2
Io, avat a umana tena tinabar, go ra vartuluai di tul tar ia ta vavat. Ona pa ava valongore, ma ona pa ava kapupi ia, upi avat a ru ra iangigu, ra Luluai kai ra lavur kor i biti, ina tulue ra bilak na balbali tadav avat, ma ina tata vakaina ra magit ava ti doan tana; maia, iau tar tata vakaina diat, tago pa ava kapupi ia. Ea, ina pakat kutu vue ra lima i vavat, ma ina imire tar ra puputa ta ra mata i vavat, maia pa, ra mutamuta ta kavava lavur lukara; ma da vue avat varurung me. Ma avat a matoto ba iau ga tulue go ra vartuluai tadav avat, upi kamimir kunubu ma Levi na tur, ra Luluai kai ra lavur kor i biti. Kamimir kunubu dari, a nilaun ma ra malmal; ma iau ga tul tar dir tana, dital ma ra variru, ma i ga ru iau, ma i ga burut ta ra iangigu. A dovot na varkurai i ga irop ta ra ngiene, ma ra ura bul na ngiene pa dir ga rara; amir ga varait me ma ra malmal ma ra dovot na mangamangana, ma i ga ben pukue mangoro kan ra varpiam. Tago i topa ia ba ra ngie i ra tena tinabar na vatur vake ra kabinana, ma ra tarai dia tikatikan upi ra varkurai ta ra ngiene, tago a tultul kai ra Luluai kai ra lavur kor. Ma ga avat ava ga vana irai kan ra nga; ava ga varara mangoro ma ra varkurai; ava ga vakaina kamimir kunubu ma Levi, ra Luluai kai ra lavur kor i biti. Kari iau kabila, iau varuva avat, ma iau tata vaikilik pa avat ta ra luaina mata i ra tarai par, tago pa ava mur kaugu lavur nga, ma ava ga ru vakuku ra tarai ta ra varkurai.
A Luluai i tata bat Israel ure ra bilak na mangamangana
10 Tikai ka laka dat par da ki na bartamana me? A kopono God i ga vaki dat, laka? Ta ra ava dat par tikatikai da vagu pa tura i dat, ma da vabilak ra kunubu a umana tama i dat dia ga pait ia? 11 Iuda i tar vavagu, ma Israel ma Ierusalem dir pait ra magit i bilak; tago Iuda i vabilak ra pal i gomgom kai ra Luluai, nina i manane, ma dir taulai ma ra vavina, natu i ra god irai. 12 Boina ba ra Luluai na ubu vue kan ra tutana damana ma kan ra lavur pal na mal Iakob nina i varvangun ma nina i torom, ma nina bula ba na tul tar ra vartabar pire ra Luluai kai ra lavur kor. 13 Ma go bula ava pait ia; ava toro ra uguugu kai ra Luluai ma ra lur na mata i vavat, ma ava manga tangi ma ava riri, tago pa i ru mule kavava vartabar, ma pa i vatur vake ta vavat ma ra varmananai. 14 Ma ava biti ka: Ta ra ava? Tago ba u barmana amur ga taulai ma kaum vavina ta ra luaina mata i ra Luluai, ma go u tar leleing tana ma ra vaongo, ma a dovotina talaim, ma kaum taulai ba u vatur vake ma ra vavalima. 15 Dave, tikai i ga vaki dat, ma i balaure valaun dat, laka? Ma nam tikai i tikan upi ra ava vang? A umana bul ba God i tul tar ia. Kari avat a balaure ra nuknuk i vavat ma koko ta tikai na leleing ta kana vavina nina dir ga taulai me ba i barmana. 16 Tago ra Luluai ra God kai Israel i biti dari: Iau milmilikuane ra pala varbean, ma nina bula ba i vadur kana mal ma ra mangamangana karangap, ra Luluai kai ra lavur kor i biti; kari avat a balaure ra nuknuk i vavat, ma koko avat a pait ra vavagu.
A bung na varkurai i maravai
17 Ava tar vamilamila ra Luluai ma kavava tinata. Ma ava biti ke dari: Ave tar vamila ma ra ava? Tago ava biti: Diat par dia pait ra varpiam dia ko ta ra mata i ra Luluai, ma i gugu ta diat; ba dari: Akave ra God nina i varvarkurai?