urana raga resi moigida. Mina bi odoro vegu di, Sei yaku Iesu Keriso dudu na raka niyo.
15 Mina dada una tora noibanu, kaere mokena vabara dudu tora niyafa, bi makai mokenadi; ma beika baika deda rofu mokegedi vonisi, Sei bi mina ya rofu ka nioteimago. 16 Idu beika sena reyafa, mina ida yokoi makari usi dinadi. dinadi; bura bedakai disi mokena yokoi maka dudu amenadi nufa.
17 Nai usika ourena bae na gogo risi na vesi toga tari resi kaere uni ida usi tari rededi, mina vei mona refa. 1 Cor 4.16; 11.1 18 Adina sena uru tau gade amiye tau ini reremama ya rofu niyaka, ye gua ka isaka dudu, nida bi Keriso di satauro rofu tuma vene kana amededi. 19 Ini metonari tunu regedi; ini roaita ura rededi, mina maka nivakededi ma ini maena rofu nivasina regasa mina kono di mokena moidedi. 20 Idu una bi oma di vene, mina resi moi vegu rina amiye Varika amiye Iesu Keriso uka mokena dudu, toga toga tua resifa, 21 ina yaku mina kono di roaita yau bi moi idana rigo ma uni roaita yaku ini roaita buni vabara nufa kana nigedi. Adina ini vava dudu, beika baika tau gade ina gabireri raga rededi.

3:5: Acts 23.6; 26.5; Rom 11.1

3:6: Acts 8.3; 22.4; 26.9–11

*3:8: asanu resi: Mina bi besa besa usi disi ini ago neidesi diba nisi kana.

3:13: mina: Bi sena Keriso kana nigi.

3:16: dinadi; bura bedakai disi mokena yokoi maka dudu amenadi nufa.

3:17: 1 Cor 4.16; 11.1