1 Ma Iosua i ga oro varurue ra lavur vuna tarai Israel uro Sekem, ma i ga oro pa ra umana patuana Israel, ma kadia umana lualua, ma kadia umana tena varkurai, ma kadia umana raprap; ma dia ga tur rikai ta ra luaina mata i God. 2 Ma Iosua i ga biti ta ra tarai par. A Luluai ra God kai Israel i biti dari: Amana iat a umana tama i vavat dia ga ki ta ra papar a Tava Alir maro, Tera tama i Abaraam ma Nakor, ma dia ga torom ta ra umana enana.god. 3 Ma iau ga pilak pa tama i vavat Abaraam ta ra papar a Tava Alir maro, ma iau ga agure vurvurbit ta ra gunan Kanaan par, ma iau ga vapealane ra lavur bul mur tana. Iau ga tul tar Isak tana, 4 ma iau ga tul tar Iakob ma Esau tai Isak. Ma iau ga tibe tar ra luana Seir tai Esau upi na vatur vake vatikai; ma Iakob ma ra umana natuna dia ga vana ur Aigipto. 5 Ma iau ga tulue Moses ma Aron, ma iau ga vakadik Aigipto, da iau ga pait ia pire diat; ma namur iau ga agure vairop avat. 6 Ma iau ga agure vairop ra umana tama i vavat kan ra gunan Aigipto, ma ava ga tadav ra ta; ma ra tarai Aigipto dia ga korot mur ra umana tama i vavat ma ra lavur kiki na vinavana ure ra vinarubu ma ra tarai dia ki ra os, ma i ga tuk tar ta ra Ta Meme. 7 Ma ba dia ga tangi tadav ra Luluai, i ga vaki ra bobotoi livuan ta vavat ma ra tarai Aigipto, ma i ga tulue ra ta taun diat ma dia ga dudu; ma ra mata i vavat i ga gire ra. lavur magit iau ga pait ia aro Aigipto, ma ava ga ki ta ra pupui mangoro na bung. 8 Ma iau ga agure vaolo avat ta ra gunan kai ra tarai Amor nina dia ki ta ra papar a Iordan maro; ma dia ga varubu ma avat, ma iau ga nur tar diat ta ra lima i vavat, ma ava ga vatur vake kadia gunan; ma iau ga vakaina vue diat ta ra luaina mata i vavat. 9 Namur Balak natu i Sipor a king Moab i ga tut na vinarubu ma ra tarai Israel; ma i ga vartuluai upi Balam natu i Beor upi na tata vabilak avat; 10 ma iau, pa iau ga torom tai Balam, kari i ga tata vadoane ke avat; damana iau ga valaun avat kan ra limana. 11 Ma ava ga bolo lake ra Iordan, ma ava ga tadav Ieriko; ma ra tarai Ieriko dia ga varubu ma avat, a tarai Amor, a tarai Peres, a tarai Kanaan, a tarai Ket, a tarai Girgas, a tarai Kivi, ma ra tarai Iebus; ma iau ga tul tar diat ta ra lima i vavat. 12 Ma iau ga tulue ra varubu kakap na lua ta vavat, ma dia ga korot vairop vue ra ura king kai ra tarai Amor ta ra luaina mata i vavat, vakir kaum pakat na vinarubu ma kaum panak, patana. 13 Ma iau ga tul tar ra gunan ta vavat, a gunan ba pa ava ga palum ia, ma ra umana pia na pal ba pa ava ga pait diat, ma go ava ki tana; ma ava ian ta ra vuai na uma na vain ma ra uma na oliva nina pa ava ga vaume.

14 Kari go avat a ru ra Luluai, ma avat a torom tuna tana ma ra dovotina, ma avat a vung vue ra lavur god nina ra umana tama i vavat dia ga torom ta diat ta ra papar a Tava Alir maro ma aro Aigipto; ma avat a torom tai ra Luluai. 15 Ma ona pa ava mainge ra tinorom tadav ra Luluai, io, avat a pilak pa nina ba ava mainge ra tinorom tana gori, ra umana god bar nina ba ra umana tama i vavat dia ga torom ta diat ta ra papar a Tava Alir maro, ba ra umana god kai ra tarai Amor nina ava ki ta kadia gunan go ieri; ia kaka iau, avet ma diat ta ra kubagu, avet a torom tai ra Luluai.

16 Ma ra tarai dia ga tata bali ia ma dia ga biti: Koko muka avet a vana kan ra Luluai, upi avet a torom ta ra umana enana god; 17 tago ra Luluai kada God iat i ga agure vairop dat ma ra umana tama i dat kan ra gunan Aigipto, kan ra kuba i ra umana vilavilau, ma ia iat i ga pait ra umana ngala na vakilang ta ra luaina mata i dat, ma i ga mataure dat ta ra lavur nga da ga vana tana ma ra lavur tarai da ga vana alalu livuan ta diat; 18 ma ra Luluai i ga korot vairop vue ra tarai par ta ra luaina mata i dat, ra tarai Amor nina dia ga ki ta ra gunan; kari avet bula avet a torom tai ra Luluai, tago ia iat kada God.

19 Ma Iosua i ga biti tai ra tarai: I dekdek upi avat a torom tai ra Luluai, tago ia ra lia na God, a tena ongor; pa na pun vue kavava varpiam ma kavava lavur nirara. 20 Ona ava vana kan ra Luluai ma ava torom ta ra umana enana god, na vana tapuku ma na pait ra magit i bilak ta vavat, ma na vapanie vue avat, ma a dovotina lua i ga pait ra boina ta vavat. 21 Ma ra tarai dia ga biti tai Iosua dari: Koko; avet a torom uka tai ra Luluai. 22 Ma Iosua i ga biti tai ra tarai: Avat a umana tena varvai kapa ure mule avat, ba ava tar pilak pa ra Luluai upi avat a torom tana. Ma dia ga biti: Avet a umana tena varvai tana. 23 Ma i ga biti: Io, avat a vung vue ra lavur enana god livuan ta vavat, ma avat a bala upi ra Luluai ra God kai Israel. 24 Ma ra tarai dia ga biti tai Iosua: Avet a torom tai ra Luluai kaveve God, ma avet a valongore ra nilaina. 25 Ma Iosua i ga pait tika na kunubu pire ra tarai ta nam ra bung, ma i ga vatur tika na vartuluai ma ra varkurai pire diat aro Sekem.

26 Ma Iosua i ga tumu go ra lavur tinata ta ra buk na varkurai kai God, ma i ga tak pa tika na ngala na vat ma i ga vatur ia ta ra vavai ra iban nina i tur pire ra gomgom na pal kai ra Luluai. 27 Ma Iosua i ga biti ta ra tarai par: Gire, go ra vat na varogop ma ra vakilang ure dat; tago i ga valongore ra lavur tinata par ra Luluai i ga tatike pire dat; na varogop ma ra vakilang ure avat, kan avat a pue vue kavava God. 28 Damana Iosua i ga tul vue ra tarai ta kadia tiniba tikatikai.

29 Ma ba i ga par go ra lavur magit, Iosua natu i Nun ra tultul kai ra Luluai i ga mat, ma i ga tar laun pa tika na mar ma a vinun ot na kilala. 30 Ma dia ga punang ia ta kana langun iat aro Timnat-Sera, nina ta ra gunan i lualuana Epraim ta ra papar a labur ta ra luana Gas.

31 Ma ra tarai Israel dia ga torom tai ra Luluai ta ra lavur kilala Iosua i ga laun tana, ma ta ra kilala kai ra umana patuana nina dia ga laun boko ba Iosua i ga tar mat, ma dia ga nunure ra lavur papalum ra Luluai i ga pait ia ure Israel.

32 Ma dia ga punang ra ur i Iosep, nina ra tarai Israel dia ga kap vairop ia maro Aigipto, aro Sekem ta ra pakana pia Iakob i ga kul pa ia ta ra umana natu i Kamor tama i Sekem ma ra mar na pakana mani; ma ra umana natu i Iosep dia ga vatur vake.

33 Ma Eleasar natu i Aron i ga mat, ma dia ga punang ia ta ra luana kai Pinekas natuna, nina di ga tul tar ia tana ta ra gunan i lualuana Epraim.