1 Ma ba i ga par mangoro na bung, ma ba ra Luluai i ga vango ra tarai Israel kan kadia lavur ebar kikil diat, ma ba Iosua i ga manga patuana ma i ga peal kana lavur kilala, 2 Iosua i ga oro varurue ra tarai Israel par, kadia lavur patuana ma kadia lavur luluai, ma kadia lavur tena varkurai, ma kadia lavur raprap, ma i ga biti ta diat: Iau tar patuana, ma kaugu lavur kilala dia tar peal, 3 ma ava tar gire ra lavur magit ra Luluai kavava God i ga pait ia ta go ra lavur vuna gunan ure avat, tago ra Luluai kavava God i ga varubu maravut avat. 4 Gire, iau tar tibe avat ma go ra lavur vuna gunan dia tur valili boko, varurung ma ra lavur vuna gunan ba iau ga tar kamare vue diat, upi kavava umana vuna tarai diat a kale diat, i tur pa ia ta ra Iordan ma i tuk tar ta ra ngala na ta, ta ra papar ba ra keake i kuba tana. 5 Ma ra Luluai kavava God na okole vue diat ta ra luaina mata i vavat ma na korot vairop diat upi koko avat a gire mule diat, ma avat a vatur vake kadia gunan da ra Luluai kavava God i ga ve avat i tana.

6 Io, avat a ongor tuna upi avat a mur ra lavur magit di ga tumu ia ta ra buk na varkurai kai Moses, upi avat a pait ia, ma koko avat a vana kan ia ta ra papar a lima tuna ba ta ra papar a maira; 7 Upi koko avat a ki varurung ma ra tarai dia ki boko pire vavat, ma koko avat a vatavatang ra iang i kadia lavur god, ma koko avat a vatang diat ta ra vavalima, ma koko avat a torom ta diat, ma koko avat a va timtibum tadav diat; 8 avat a ki petep uka tai ra Luluai kavava God, da ava tar pait ia tuk tar ta ra bung gori. 9 Tago ra Luluai i ga korot vairop vue ra umana ngala na vuna tarai ma ra umana tena ongor ta ra luaina mata i vavat; ma pa ta tikai i ga tur bat avat tuk tar ta ra bung gori. 10 Ta kopono tutana ta vavat na korot murmur tika na arip na marmar, tago ra Luluai kavava God i varubu maravut avat, da i ga ve avat. 11 Io, avat a balaure bulu avat, upi avat a mari ra Luluai kavava God. 12 Ma ona ava vana irai, ma ava mur ra ibaiba ta diat dia ki boko pire vavat ta go ra lavur vuna tarai, ma ona ava taulai ma kadia vaden, ma ava ruk pire diat, ma dia ruk pire vavat, 13 avat a nunure ba a dovotina ra Luluai kavava God pa na korot vue mule go ra lavur vuna tarai kan avat; diat a varogop uka ma ra palai ma ra kun pire vavat, ma varogop ma ra virit ta ra paka i vavat, ma ra kait ta ra kiau na mata i vavat, tuk tar ta ra bung ba ava virua tana kan go ra bo na gunan nina ra Luluai kavava God i tar tabar avat me.

14 Io, gori iau mur ra mangamangana kai ra lavur tarai par, ma ava nunure ta ra bala i vavat par ma ra nuknuk i vavat par ba pa ta magit i ga rara ta nam ra lavur bo na magit ra Luluai kavava God i ga tatike ure avat; a lavur magit i ga tadav avat, ma pa ta tikai i ga iba.

15 Ma da ra lavur bo na magit i ga vana rikai pire vavat nina ba ra Luluai kavava God i ga varvai lua tana, damana ra Luluai na tulue ra lavur kaina magit tadav avat tuk tar ta nam ra bung ba na vakaina vue avat kan go ra bo na gunan nina ba ra Luluai kavava God i tar tabar avat me, 16 ona ava piam vue ra kunubu kai ra Luluai kavava God nina i ga vatur ia pire vavat, ma ava vana ma ava torom ta ra lavur enana god ma ava va timtibum tadav diat. Ma ra kankan kai ra Luluai na karangap ure avat, ma avat a virua lulut kan ra bo na gunan nina i ga tul tar ia ta vavat.