1 Na kaina ta diat dia nuk upi ra kaina, ma dia vaninare ra bilak na magit ta kadia vava! Ta ra malana ba i kapa dia pait ot pa ia, tago ra lima i diat i dekdek. 2 Ma dia puruai upi ra umana pia na uma, ma dia vatur vake diat, upi ra umana pal, ma dia tak vue ke diat; ma dia ki taun ra tutana ma ra kubana, maia, ra tutana ma ra tiniba i kale vake. 3 Kari ra Luluai i biti dari: Ea, ina nuk upi ra magit i kaina ure go ra apik na tarai, ma pa avat a ule vue ra inoa i vavat kan ia, ma pa avat a vanavana mulai da ra umana luluai; tago i kaina ra e. 4 Ta nam ra kilala da pit ra kakailai na varkulumai ure avat, ma da gugu ma ra gu, ma da biti dari: Di tar vakaina tuna dat; i kia ra tiniba kai kaugu tarai; i tak vue kan iau; i tibe ra umana tena varpiam ma kada pia na uma. 5 Kari pa ta na na ki piram ba na vue ra vinau na valavalar ta ra tiniba pire ra tarai kai ra Luluai.

6 Koko avat a varvai na propet, damana dia varvai na propet. Koko diat a varvai ure go ra umana magit, a umana vartakun pa dia ngo. 7 Dave, a tarai Iakob, da biti bar dari: Dave, di tar vabilua ra Tulungea i ra Luluai vang? Dave, go kana papalum? Dave, kaugu tinata pa i vadongone nina i vanavana takodo? 8 Ma ga nari ka kaugu tarai dia tar tut na vinarubu da ra ebar; ava ra vue ra olovoi kan ra mal kadiat dia vana pakit, ma dia tuptup da ra tarai ba pa dia mainge ra vinarubu. 9 A vaden pire kaugu tarai ava okole vue diat kan kadia lavur vakak na pal; ma ava tak vatukum vue kaugu minamar kan ra umana natu i diat. 10 Avat a tut, ma avat a vana, tago vakir kavava gunan na ningo go, ure ra mangamangana dur ba i varli, ma ra varli i mamat na kaia. 11 Ba tika na tutana i mur ra magit vakuku, ma i vartuam ma ra magit vavaongo dari: Ina tata na propet piram ure ra vain ma ra tava longlong; nam iat na propet pire go ra tarai.

12 U Iakob, a dovot ina vaki guve avat par; a dovot ina varurue ra tarai Israel dia ki valili; ma ina vaki guve diat da ra lavur sip ta ra liplip; da ra kikil na sip livuan ta kadia bala na vura, damana diat a varvareo tuna, tago a ngala na kor na tarai. 13 Ra tena rurutu i tar lue rap diat, dia tar rutu rikai, ma dia tar tadav ra mataniolo, ma dia tar irop tana; ma kadia king i tar rap diat, ma ra Luluai i lua ta diat.