1 Kamaina bi Bada, Mousis i giuwena gado, 2 “Tagu Bada emi Maimaituwa Islael lavedi mainana kwa giuwedi, 3 ‘Idip lavedi wala vaitedi kona miyamiyana mote edi yawasana koma miyayedi. Bi Keinan dobuna yà vitemi, kota edi miyamiyamo mote koma miya. 4 Tagu taunana emi Bada bi emi Maimaituwa, kalinagu ko vaiye bi ko kaiwata. 5 Tagu taunana Bada bamoda niga giudi ko kaiwata kauwedina ba yawasana sa vitemi.

6 “ ‘Tagu bai yà giugiuwena ba kalinagu ko vaiye kauwe. Te emi vanuwa lavedi maibena tinetinemi, natunatumi, lawelawemi bi nadenadewemi mote koma badalayedi bi vaitedi tubuḡa komai ḡemoti.

19 “ ‘Laḡannemo waivini nawanawalai i vaina ba mote vaitena tubuḡa komai ḡemoti.

20 “ ‘Emtau mwanena mote kuma lauwaiviniye. Bamoda mainana kuna voiyena ba tagu Bada matagumo kuna ka milamilam.

21 “ ‘Bi maimaituwa Molek* Molek ba dam Amon edi maimaituwa. ena olta dabanemo natunatumi koma lau sewasewayedi. Tagu taunana Bada emi Maimaituwa bamoda mainana ko voiyena ba isagu kowai beyabeyakuluḡe.

22 “ ‘Olooloto taumiḡa mote komai mwanemwanena. Niga gebona matagumo ba i wai matawalawala.

23  ✡ Pot 22:19“ ‘Bi kota waivini e oloto mote ḡamoḡamo vaitedi komai mwanemwanena. Bamoda mainana kuna voiyena ba kauwa gebogebo otina matagumo kuna voiye.

24 “ ‘Niga yawasanidi gebogebodimo mote kuma ka milamilam. Keinan dobuna lavedi mba yawasanidimo taudiḡa a ka milemiledi. Taunana aubaina yà kwavivaidi bi dobuna temi yà vitemi, te koi taniwagae.’ ”