1 Luluai, una valongore kaugu tinata,

Una nuk pa ra ninunuk ta ra balagu.

2 Una valongore kaugu kinail, kaugu king ma kaugu God,

Tago iau araring piram.

3 Luluai, una valongore ra nilaigu ta ra malana;

Ta ra malana ina vaninare kaugu niaring tadav u, ma ina mono.

4 Tago vakir u a god ba na gugu ta ra varpiam;

A kaina pa na ki piram.

5 A umana lunga pa diat a tur ta ra luaina matam;

U milikuane ra lavur tena varpiam par.

6 Una nila vue ra umana tena vaongo;

A Luluai i milikuane ra tena vardodoko ma ra tena vavagu.

7 Ma iau, ina ruk ta ra kubam ta kaum peal varmari;

Ina variru piram, ma ina lotu tadav kaum pal i gomgom.

8 Una lue rap iau, Luluai, ta kaum mangamangana takodo, ure kaugu lavur ebar.

Una vakapa mal kaum nga ta ra luaina matagu.

9 Tago pa ta dovotina i tur ta ra ngie i diat;

A bala i diat i manga kaina ka;

A kongkong i diat i da ra babang na minat i panganga;

A karamea i diat i tata na varmananai vakuku.

10 God, una takun ot pa diat;

Boina ba diat a bura ure ra nuknuk i diat iat;

Una okole vue diat ure kadia peal varpiam,

Tago dia tar tut na varpiam ure u.

11 Ma boina ba diat par dia nurnur tam, diat a ga tuna ka,

Diat a malalongo na gugu vatikai, tago u kove diat.

Ma diat dia manane ra iangim diat a gugu tam.

12 Tago una vadoane ra tena takodo;

Luluai, una pulu ia ma ra varmari da ra ramravit.