1 Eꞌe madaḡano, vaze ḡuḡuvaḡaniꞌa nuꞌoraro ꞌahine, odaze rana edaro. Ebu Iesuꞌa ane tahiꞌatahiꞌa ibite ziro, raenaꞌa, “Farisea azaḡa haḡaize ḡianoꞌi! Mazaḡa zeꞌe zama guhi azaḡa ebu Isiti heuḡa. 2 Rehano izidi ꞌuꞌuruḡa ḡauꞌa niduꞌa Badiꞌaꞌa furene hauḡiꞌuma. 3 Eꞌanoꞌo ohere nagini sifu raꞌeteꞌe ḡoeꞌa niduꞌa hunio agao igiꞌuma. Ebu bazuni neḡa zamaḡano nagini gumude raꞌeteꞌe ḡoeꞌa niduꞌa vazeꞌa egoga veize ne binuḡa hitaganonoꞌo haramiꞌuma.

4 Nego nabudi, egoꞌi, e hube hune ziꞌohe! Ahiri mauꞌeteꞌe azaḡa ago rihozoꞌi, mazaḡa ze ahiri daꞌo mauꞌohe rehano, vine sausaunogaꞌe mene idaraꞌuma. 5 U rihoniꞌuma vazeḡaꞌe Badiꞌa daꞌo! Mazaḡa aniꞌe vaze manadu ire rogao mae feuzeꞌeteꞌe gigiꞌaḡaꞌe obone tiꞌohe. Hube hune ani daꞌo rihoniꞌuma!

6 Vazeꞌe tiburi niniḡa fuꞌo moni komeꞌa*Girikio, 'Assaria aheu', moni komeꞌa hina hoiteꞌohe. Zeꞌe mene ḡau boro, rehano Badiꞌaꞌa eꞌe tibuhuga ramo mene agutu modeꞌohe. 7 Badiꞌaꞌa zae zamaradu vadini iguḡa niduꞌa nuguꞌe edeḡa. Eꞌano ago rihanoꞌi, mazaḡa zaꞌe Badiꞌa ubumao tiburi niniḡa vitinoga.

8 Ḡianoꞌi! E hube hune ziꞌohe. Iniuꞌa vaze ubumao raenaꞌa, 'Eꞌe Iesu mone,' rae reine, eḡe, Vaze Ubuganiꞌa ani zu Badiꞌa tuḡure viga ubumao raenaꞌa, 'Vaze adiꞌe eḡe none,' reꞌuma. 9 Ebu iniuꞌa vaze ubumao e rae oꞌohine, eḡe zu Badiꞌa tuḡure viga ubumao ani rae oꞌoniꞌuma. 10 Iniuꞌa eḡe, Vaze Ubuga rae sausauhine, Badiꞌaꞌa ani sauꞌa rae modohaꞌuma. U iniuꞌa Vine Zaḡoḡa rae sausaunine, ani sauꞌaꞌe mene rae modohaꞌuma.

11 Zaꞌe e hegoteꞌeteꞌe uꞌano, kota veize tutuze onamadu nuꞌonuꞌo neḡa, zuhiꞌaḡa zu ḡihiꞌaḡa azaḡa zamao ohozoꞌidene, nouge za biriꞌuma zu nouge rae ḡoeriꞌuma moneo ago zamare adaꞌadoꞌi, 12 mazaḡa za edanadu nouge rae ḡoeriteꞌe moneo Vine Zaḡoḡꞌaniꞌa ihoziꞌuma.”

13 Vaze ꞌahoganiꞌa vaze ḡuḡuvaḡa boꞌaḡanonoꞌo Iesu niro, raenaꞌa, “Ihore vazeḡa, mamafeꞌa mode rudaroteꞌe toheḡa nu rovonadu naeḡa eḡe enoga veize negohe noꞌi!” 14 Iesuꞌa naenaeninaꞌa, “Nego, vaze ꞌahoganiꞌa toheze ḡahugeꞌeteꞌe haḡaiḡa veize e mene ohohiro.” 15 Ebu Iesuꞌa ziro, raenaꞌa, “Za ununu haḡaiḡa mene haḡaifine, zamaze giganoꞌi! Mazaḡa vazeꞌa tohe ḡehaḡaonoꞌo ḡabone mene hideꞌohe.”

16 Ebu ze hari ꞌahige idaniro, raenaꞌa, “Maꞌora vazeḡa ꞌahogaꞌe mebaḡano ogomu manomanoꞌa hudaro. 17 Eꞌanoꞌo ani aneꞌa bare zamariro, raenaꞌa, 'E ogomuhe godoḡoga neḡaꞌe oꞌoꞌa. E nagini haḡaiꞌuma?' 18 Ebu ani raenaꞌa, 'E ꞌadigine manoḡa! Ogomu tiꞌeteꞌe neḡa ibiꞌaꞌe fahadu boro iziga ogoratihi ebu ogomuhe zu tohehe niduꞌa eꞌea zouniꞌuma.' 19 Ebu ani ane bare raenaꞌa, ꞌE muri faḡa radiu onamite veize ogomu boro hune ruhibe teha. Eꞌanoꞌo eꞌe ogauꞌenaꞌa zu gageꞌenaꞌa matuꞌe onamiꞌuma!' 20 Rehano Badiꞌaꞌa niro, raenaꞌa, 'Ḡaꞌe mene huhuzaḡa! Eḡeꞌa izidi ohere ḡae ḡabone mae vaginine, ḡaꞌa ruhibateꞌe toheꞌe iniuꞌa meꞌuma?'”

21 Iesuꞌa ḡoere ḡonagano reiro, raenaꞌa, “Deꞌeguḡa vazeḡaꞌe ane tohe daꞌo ruhibeꞌohe, rehano Badiꞌa moneo aniꞌe mene maꞌora vazeḡa raꞌohe.”

22 Ebu Iesuꞌa ane tahiꞌatahiꞌa ziro, raenaꞌa, “Eꞌanoꞌo e ziꞌohe. Zae ḡabone veize nagi ogomu aꞌuma ga ahirize veize nagi dabua vidiꞌuma rae ago zamare adudanoꞌi! 23 Mazaḡa ḡabone zu ahiriꞌ e ogomu zu dabua vitinoga. 24 Nugo gaoza zamaroꞌi! Ze ezone mene ḡorauꞌohe zu mene hiriveꞌohe. Ogomuze nuꞌoneꞌeteꞌe habaꞌa zu oꞌoꞌa, rehano Badiꞌaꞌa ḡubuzeꞌohe. Zaꞌe nini vitize huneꞌohe! 25 Zae boꞌaḡano iniuꞌe zamare adudaune, ḡaboneꞌa tahiḡa zuni faraꞌumahe? Mene! 26 Ḡau komeꞌa eꞌe haḡaoga zu mene idaḡa reine, za nougadu ḡau ꞌahoga veize zamare aduduꞌohe?

27 Butu kakaḡaꞌe nougenouge ḡuhureꞌeteꞌe ḡianoꞌi! Ze mene gaueꞌohe ga dabuaze mene turineꞌohe. Rehano e ziꞌohe, butu kakaḡa ꞌahogaꞌe maꞌora vazeḡa kini Solomonaꞌa haḡairoteꞌe dabuaḡa manomano vitinoga. 28 Ebu butu veḡaꞌe izidi ḡaboga, hena ohoḡoreꞌe vazeꞌa masinadu ireo hufi hauniꞌuma, rehano Badiꞌaꞌa faifaine manohuniꞌohe. Zaꞌe ve vitinoga, eꞌanoꞌo Badiꞌaꞌa hubehune dabua vidauziniꞌuma. Rehano zaꞌe Badiꞌa mazao mene borofe fieꞌohe! 29 Nagini aꞌuma zu gagiꞌuma rae ago zamare adudanoꞌi! 30 Mazaḡa Badiꞌa aḡuꞌa azaḡaꞌa ꞌahiguḡa niduꞌa vaḡeꞌohe, rehano Mozeꞌe zaꞌa eꞌe ḡauḡa urateꞌetaꞌe edeḡa. 31 ꞌOugine Badiꞌaꞌa ibitoziniꞌeteꞌe vaḡoꞌi, ebu eꞌe ḡauga niduꞌa zuni ziniꞌuma!

32 Eꞌanoꞌo zaꞌe, mamoe komeꞌa komeꞌa heuḡa, ago rihanoꞌi, mazaḡa aneꞌa ibitohauꞌeteꞌe habaꞌa zinifine, Moze ani matuꞌe rudauꞌohe. 33 Ebu toheze seronadu moniḡaꞌe zahara azaḡa zenoꞌi! ꞌOugine mene zigaꞌuma tunahuḡano toheze nuꞌoneꞌeteꞌe teige, toheze adureo nuꞌoniꞌuma. Eꞌea tine, mene hauḡiꞌuma ebu deꞌeaꞌe ḡonore zu zuhiꞌa mene sausauniꞌuma. 34 Mazaḡa zaꞌa toheze nouma tine, zamaroneze zu deꞌea tiꞌuma.”

35 Iesuꞌa ziro, raenaꞌa, “Zaꞌe, tuḡure azaḡa teige, gau dabuaḡa haḡae ruhibe radoꞌi, ebu ihureze zu agane modoꞌi! 36 Ebu zuhiꞌaze hahu muiḡanonoꞌo ne uꞌa bare feuradu ibihetao toketokerine ibiheta ḡarihe vavaꞌeꞌeteꞌe teige, Zuhiꞌa Boroꞌa onaiteꞌe veize ruhiboꞌi! 37 Zuhiꞌazeꞌa bare onaadu tuḡure azaḡaꞌe ani guhine radiuꞌenaꞌa ruhibeꞌeteꞌe horozine, ani matuꞌo zenadu manohuga ziniꞌuma. E hube hune ziꞌohe, zuhiꞌazeꞌa gau dabuaḡa vidanadu ogauꞌeteꞌe fataḡano ohozadu ogomu ziniꞌuma. 38 Ebu zuhiꞌazeꞌa ohere ga uzeuze feuradu tuḡure azaḡaniꞌa ani guhine radiuꞌeteꞌe horozine, matuꞌo zenadu manohuga ziniꞌuma.

39 Zaꞌe ꞌadi zamaroꞌi! Vaze ꞌahoganiꞌa ḡonore vazeḡaꞌe noꞌe madaḡano ani ne onaiꞌuma rae ederine, ḡonore vazeḡaꞌe diuḡoga mene idarafine, aniꞌe neḡa faine taufiꞌuma. 40 Eꞌanoꞌo zae zuni ruhibe radoꞌi, mazaḡa eḡe, Vaze Ubugaꞌe zaꞌa mene edereꞌeteꞌe madaḡano bare onaiꞌuma.”

41 Ebu Peteroꞌa niro, raenaꞌa, “Zuhiꞌa Boro, ḡaeꞌa hari ꞌadiꞌe emeḡe veize daꞌo ga vaze niduꞌa veize zuni idaneꞌohe?” 42 Zuhiꞌa Boroꞌa naenaeninaꞌa, “Eꞌe iniu huhuzaḡa zu zama tibano gauꞌeteꞌe azaḡa ziꞌohe. Tuḡure vazeḡa ꞌahogaꞌe huhuzaḡa zu zama tibano gauine, zuhiꞌaꞌe ani teite matuꞌiꞌuma. Ebu vaze eꞌe tuḡure azaḡa ḡihiꞌaḡa mae ohonadu ꞌahige reꞌuma, raenaꞌa, 'Tuḡure azaḡa niduꞌa taufoꞌi! Ogomuze zuni mada idunane zenoꞌi!' ꞌOugadu aniꞌe onamiꞌuma. 43 Tuḡure vazeḡaꞌe ꞌouge gauine zu zuhiꞌaḡaniꞌa bare feuradu horonine, ani matuadu manohuga haꞌuma. 44 E hube hune ziꞌohe, aniꞌe zuhiꞌaḡaniꞌa ane tohe niduꞌa taufeꞌeteꞌe vazeḡano ohoniꞌuma.

45 Rehano tuḡure vazeḡaꞌe aneꞌa bare raenaꞌa, 'E zuhiꞌaꞌe vehuꞌu faḡanobuꞌu onaiꞌuma,' rae zamaradu tuḡureḡa azaḡa niduꞌa bouzine zu ufeta ogau gage baboraune, 46 zuhiꞌaḡaꞌe, aneꞌa mene edereꞌeteꞌe madaḡano bare onaadu aduga boro haꞌuma ebu zama tibano mene gauiroteꞌe azaḡaniꞌa radiuꞌeteꞌe habaꞌano ohoniꞌuma. 47 Tuḡure vazeḡaꞌe ane zuhiꞌaꞌa nagini urateꞌeteꞌe haḡaiḡa edeḡa rehano, mene ruhibine zu haḡaiḡa mene haḡaine, aniꞌe boune sausauniꞌuma. 48 U tuḡure vazeḡaꞌe ane zuhiꞌa ura mene ederadu veꞌoḡa haḡaine, aniꞌe faꞌone tauḡiꞌuma. Iniuꞌe Badiꞌa mazaonoꞌo manohuga boro hidine, Badiꞌaꞌa ani gau boro haḡaoga uratiꞌuma.

49 Iesuꞌa bare ziro, raenaꞌa, “Eḡeꞌa raha ꞌadi hufoga radu ire roga mae onairo. Ebu ire rogaꞌe amahi raha ꞌadi iri radiune matuꞌiꞌuma. 50 Rehano e aduga hiditeꞌe bapatizoḡa ꞌahoga meꞌuma zu zamaheꞌe aduga onamo ḡonaga meꞌuma. 51 Zaꞌa zamareꞌetene, eḡeꞌa raha ꞌadi uniho manoḡa mae ovairo ga? Mene! Eḡeꞌa rovoze ḡuzuhoga veize ovairo. 52 Izidionoꞌo onamo zama moneo ne azaḡaꞌe rovotiꞌuma, mazaḡa nuꞌe eḡe mazao fieꞌohe, u nuꞌe mene fieꞌohe. Ne eꞌe azaḡaꞌe fuꞌo reine, zeḡe boꞌaḡano rovotadu uḡiduꞌa ꞌaheu teiteagiretitiꞌuma, ga ꞌaheuꞌa uḡidu teite agiretitiꞌuma. 53 Aꞌe moganiꞌa ubuga teite agiretitiꞌuma ga ubuganiꞌa moga teite agiretitiꞌuma. Ebu viꞌaniꞌa aboḡa teite agiretitiꞌuma ga aboḡaniꞌa viꞌa teite agiretitiꞌuma. Ebu viꞌaniꞌa ubuga inuga teite agiretitiꞌuma ga ubuga inuganiꞌa iꞌa viꞌa teite agiretitiꞌuma.”

54 Iesuꞌa vaze ḡuḡuvaḡa ziro, raenaꞌa, “Ḡozeꞌa ḡutanoga horoneꞌetene†Girikio, 'Mada zubureꞌeteꞌe moneo ḡozeꞌa iteꞌetene', zaꞌa raenaꞌa, 'Iruguꞌa ruꞌaꞌuma.' A hube, iruguꞌa ruꞌaꞌuma. 55 Ebu ohere ḡozeꞌa bororanadu nahuduꞌetene‡Girikio, 'Za ḡuzuꞌonoꞌo zavara horoneꞌetene', zaꞌa raenaꞌa, 'Madaꞌa hiaꞌuma.' A hube, madaꞌa hiaꞌuma. 56 Zae, zama guhi azaḡa! Adure zu raha iraḡa horoneꞌetene naginiꞌa fureraꞌuma zae edeḡa. U izidi madaḡano naginiꞌa fureru radiuꞌeteꞌe mene faine zamare horoneꞌohe.

57 Zaeꞌa zae bare naginiꞌe haḡai duduḡa rae mene edereꞌohe. 58 E hari ꞌahoga idaniꞌuma. Ḡaꞌe vaze ꞌahoga moni madu mene bare haune, aniꞌa ḡae kotao ohoꞌihi radu ani teite onamiꞌuma. Eꞌe zamaḡano ḡanine ge ibio uniho manofoꞌi! Mene ꞌougine, aniꞌa ḡa kota ibitohauꞌeteꞌe vazeḡa ꞌevorao ohoꞌiꞌuma, ebu ḡuꞌa neḡa taufeꞌeteꞌe vazeḡa evorao ohoꞌadu ḡuꞌa neḡano ohoꞌiꞌuma. 59 E hube hune ḡaꞌohe, ḡa mene buaꞌuma onamo ḡaeꞌa ani moni niduꞌa bare haꞌuma.”