102
A niaring kai nina i ki na malari
A niaring kai nina i malari, ba i tup ia, ma i vaarike kana kaina kini pire ra Luluai.
1 Luluai, una valongore kaugu niaring,
Ma kaugu tinangi na tadav u.
2 Koko una ive ra matam kan iau ta ra bung ba iau ki na malari tana;
Una lingan upi iau;
Ba iau kail up u, una torom lulut.
3 Tago kaugu nilaun i panie da ra mi,
Ma ra lavur urugu dia io da ra mapina ul.
4 Di tar rang ra balagu da ra vura, ma i makuk;
A dovot iau valubane vue ra agu nian.
5 A umana urugu dia tar petep ta ra viogu
Ure kaugu tinangi ma kaugu niriri.
6 Iau varogop ma ra mou ta ra bil,
Ma iau da ra kurkur ta ra pupui.
7 Iau vangala pa ra keake,
Ma iau da ra beo ik i ki varkolono ta ra ul a pal.
8 Kaugu lavur ebar dia vul iau a bungbung par;
Ma diat dia kaba iau dia tata kakaina tagu.
9 Tago iau tar en ra kabu da ra gem,
Ma iau tar poto kaugu tava na nimomo ma ra lur na matagu.
10 I vuna ta kaum kankan ma kaum kulot,
Tago u tar takan pa iau, ma u tar rapue iau.
11 Kaugu kini ati ra pia i da ra malur i lolovina;
Ma iau tar makuk da ra vura.
12 Ma ga u Luluai, una ki tukum,
Ma ra lavur taun tarai par diat a matamatanai upi ra iangim.
13 Una ga tut, ma una mari Sion;
Tago i topa ia ba una mari ia, maia, ra bung di ga kubu ia i tar vut;
14 Tago kaum umana tultul dia manane kana lavur vat,
Ma dia mari ra tobonina.
15 Damana ra lavur vuna tarai diat a ru ra iang i ra Luluai,
Ma ra lavur king ta ra rakarakan a gunagunan diat a ru kaum minamar;
16 Tago ra Luluai i tar vatur Sion,
I tar vana rikai ta kana minamar,
17 I tar nuk pa ra niaring kai ra umana biaui,
Ma pa i pidimuane.kadia nilul.
18 Diat a tumu go ure ra taun tarai namur;
Ma ra tarai ba da vangala boko diat diat a pite pa ra Luluai.
19 Tago i tar gire uti ra pia marama liu ta kana pal tabu;
Marama ra bala na bakut ra Luluai i tar bobe ra gunagunan;
20 Upi na valongore ra tinangi kadiat dia ki ra pal na banubat;
Upi na pala vue diat di ga kure diat upi diat a virua;
21 Upi ra tarai diat a varvai ure ra iang i ra Luluai ta ra gunan Sion,
Ma ure kana pite varpa ta ra gunan Ierusalem,
22 Ba ra umana vuna tarai dia tar ki varurung,
Ma ra umana vuna varkurai bula. upi diat a torom tai ra Luluai.
23 I tar vaikilik kapi ra dekdekigu nangananga;
I tar vatutukana kaugu nilaun.
24 Iau biti: Kaugu God, koko una tak vue kaugu nilaun ba pa iau patuana boko.
Kaum lavur kilala na nilaun pa diat a mutu.
25 Amana iat u ga vung ra vunapai ra rakarakan a gunagunan,
Ma ra bala na bakut a kau i ra limam.
26 Dir a panie boko, ma ga u, una ga tur vatikai;
Maia pa, dir par dir a maulana vanavana da ra mal;
Ma da ra mal una ga kia dir, ma dir a enana vanavana;
27 Ma u, pa u enana ka,
Ma kaum nilaun pa na mutu.
28 A umana natu i kaum lavur tultul diat a ki vatikai namur,
Ma ra umana bul mur ta diat diat a tur ta ra luaina matam.