Kolose
Kolose Ekalesia veize Pauloꞌa Mirihiroteꞌe Soꞌaḡa
Ihore Ḡoeꞌa
Soꞌa ꞌahiꞌe Pauloꞌa Roma zamaḡano ḡuꞌa neḡano Kolose ekalesia veize mirihiro. Koloseꞌe Asia habaꞌano ne boro ꞌahoga. Tasika zu Onesimoꞌa soꞌa ꞌahi odohe onamiro. Pauloꞌa ibite Kolose ekalesia vaḡe mene onamiro, rehano Epafaraꞌa zeḡe vaḡe onamadu barirotene zeḡe hari Paulo meꞌodoharo. Zeḡe boꞌaḡano ḡuriro ihore azaḡaniꞌa ekalesia tutuze veꞌone ihozeꞌeteꞌe Pauloꞌa egadu ḡuriro ihore azaḡaꞌe veꞌoḡa rae ekalesia ihozifine soꞌa ꞌahi mirihiro. Ḡuriro ihore azaḡaꞌe Badiꞌa mazao daꞌo mene kuraꞌuma, rehano tuḡure viga nunu zu vine zuhiꞌaḡa nunu mazao zuni kuraꞌuma rae ihoziro. Ze Iesuꞌe mene Badiꞌa, rehano tuḡure viga ꞌahoga heuḡa rae reiro. Ze ogomu nuꞌe mene aꞌuma rae ihoziro ebu ahiri sausauneꞌeteꞌe haḡaiḡa hegotoꞌi rae tuḡutuḡuziro. ꞌUguḡa ihoreḡa veꞌoḡa ekalesia azaḡaniꞌa mene hegotifine, zu Iesu Keriso daꞌo eme ḡabofeꞌeteꞌe vazeḡa rae ederifine, Pauloꞌa ihoziro.
1
1 Eḡe, Pauloꞌa emeḡe nego Timoteo teite soꞌa ꞌadi miriheꞌohe. Eꞌe Badiꞌa urao Keriso Iesu apostolo vazeḡano reiro. 2 Soꞌa ꞌadiꞌe Kolose zamaḡano Badiꞌa mone azaḡa, Keriso teite tiburanadu zama niduꞌa hina haḡaeꞌeteꞌe negoḡa nabuga mazao tuḡureꞌohe.
Badiꞌa, emeḡe Mamaꞌa zae mazao manoḡa zu zama roḡeḡa ziniꞌenoꞌi.
Pauloꞌa Badiꞌa mazao Manoḡa Tauḡi reiro
3 Eme zae veize kurauꞌetene, Badiꞌa, emeḡe Zuhiꞌa Boro Iesu Keriso Moga mazao manoḡa tauḡi raꞌohe. 4 Mazaḡa eme zaeꞌa Keriso Iesu mazao fieꞌeteꞌe zu Badiꞌa mone azaḡa niduꞌa zamare borofeꞌeteꞌe igiro. 5 Zaeꞌa ꞌougeꞌetaꞌaꞌe mazaḡa Badiꞌaꞌa zae veize eꞌe naeḡa adureo ruhibiroteꞌe zaeꞌa mae ḡihineꞌenaꞌa guhineꞌohe. Eꞌe mae ḡihineꞌenaꞌa, guhineꞌeteꞌe moneoꞌe zaꞌa ibite hari manoḡa, ḡoere huga mae ḡihiniroteꞌe madaḡano zaeꞌa igiro. 6 Eꞌe hariḡa manoḡaniꞌa zae mazao ariro. Zaꞌe hari manoḡa eꞌe egadu hube hune Badiꞌaꞌa zae mazao manoḡa furenirotaꞌaꞌe edere huniro. Eꞌe madaḡanonoꞌo onao izidi, hari manoḡa eꞌeꞌa zae boꞌaḡano hudauꞌeteꞌe zu bororuꞌeteꞌe teige, raha niduꞌa zamaḡano hudauꞌohe zu bororuꞌohe. 7 Zaꞌe Epafaraꞌa hari manoḡa ihozadu ederiro. Aniꞌe emeḡe teite tiburu gaueꞌeteꞌe vazeḡa zu emeḡe zamarone vazeḡa ebu Keriso tuḡure vazeḡa. Aniꞌe Keriso veize zamaḡa niduꞌa hina gaueꞌenaꞌa, emeḡe danafeꞌeteꞌe vazeḡa. 8 Ebu aniꞌe Badiꞌa Vineꞌa zae zamare borofadu zae zuni vaze zamare borofeꞌeteꞌe moneo meꞌodofiro.
9 Eꞌanoꞌo emeḡeꞌa zae hari ꞌouge igiroteꞌe madaḡanonoꞌo onao izidi, zae veize iḡaiḡa kurauꞌohe. Ebu Badiꞌaꞌa ane Vineonoꞌo zama huhuzaḡa zu edeḡa niduꞌa zenoga veize kurauꞌohe, ebu zaeꞌa Badiꞌa ura ederifine edemazoga veize kurauꞌohe. 10 Ebu Zuhiꞌa Boroꞌa urateꞌeteꞌe ḡaboneḡano zaeꞌa radifine, zu haḡai niduꞌa zamaḡano ani matuꞌohafine, zu gau manoḡa niduꞌa haḡaeꞌenaꞌa manoḡa hidifine, zu Badiꞌa borofe edere onamifine emeꞌa kurauꞌohe. 11 Ebu Badiꞌaꞌa gigiꞌaḡa boro huneonoꞌo areꞌeteꞌe gigiꞌaḡa niduꞌa hina zae inarazifine kurauꞌohe, zu zaeꞌa matuꞌeꞌenaꞌa, ḡau niduꞌa veize zamaze obone gigane onamo ḡonabifine, emeꞌa kurauꞌohe. 12 Ebu zaeꞌa emeḡe Mama mazao manoḡa tauḡi rouga veize emeꞌa kurauꞌohe, mazaḡa emeḡe Mamaꞌa ane mone azaḡaniꞌa ane agaḡa zamaḡano meiteꞌe toheḡa zae zuni mouga veize ibitoziro. 13 Aniꞌe uzabo ḡiḡiꞌaḡanonoꞌo emeḡe ḡabofadu ane zamarone Ubuganiꞌa zuhiꞌaziꞌeteꞌe zamaḡano tutufe ariro. 14 Ubuga uꞌano, emeꞌe haḡai sauꞌanonoꞌo bohafe bufiro zu Badiꞌaꞌa emeḡe haḡai sauꞌa rae modiro.
Kerisoꞌe Hitaga Hune
15 Emeꞌe Badiꞌa horonogaꞌe mene idaḡa, rehano Ubuganiꞌa Badiꞌaꞌe iniu rae ihofeꞌohe. Aniꞌe Badiꞌa Ubuga ibiꞌa, zu Badiꞌaꞌa haḡairoteꞌe ḡauḡa niduꞌa vitizoga. 16 Mazaḡa Kerisoonoꞌo Badiꞌaꞌa adureo zu rahao radiuꞌeteꞌe ḡauḡa, horoneꞌeteꞌe zu mene horoneꞌeteꞌe ḡauḡa haḡairo. Kini inaraḡa ga gigiꞌa nunu ga zuhiꞌa inaraḡa ga ḡau inaraḡa—ḡau niduꞌaꞌe Kerisoonoꞌo haḡairo zu Keriso veize haḡairo. 17 Kerisoꞌe ḡau niduꞌa ꞌizema fureranogano ibite radiunu ebu ani uꞌano, ḡau niduꞌaꞌe zeḡezeḡe iḡurio tiburu gaue radiuꞌohe. 18 Keriso ahiriꞌe ekalesia, ebu aniꞌe ekalesia vadiga. Ḡadaheḡano ḡau niduꞌa ani mazaonoꞌo fureraro, ebu aniꞌe rune azaḡa boꞌaḡano ibite ḡabodiroteꞌe vazeḡa ibiꞌa. ꞌOugadu aniꞌe ḡau niduꞌa zuhiꞌaziꞌeteꞌe vazeḡa reiro. 19 Badiꞌaꞌe ane iraḡa niduꞌa Keriso zamaḡano radoga uratiro. 20 Badiꞌaꞌa Keriso uꞌano ḡau niduꞌa ane teite bare unihoga uratiro. Ebu Kerisoꞌa satauro rana ruḡa soniroteꞌeanoꞌo, adureo zu rahao ḡau niduꞌaꞌe Badiꞌa teite uniho manoḡa haḡaeꞌeteꞌe ibiḡa bohaniro.
21 Zaꞌe ibite haḡaize sauꞌa uꞌano, Badiꞌa mazaonoꞌo fararo ebu zamaronezeo Badiꞌa agiroharo. 22 Rehano Kerisoꞌa vaze ahirio fureranadu satauro rana rudaroteꞌe uꞌano, izidi Badiꞌaꞌe zae teite bare unihiro. ꞌOugadu Badiꞌa ubumao zaꞌe zaḡoḡa zu toraga oꞌoꞌa zu veꞌoḡa oꞌoꞌa reiro ꞌahine, Kerisoꞌa Badiꞌa zamao za ohoziro. 23 Eꞌe uꞌano, zaeꞌa ꞌaune fie onamiꞌuma zu edau gigaraꞌuma. Ebu hari manoḡa igiroteꞌe madaḡano Badiꞌaꞌa ḡoitoriroteꞌe manohugaḡa guhineꞌenaꞌa zamaze obone giganiꞌuma. Eꞌe hariḡa manoḡaꞌe habaꞌahabaꞌa azaḡa niduꞌa mazao harame onamiro, ebu eḡe, Pauloꞌe hari manoḡa aꞌe harameꞌeteꞌe tuḡureḡa vazeḡa reiro.
Pauloꞌa Ekalesia veize Gauiro
24 Izidi e zae mazao hari manoḡa haramiroteꞌe uꞌano aduga hideꞌeteꞌe moneo matuꞌeꞌohe. Ebu Kerisoꞌa ane ahiri raꞌeteꞌe ekalesiaḡa veize hidiroteꞌe adugaḡaꞌe eḡe zuni eḡe ahiri rana teadu eꞌa hiditeꞌe adugaḡa niduꞌa hideꞌeteꞌe uꞌano matuꞌeꞌohe. 25 Eꞌe Badiꞌaꞌa ekalesia danazeꞌeteꞌe tuḡureḡa vazeḡano ohohiro. Aniꞌa ane ḡoere niduꞌa zae veize faifaine ihozeꞌeteꞌe gauḡa eḡe iniro. 26 Badiꞌa ḡoere ꞌuꞌuru tirotaꞌaꞌe amahi hune azaḡa niduꞌa mazao Badiꞌaꞌa mene rae fureniro, rehano izidi madaḡano ane mone azaḡa mazao rae fureniro. 27 Badiꞌaꞌa ibite ꞌuꞌuru tiroteꞌe ḡoeꞌaꞌe Iuda mene azaḡa boꞌaḡano fureniro ebu aꞌe ḡihiꞌa hune rae ze ederiro. Eꞌe moneo aniꞌa ane mone azaḡa mazao zuni ihoziꞌuma rae toganiro. Ibite ꞌuꞌuru tiroteꞌe ḡauḡaꞌe Keriso, zu aniꞌe zae zamao radiuꞌohe. Eꞌanoꞌo Badiꞌa ḡihiꞌaḡa hune teige, aniꞌa zae zuni mae ḡihiziꞌuma.
28 Emeꞌa zamarone huhuzaḡa niduꞌa hina vaze niduꞌa iraduguzeꞌenaꞌa zu ihozeꞌenaꞌa, Keriso moneo haramoziniꞌohe. Aꞌe, vaze niduꞌa Keriso teite tiburaroteꞌe uꞌano veꞌoḡa oꞌoꞌa radu Badiꞌa zamao ohozoga veize raꞌohe. 29 Eꞌe veize, eḡe zamao Keriso inaraḡaniꞌa gigaru gauadu eḡeꞌa ḡihau inare gaueꞌohe.