45
A kakailai ta ra varbean na king
Kai nina i lue ra kakailai,. a tiun Sosanim; kai ra tarai Kora; a mari na kakailai ure ra varbean.
1 A balagu i buabuai lake ma ra lavur kat na tinata;
Ina tatike ra tinata nina iau ga pit ia ure ra king;
A karameagu i da ra pen na tutumu kai tikai i melem tuna ta ra tutumu.
2 U ti lia ma ra potar ta vavat ma ra tarai,
A mari na tinata i irop ta ra ngiem, kari God i tar vadoane vatukum u.
3 Una vi pit, ma ra pakat na vinarubu na taba ta ra papar a rakam, u a rangrang na luluai,
Una vi pit ma kaum minamar ma ra ngala na dekdekim.
4 Ma una ongor ma ra nivut ta ra ngala na dekdekim
Ure ra dovot na papalum, ure diat i madu ra bala i diat ma ure ra mangamangana takodo;
Ma ra limam tuna na tovo u ta ra lavur magit ba di burut na kaia tana.
5 Kaum umana pu dia lamia,
A tarai dia bura ta ra vavai na kaum;
A umana pu dia tar go ra bala i ra umana ebar kai ra king.
6 God, kaum kiki na king i tur tukum,
Kaum buka na king, a buka na varkurai i takodo.
7 U tar mainge ra mangamangana takodo, ma u tar milikuane ra varpiam;
Kari God, kaum God, i tar ku u
Ma ra dangi na gugu, upi una lia me ta vavat ma ra umana talaim.
8 Kaum lavur mal dia ang na katkat ma ra bira na davai, ra alo ma ra kasia.
A umana pagol dia tar vagugu u ta ra umana kuba i ra king, nina di mar ia ma ra loko na elepant.
9 Ta umana vaden, a umana natu i ra umana king, dia ki varurung ma kaum lavur tadar na vavina;
Kaum taulai i tur ta ra papar a limam tuna, ma i mong ma ra goled maro ta ra gunan Opir.
10 Ea, u a inip na vavina, una nuk pa ia, ma una valongore;
Una nuk vue ra umana niurum ma diat ta ra kuba i tamam;
11 Damana ra king na manane ra vakak na matam;
Tago ia iat kaum luluai, ma una tul tar ra variru tana.
12 Ma natu i Tiro, a vavina, na kap vartabar,
Maia, ra umana uviana ta ra tarai diat a lul upi una mari diat.
13 Natu i ra king, a vavina, i ki ra bala na pal na king ma i mamar na kaia;
Kana mal di ga vir maravut ia ma ra goled.
14 Ba di ben pa ia tadav ra king na mal ma ra mal na minong,
A umana inip na vavina, nina dia talaina me, dia mur ia,
Ma da agur pa diat piram.
15 Da agur pa diat ma ra gugu ma ra ngala na gina;
Diat a ruk ta ra kuba i ra king.
16 A umana natum diat a kia vue kaum umana ngalangala,
Ma una vaki diat upi diat a luluai ta ra gunagunan.
17 Ina tul tar ia ba diat a nuk uraure ra iangim ta ra lavur taun tarai namur;
Kari a lavur vuna tarai par diat a pite milat pa u ma pa na mutu.