8
Waianina bogesina a natome Maimaituwa ena vanuwemo
1 Kamaina bi ḡalibona Solomon Islael wai babadidi bi dam babadidi i giuwedi a tava Yelusalemmo, te Maimaituwa ena waianina bogesina Saiyonmo, Deivida ena malagaimo bi a saḡena Maimaituwa ena vanuwemo.
3 Sauginemo Islael babadidi matabudi a tava ba pilipilisi bi Livai damna Bada ena waianina bogesina a avali nawe. 4 Tedi palai waiyawa bi ena ḡonaḡona matabudi a avala nawa Maimaituwa ena vanuwemo. 5 Ḡalibona Solomon bi Islael babadidi matabudi laumatamo a dolidoli bi waianina bogesina muliḡa a avaavali saḡe bi tedi sipu bi kau wapewapedi a lausewasewayedi.
6 Kamaina bi pilipilisi Bada ena waianina bogesina a avali nawe, gabu Waiwaiyawinemo bi kelubim mabedi gabulidimo a sako.
10 ✡ Pot 40:34,35Bi sauginemo pilipilisi gabu Waiwaiyawina a gosegose ba giyou pwatapwatana Bada ena vanuwa i waiwavu. 11 Taunana aubaina pilipilisi mote luvana te edi noya maso a voiye banina Bada mayavaina Maimaituwa ena vanuwa i waiwanavu.
Solomon i laupali
22 Kamaina bi Solomon olta sewasewa ani gabuna matanemo i moito bi Islael lavedi matabudi tana mulinemo a moito. Tana nimana i kailagetidi bi i laupalina gado, 23 “Oo Bada, Islael edi Maimaituwa bamo mote maimaituwa ḡesau galewemo ee dobumo mai tam. Bi tam em waianina kwa kaikaididi bi em nuwavaina tedi mabai nuwedi tabutabunemo sa vovoteyeteyemna lisidimo kwa kamaḡati.”
27 “Maimaituwa tam kuna saḡa gulata mote luvam te niga dobunemo bi malamo kwa miya. Bi kota niga anilaudune vanuwina e ḡalana ba i ḡaubo gulata. 28 Bada egu Maimaituwa, tagu em taupaula egu pali kwa vaiye. Bi bai yà waibaḡayemna niganana kwa vitegu. 29 Bi niga Maimaituwa em vanuwa dudubala bi suwala kwa kitawata. Tam kuna giu te niga gabuna isam ani laudunena, taunana aubaina sauginemo em taupaula em vanuwa yài yaba wata bi yà laupalina ba egu pali kwa vaiye. 30 Sauginemo bi tagu em taupaula bi em lava Islael vaitedi niga ḡome em vanuwa kai yaba wata bi ka laupalina ba tam em animiya malamo ema pali kwa vaiye bi ema gebogebo kwa noḡotikamaḡedi.”
41-43 Sauginemo tautavatava Islael noponemo sa miyamiyana sa tava isam aubaina bi em vanuwina sai yaba wata bi sa laupalina ba kamaina te noke em animiya malamo bi edi pali kwa vaiye. Banina mba lavedi em ḡailisi bi gium a vaiye bi niga ḡome a tava. Mba mainana kaka tam sa sibem te em vanuwa e ḡalana ba isam ani kasaḡesaḡena.