1 Eꞌanoꞌo nego nabudi, Zuhiꞌa Boro mazao fiadu edau gigaranoꞌi! Eꞌe za zamare rudauꞌohe zu giazihi raꞌohe. Ebu zaꞌe eḡe matuꞌohiꞌohe, zu eḡeꞌa niguzeꞌeteꞌe azaḡa.

2 Euodia zu Sintike, e za umizeꞌohe, zaꞌe Zuhiꞌa Boro moneo reiroteꞌe azaḡa bobo zamaze tibunoꞌi. 3 Eḡe teite gau tibano gauꞌe huneꞌeteꞌe vazeḡa, ḡaꞌa roḡae aheu eꞌe danaziteꞌe eḡeꞌa umieꞌohe. Zeꞌe hari manoḡa haramoga veize eḡe teite inare gauido. Zeꞌe Kelemenito zu eḡe teite gauidoteꞌe azaḡa nunu teite gauido. Ebu zeḡe niduꞌa niꞌe Badiꞌaꞌa ḡabone bukaḡano mirihiro.

4 E bare bare ꞌahige raꞌohe: Mada niduꞌa Zuhiꞌa Boroꞌa zae veize haḡairoteꞌe zamaradu matuꞌoꞌi! 5 Vaze mazao roḡeru radoꞌi, vaze niduꞌaꞌa zaꞌe roḡeḡa rae horozoga. Za ꞌadi zamaroꞌi! Zuhiꞌa Boroꞌe ꞌariga bare onaeꞌohe.

6 Ḡau ni ꞌahoga moneo zamaze ꞌago adudanoꞌi! Rehano naginiꞌa fureranoꞌidene, eꞌe ḡauḡa niduꞌaꞌe Badiꞌa mazao umidoꞌi! Ebu za kuranoꞌidene iḡaiḡa Badiꞌa Mazao manoḡa tauḡi roꞌi! 7 Ebu Badiꞌaꞌa zama roḡeḡa ziniꞌuma, eꞌanoꞌo zamazeꞌe mene adudaꞌuma zu mene rihaꞌuma, mazaḡa zaꞌe Keriso Iesu teite tiburaro ꞌahine. Zama roḡeḡa aꞌaꞌe boro bagaḡa zu hoeꞌaḡa, vazeꞌa zamaroga zu mene idaḡa.

8 Nego nabudi, ḡoere ḡonagano ꞌahige reihi! Haḡai ꞌahiguḡa zamare onamoꞌi! Huga ḡoereꞌeteꞌe haḡaiḡa, gubatiteꞌeteꞌe haḡaiḡa, haḡai duduḡa, zama deheḡa haḡaiḡa, vazeꞌa matuiꞌuma haḡaiḡa manoḡa zu vazeꞌa rae ḡihiniꞌuma haḡaiḡa manoḡa. Nagi haḡai manoḡa tauḡi ga vazeꞌa niguniꞌuma haḡaiḡa manoḡa horonoꞌidene eꞌe zamareꞌenoꞌi! 9 Zaeꞌa eḡe mazaonoꞌo ederiroteꞌe, zu meiroteꞌe, zu igiroteꞌe ḡoeꞌa niduꞌa, zu eḡe haḡaio horoniroteꞌe haḡaiḡa niduꞌa, zae radone zamaḡano haḡaoꞌi! Ebu zama roḡeḡa rifeꞌeteꞌe Badiꞌaḡaniꞌa zae teite radiuꞌeꞌuma.

10 Eꞌe Zuhiꞌa Boro mazao matuꞌe rudauꞌohe, mazaḡa faḡa hune radateꞌe enogano, za bare eḡe zamaradu eḡe ferehidoteꞌe ḡauḡa tuḡurodo. E edeḡa, za hube uratinu rehano, danaheꞌeteꞌe ibiḡa mene hidiro. 11 E ḡau nuꞌa fereheꞌeteꞌe uꞌano, ꞌouge mene raꞌohe. Mazaḡa eḡe mazao naginiꞌa fureraune, aꞌe ḡauꞌa fereheꞌe ga mene, rehano e edereha zamaheꞌe idaḡa daꞌo. 12 E edeḡa, ḡau oꞌoꞌa zamaḡano radiuꞌeteꞌe radoneḡa, ga ḡau ḡehaḡa zamaḡano radiuꞌeteꞌe radoneḡa. Radone nagiga zamaḡano zuni, eꞌe matuꞌe radoga ederiro, ogomu ḡehaḡa ga oꞌoꞌa, ḡau ḡehaḡa ga oꞌoꞌa. 13 Eꞌe, radone nagigano zu ḡau niduꞌa haḡaoga idaḡa, mazaḡa Kerisoꞌa inaraḡa iniꞌe ꞌahine. 14 Rehano e ꞌada aduga hideꞌeteꞌea, zaeꞌa danaheꞌetaꞌaꞌe manoḡa tauḡi.

15 Filipi azaḡa, za edeḡa, zaeꞌa hari manoḡa ḡadaheḡano igiroteꞌe madaḡano bone, e, zae haba Makedoniaonoꞌo iḡunirotene, zae Filipi ekalesia azaḡaniꞌa daꞌo ḡau nu iniꞌenaꞌa danahiro, u neḡa ꞌahoga ꞌahoga ekalesiaḡa azaḡaꞌe mene ꞌougiro. 16 Eḡeꞌa Tesalonika neḡano radiunuteꞌe zamaḡano zuni, e ḡauꞌa ferehinutene, za eḡe veize bare bare ḡau tuḡurido. 17 Eꞌe zaeꞌa ḡau nu bare tuḡuronoga veize ꞌahige mene raꞌohe. Rehano zaeꞌa danahe onamadu, Badiꞌaꞌa naeḡa ziniteꞌeꞌa bororanoga urateꞌohe. 18 Eꞌe fereheꞌeteꞌe ḡauḡa niduꞌa ꞌada. Aꞌe boro bagaḡa. Zaeꞌa eḡe veize tuḡuriroteꞌe ḡauḡa, Epaforoditoꞌa odohe onairotene, ḡauheꞌa ḡehararo. Zaeꞌa tuḡuriroteꞌe ḡauḡaꞌe Badiꞌa ḡahunohauꞌeteꞌe hohoḡa manoḡa heuḡa. Aꞌe Badiꞌaꞌa mae ḡihineꞌohe, zu matuꞌeꞌohe. 19 Eḡe Badiꞌaꞌa, ane ḡauḡa ḡehaḡa bagaḡaonoꞌo, Keriso Iesu uꞌano borofe ziniꞌuma, ḡauzeꞌa ferezeꞌeteꞌe madaḡano.

20 Emeḡe Badiꞌa, emeḡe Mama niguneꞌenoꞌi, onamo tuḡutuḡu! Hube hube hune ꞌougoꞌi!

21 Iesu Keriso mazao fieꞌeteꞌe azaḡa niduꞌa veize uhiu tuḡureꞌohe. Zuhiꞌa Boro mone raꞌeteꞌe azaḡa eḡe teite ꞌada radiuꞌeteꞌeꞌa uhiu tuḡureꞌohe. 22 Adao Badiꞌa veize raꞌeteꞌe azaḡa niduꞌaꞌa zae veize uhiu tuḡureꞌohe. Roma zuhiꞌaḡa*Niga, Kaisara neo Badiꞌa mone raꞌeteꞌe azaḡa zuni uhiu tuḡureꞌohe.

23 Zuhiꞌa Boro Iesu Keriso ḡahunone manoḡaniꞌa zae vine teite radiuꞌenoꞌi!