16
Kalakalalelemo Bada Islael lavedi kani i vitedi
Islael lavedi matabudi Elim dobuna a gose bi a modina a nawa Sina kalakalalelenemo a tava. Sen ba Elim bi Sainai mododimo. Sauginemo Islael lavedi Idip a potiyovo kamaḡe bi Sina dobunemo a tavana ba nawalai wailabuna, laḡan wai 15-nemo.* Islael lavedi nawailai dolidolina laḡan wai 15-nemo Idip a potiyovo kamaḡe. Bi Sen Kalakalalelenemo a tavana ba nawalai wai labuna laḡan wai 15-nemo, mba ba nawalai ḡemota. Lava matabudi kalakalalelemo bi ḡome a wawaluna Mousis bi Elon lisidimo.
Bi Islael lavedi a giuwedina gado, “I visu te tama maso Idipmo, Bada nimanemo ke peki! Ḡome ba musala gulewidi ke miya waikwaivivilidi bi ke kanikanina ema ḡowana luvanemo bi tam kalakalalenemo kunai doli tavaitemai bi kani ka pekipeki.”
Kamaina bi Bada, Mousis i giuwena gado, “Tagu kani malaḡa yà ḡini yovoḡena temi aubaimi. Laḡan onena ba lava kani sa laitupana laḡan ḡemota luvana. Niga mainana yà voiye te yài laulubudi bi yà kita, te egu waiḡake male sa kaidididi ee geḡa.” Tedi laḡan wai 6-nemo maso kani a vononoḡe laḡan labu luvedi.
 
11 Bi Bada, Mousis i giuwena gado, 12 “Tagu Islael lavedi edi wawalu e vaiye. Kwa giuwedi te tedi aubigamo, musala sa kani bi olaolalemo ba buledi sa kanidi edi ḡowana luvanemo. Bi ḡome kaka sa sibe te tagu Bada edi Maimaituwa.”
13 Mba aubiganemo galewemo mwanuwa fatafatagugu wapewapedi a lovo yovo bi ḡalavu diyana ai wanavu bi olaolalemo ba silovu ḡalavu i waikaivivili. 14 Laḡannemo silovudi a ḡasaḡasala ba mwali kitedi maibena kunakunawa ḡalavu diyana ai wanavu. 15 Bi laḡannemo Islael lavedi a kitakita ba mote a sibe te bai mwalina bi taudiḡa ai talavivilana gado, “Niga bai mwalina?” Isa mana banina ba niga bai mwalina.
Bi Mousis i giuwedina gado, “Niga kanina ba Bada i vitemi te ko kani. 16 Bi niga ba Bada ena giu vavasaḡa temi lisimimo, ‘Temi ḡemoḡemotaḡa emi luvamo kani ko laitupa, te kaputila labu ba lava ḡemota aubaina.” Ḡibulu kalinedimo container 2 litre luvana.
17 Taunana aubaina Islael lavedi Maimaituwa bai i giugiuwena mainana a voiye, te ḡesaudi ba a laitupa gulata bi ḡesaudi mote a laitupa gulata. 18 Tedi mabai bi a lailaitupa gulatana ba a luvedi te mote nevana i kena gwasa bi mabai mote a laitupa gulata ba mote a maluwabi. Bi matabudi edi luva ḡemoḡemotina.
19 Kamaina bi Mousis i giuwedina gado, “Aiyai mote imai tope bokina aubaina.” 20 Bi geḡa te ḡesaudi mote Mousis kalinana a vaiye bi kani nevana ai tope, olaolala ḡesaunemo kani a bova bi a lau mwatamwata. Taunana aubaina Mousis lisidimo i medi gulata.
21 Bi olaolala onena, lava matabuna i lailaitupana ena luvamo bi suwala i saḡa i poupoudidina ba mana a laulaulesalesa. 22 Bi laḡan wai 6-nemo ba ḡemoḡemotaḡa kani a laitupa te kaputila 4 luvana ba lava ḡemota aubaina. Kamaina bi Islael wai babadidi a nawa Mousis lisinemo bi ai talayena gado, “Laḡan onena ba kaputila labu luvedi ke lailaitupa bi bai aubaina niganana kaputila 4 ka laitupa?” 23  Pot 20:8-11Bi Mousis i giuwedina gado, “Bada niga mainana i giu vavasaḡa: Bokina ba waiyawasi laḡanna, laḡan laukaina tana aubaina. Taunana aubaina ko laubuka ee ko laukweli bi bai ko kanikani sakona ba koi tope te bokina aubaina.”
24 Bi Mousis bai i giugiuwena mainana a voiye te olaolala ḡesauna ba kani mote a sisi ee a bova. 25 Bi Mousis i giuna gado, “Temi niganana kemiya ko kanidi, banina niganana waiyawasi laḡanna, Bada ena laḡan laukaina. Bi niganana mote kani ḡalavu diyanemo koma banavi. 26 Laḡan 6 nopodimo kani ko laitupa bi wai 7-na ba waiyawasi laḡanna, mote kaka bai koma banavi.”
27 Bi laḡan wai 7-nemo lava ḡesaudi a nawa te maso kani a laitupa bi geḡa te kani mote a banavi. 28 Kamaina bi Bada, Mousis i giuwena gado, “Lava kwa giuwedi ‘Temi wala te niganana bai aubaina mote egu waiḡake bi egu wailovelove koma kaikaiwatedi? 29 Ko noḡoti kauwe te Bada waiyawasi laḡanina i vitemi. Taunana aubaina laḡan wai 6-nemo ba laḡan labu luvedimo, kani i vite wainonomi. Bi waiyawasi laḡannemo lava matabudi maso vanuwemo a miya bi mote maso a nawa kani a lailaitupa.” 30 Taunana aubaina waiyawasi laḡannemo lava mote kani a laitupa.
31 Islael lavedi kanina ai isana mana bi potipotina maibena keliko bi dinina maibena iwavi.§ Ḡibulu kalinedimo kai coriander pouna a koi luvae.
 
35  Dys 5:12Bi Islael lavedi kwalabu 40, nopodimo mana a kani nawe eete ani bayau dobuna visuvisunemo a tava. Tedi mana a kanikanina eete Keinan doḡana ena palatemo a tava.

*16:1: Islael lavedi nawailai dolidolina laḡan wai 15-nemo Idip a potiyovo kamaḡe. Bi Sen Kalakalalelenemo a tavana ba nawalai wai labuna laḡan wai 15-nemo, mba ba nawalai ḡemota.

16:15: Isa mana banina ba niga bai mwalina.

16:16: Ḡibulu kalinedimo container 2 litre luvana.

16:23: Pot 20:8-11

§16:31: Ḡibulu kalinedimo kai coriander pouna a koi luvae.

16:35: Dys 5:12