1 Diat par dia nurnur ba Iesu ia ra Kristo, God i ga vangala diat; ma diat par, dia mari nina i ga varvangala, dia mari bula nam ba God i ga vangala. 2 Go ra magit da nunure tana ba da mari ra umana natu i God, tago da mari God, ma da torom ta kana lavur vartuluai. 3 Ma go ko ra varmari kai God, ba dat a torom ta kana lavur vartuluai; ma kana lavur vartuluai pa dia mamat. 4 Tago diat par ba God i ga vangala diat, dia uvia pa ra rakarakan a gunagunan; ma go ko ra niongor i tar uvia pa ra rakarakan a gunagunan: kada nurnur. 5 la nam ba i uvia pa ra rakarakan a gunagunan? Nina iat i kapupi ia ba. Iesu ia ra Natu i God.

6 Ma go i tar vut ma ra tava ma ra gap, Iesu Kristo; vakir ma ra tava ka, ma ra tava ma ra gap bula. 7 Ma ra Tulungen i varvai dovot, tago ra Tulungen ia ra dovotina. 8 Ma ra tabautul dital varvai dovot, ra Tulungen, ra tava, ma ra gap; ma go ra utul dital tikai ka. 9 Ba tumu da kapupi ra varvai kai ra tarai, a varvai kai God i ngala ta dir, tago ra varvai kai God go, ba i ga varvai dovot ure Natuna. 10 Nina i nurnur tai Natu i God, a varvai dovot i tur ta ra balana; nina ba pa i kapupi God, i takun ia ba a tena vaongo; tago pa i ga kapupi ra varvai dovot kai God ure Natuna. 11 Ma go ra varvai dovot, dari, ba God i ga tul tar ra nilaun tukum ta dat, ma nam ra nilaun i ki tai Natuna. 12 Nina i vatur vake Natuna, i vatur vake ra nilaun bula; nina ba pa i vatur vake Natu i God, pa i vatur vake ra nilaun.

13 Go ra lavur magit iau ga tumu ia tadav avat, upi avat a nunure ba ava vatur vake ra nilaun tukum, tadav avat ava nurnur ta ra iang i Natu i God. 14 Ma go ia ra magit da rururung tana tadav ia, tago ba da lul ta magit da ra nuknukina, i vatorome dat; 15 ma ba da nunure ba i valongore dat ta ra magit par ba da lul ia, da matoto bula ba da tar vatur vake nam da ga lul ia tana. 16 Ba tika na tutana i gire turana ba i pait ra varpiam, nina ra minat pa i vana rikai tana, na araring God, ma na tul tar ra nilaun tana ure diat ba pa dia pait ra varpiam nina a minat i vana rikai tana. Tika na mangana varpiam akamana a minat i vana rikai tana; vakir nam iau biti ba da araring ure. 17 A lavur mangamangana ba pa i takodo, ia ra varpiam; ma tika na mangana varpiam a minat pa i vana rikai tana.

18 Da nunure diat par ba God i ga vangala diat, pa dia varpiam, tago nina, ba God i tar vangala, i balaure mule, ma Satan pa i bili ia. 19 Da nunure ba dat tai God, ma ra rakarakan a gunagunan i va ta ra varpiam. 20 Da nunure bula ba Natu i God i tar pot, ma i ga tul tar ra minatoto ta dat, upi dat a nunure nina i dovot ma da ki tai nina i dovot, tai Natuna Iesu Kristo. Go ia ra God tuna, ma ra nilaun tukum. 21 A umana natugu ikik, avat a balaure avat kan ra umana tabataba.