34
Mousis ḡakima tabetabedi labu valivaliudi i voiyedi
1 Bada, Mousis i giuwena gado, “Tam ḡakima tabetabedi labu kwa bwalidi maibena dolinemo kuna wai doukivikidina bi mododimo giudi ḡemotidi yà gilumidi. 2 Laḡan ya sako olaolalemo kwa vononoḡa bi kwa saḡa, Sainai oyana dabanemo bi ḡome tai taubanava.”
4 Kamaina bi Mousis ḡakima tabetabedi labu i bwali ḡavukidi kitedi maibena dolidolidi. Bi olaolalemo i avala bi i saḡa i nawa oya Sainai dabanemo Bada i giugiuwena mainana. 5 Ḡome Maimaituwa giyouḡa i yovo Mousis lisinemo bi isana i giu waimaḡati te tana Bada MIYAMIYA NONOḠINA. 6 ✡ Pot 20:5,6; Wai 7:9,10Bada, Mousis matanaḡa i nato i nawa bi i giuwena gado,
“Tagu Bada.
Tagu Bada taunana Maimaituwa lau launuwatoigu
bi lau laukivivisuvisugu.
Tagu mote medimedi makaigu.
Tagu egu ḡoe kenakena nonoḡina lava lisidimo i didiga gulata.
Bai e giugiuwapaena ba yà voiye.
7 Tagu egu ḡoe kenakena nonoḡina
tubulelesa matabudi lisidimo yà kamaḡati bi edi kauwa waigebo
bi edi laukasaḡaiḡai yà noḡotikamaḡedi.
Bi kota mabai a dabodabokeguna,
ba natunatudi, iteitedi, nosinosidi bi waḡewaḡedi yà kovoḡidi.”
8 Noi taunana te Mousis tuwapekana doḡamo i waitupaḡwaliḡe, iwana i taunoku bi ma vivilina Maimaituwa i lauduneye 9 bi i giuna gado, “Aee, Bada bamo te lisigumo kunai nuwavisuna ba vaitemai ta nawa, avena te niga lavedi a laukasaḡaiḡai bi kamaina te tam ema gebogebo kwa noḡotikamaḡedi bi kwai tauwemai te tama tam em lava.”
10 Ḡome Bada, Mousis i giuwena gado, “Kwai beyavaiya, tagu waianina Islael lavedi lisidimo yà voivoiye. Tagu kaka anisove kauwidi yà voiyedi te mataotimimo ko kitedi. Niga kauwidi mote bamo mai dobu ḡesaudimo a tubuḡa te lava a kitedi. Banina niga kauwidi aubaimi yà voivoiyedi te lava ḡesaudi sa vaiye bi sa naila.”
28 Mousis oya dabanemo Bada vaitena a miyana laḡan 40 bi dudubala 40, tana mote bai i kani bi i tego. Bi Bada ena waianina laivaliuna aubaina, waiḡake 10 ḡakima tabetabedimo i gilumidi.* Ḡibulu kalinanemo mote i laumaḡata kauwa te Bada i gilumi e Mousis.
Mousis solana i namanamala
29 Mousis oya Sainai dabanemo bi i munamunaḡa yovo ba waianina gilugilumidi ḡakimidi labu i avala. Tana Maimaituwa vaitena a waigiugiu aubaina solana i namanamali bi tana mote i sibe munaḡe. 30 Bi nove Elon bi Islael lavedi Mousis solana a kita i namanamali ba lisinemo nawa a naila.
31 Kamaina bi Mousis, Elon bi Islael babadidi i yogedi a nato lisinemo bi i giuwedi. 32 Bi kota Islael lavedi matabudi a tava lisinemo bi Bada ena wailovelove Sainai oyana dabanemo i gilugilumina i giuvitedi.
33 Laḡannemo Mousis lava lisidimo giu i waiwaikovi ba gala puselina i vai te solana i suma. 34 Bi laḡannemo palai waiyawemo i sola nawa Bada vaitena wai giugiu aubaina ba galana i kaikaikamaḡe. Bi kota i potiyovo te Bada ena wailovelove lava i giugiu vitedi. 35 Bi lava tana solana namalina a kitakita ba gala i vai bi solana i sumasuma. Bi laḡannemo i munaḡa Bada vaitena waigiugiu aubaina ba solana ani sumana i kaikaikamaḡe.
Bi Mosis puyo bi palai waiyawa ani kelina pulepuledi aubaidi te Islael lavedi i waibaḡedi. Kamaina bi pilipilisi edi gala waiwaiyawidi bi kota bai matabudi lava a tavitedi. Te luvana mba pulepuledimo mwali matabudi sa voiye kovidi. Bi Diuda damnemo Besalel bi Oliyab bi ediya taulauvevewana waiwaivini bi olooloto bainewa Maimaituwa, Mousis i wailovena mainana palai pulepuledi a voiyedi.