1 Eꞌe madaḡano vaze nuꞌe Iesu vaḡe aradu niro, raenaꞌa, “Galilea azaḡa nuꞌe Badiꞌa dibuo hau radiuꞌeteꞌe zamaḡano Pilato, Roma gavana vazeḡa, aniꞌa uti azaḡa nu tuḡuzadu ze zemeha.” 2 Iesuꞌa naenaeziro, raenaꞌa, “Zaꞌa zamareꞌetene, ze sauꞌaꞌe Galilea azaḡa nu omo sauꞌa roꞌanoga ꞌahine, ꞌouge rudaneha rae raꞌohe? 3 Mene! Eḡeꞌa ziꞌohe, zaꞌe zae sauꞌanonoꞌo mene ḡihurine, zae zuni zeḡe teige ꞌouge rudaꞌuma. 4 Ebu za edeḡa, Siloami habaꞌano ne hitaganiꞌa fahanadu vaze 18 rudaro. Zaꞌa zamaretene, ze sauꞌaꞌe Ierusalema azaḡa niduꞌa sauꞌa roꞌanoga rae raꞌohe? 5 Mene! Eḡeꞌa ziꞌohe, zaꞌe zae sauꞌanonoꞌo mene ḡihurine, zae zuni ꞌouge rudaꞌuma.”

6 Ebu Iesuꞌa hari ꞌahoga idaniro. “Vaze ꞌahoganiꞌa vaini nebaḡano figi ireḡa ḡoraro. Eꞌe enogano, aniꞌa huga nu reꞌoga veize onairo, rehano hugaꞌe oꞌoꞌa. 7 Eꞌanoꞌo neba ḡianeꞌeteꞌe vazeḡa niro, raenaꞌa, 'E muri uḡidu zamaḡano huga reꞌoga veize ona rehano, huga ni ꞌahoga mene horoneha. Eꞌanoꞌo udi higonoꞌi, mazaḡa haba irivaꞌone taugeꞌohe!' 8 Ebu neba ḡianeꞌeteꞌe vazeḡaniꞌa naenaeninaꞌa, “Eḡe zuhiꞌa, ge muri tiba modoꞌi! Eḡeꞌa mazaḡano busi mumuḡa teadu ḡianiꞌuma. 9 ꞌOugadu muri tiba zamaḡano hudaune manoḡa, u mene hudanoꞌidene, udi higonoꞌi!'”

10 Bana Madaḡa ꞌahogano Iesuꞌe nuꞌonuꞌo neḡano Badiꞌa ḡoere ihoze radiunu. 11 Eꞌea roḡae ꞌahoganiꞌa radiunu. Vine sauꞌaꞌa ani ragano radu ḡaruga mae beonadu muri 18 mene edau faraunu. 12 Iesuꞌa ani horonirotene, hunadu Iesu vaḡe onairo. Ebu Iesu niro, raenaꞌa, “Roḡae, ḡa ugi ꞌai manoreha.” 13 Iesuꞌa ꞌevoꞌa ane rana trio, ebu aniꞌa zogone edau fararo zu Badiꞌa matuꞌoharo.

14 Rehano nuꞌonuꞌo neḡa ḡianeꞌeteꞌe ḡihiꞌaꞌe maḡuniro, mazaḡa Iesuꞌa Bana Madaḡano ugi roḡaeḡa fainiro. Aniꞌe vaze ziro, raenaꞌa, “Eme mada 6 zamaḡano gauiꞌuma. Eꞌanoꞌo ugi azaḡaꞌe eꞌe madaḡano aradu faiziꞌuma, mene Bana Madaḡano!”

15 Ebu Zuhiꞌa Boroꞌa naenaeziro, raenaꞌa, “Zama guhi azaḡa! Zaꞌe Bana Madaḡa madaḡano boromakau zu donikize vu gagoga veize maḡuonoꞌo fuiꞌe buzeꞌohe. 16 Eꞌe teige, Sataniꞌa roḡae ꞌadi, Aberahamo mariga, muri 18 ogoru tiro, ebu eḡeꞌa Bana Madaḡano ꞌouge fuiꞌe modiro. Eꞌe haḡai duduḡa haḡaeha!”

17 Ani ꞌouge reirotene, maḡunoharoteꞌe azaḡa niduꞌaꞌe mazagaroziro, u vaze ḡuḡuvaḡa niduꞌaꞌe, aneꞌa haḡai manomano niduꞌa haḡairoteꞌe uꞌano, matuꞌiro.

18 Ebu Iesuꞌa zinaꞌa, “Badiꞌaꞌa ibitoziniꞌetaꞌe nagini heuḡa? Nagini hina idaniꞌuma? 19 Aꞌe Guava*Girikio, Fufu maḡa komeꞌa tiba vazeꞌa madu nebaḡano ḡorauꞌeteꞌe heuḡa. Ebu ḡuhure ire boro radu niniꞌa rafiu are ezagano kamadu neḡa ogoraꞌuma.

20 Iesuꞌa bare zinaꞌa, “Badiꞌaꞌa ibitoziniꞌetaꞌaꞌe nagini hina rae idaniꞌuma? 21 Aꞌe isiti heuḡa. Roḡaeꞌa isiti tahiḡa madu uvahuḡa ḡehaḡa teite mirune tibuneꞌohe onamo ꞌuvahu niduꞌa miniꞌohe.”

22 Iesuꞌe Ierusalema habaꞌa onameꞌenaꞌa, habaꞌa habaꞌano zu neḡa neḡano ihoze onaminu. 23 Ebu vaze ꞌahoganiꞌa ḡadiniro, raenaꞌa, “Zuhiꞌa Boro, Badiꞌaꞌa vaze nuꞌa daꞌo sauꞌazeꞌonoꞌo ḡaboziꞌumahe?” Iesuꞌa naenaeziro, raenaꞌa, 24 “Ḡabone tuḡutuḡu ibiḡa diuḡihi roidene, ibiheta kokosiꞌano diuḡoꞌi! Eḡeꞌa ziꞌohe, eꞌe diuḡoga veize inare gauoꞌi, mazaḡa vaze ḡehaḡaꞌe eꞌe diuḡihi raꞌohe rehano, mene idaraꞌuma! 25 Ne vazeḡaniꞌa edanadu ibiheta haraune, zaꞌe enonao edanadu toketokeriꞌuma, raenaꞌa, 'Zuhiꞌa Boro, ibiheta vavaꞌoꞌi!' Rehano ani naenaeziꞌuma, raenaꞌa, 'E za noumaonoꞌo onataꞌe aḡuꞌa.' 26 Ebu za ꞌai reꞌuma, raenaꞌa, 'Eme ḡae teite ogau tiburaunu zu ḡaꞌe emeḡe ne ibiḡano ihofinu, eꞌanoꞌo ḡaꞌe eme edeḡa!' 27 Rehano ani naenaeziꞌuma, raenaꞌa, 'Zaꞌe noumanoꞌo onataꞌe e aḡuꞌa. Za haḡai sauꞌa azaḡa, eḡe mazaonoꞌo vaḡinoꞌi!'

28 Ebu Badiꞌaꞌa ibitohauꞌeteꞌe zamaḡano Aberahamo, Isako, Iakobo zu peroveta azaḡa niduꞌaniꞌa radiuꞌeteꞌe horoziꞌuma, u zaꞌe enona beꞌa ḡiaze mode tauḡiꞌuma. Ebu zaꞌe niaꞌuma zu maḡunadu ḡononeze atitiꞌuma. 29 Iuda mene azaḡaniꞌa naenaeonoꞌo onadu Badiꞌaꞌa ibitohauꞌeteꞌe zamaḡano ehoradu ogau tiburaꞌuma. 30 Ḡianoꞌi! Ibiteꞌeteꞌe azaḡaꞌe vesiꞌuma, ebu vesiꞌeteꞌe azaḡaꞌe ibitiꞌuma.

31 Eꞌe madaḡano Farisea azaḡa nuꞌa Iesu vaḡe onadu niro, raenaꞌa, “ꞌAdanoꞌo vaḡinadu haba ꞌahoga onamoꞌi, mazaḡa kini Herodaꞌe ḡa ḡamihi raꞌohe!” 32 Iesuꞌa naenaeziro, raenaꞌa, “Aniꞌe butu ḡuniḡa soꞌosoꞌoḡa heuḡa. Ani onamadu ꞌahige noꞌi, 'E mada mene faḡano vine sauꞌa hegoze buziꞌuma zu ugi azaḡa faiziꞌuma, ebu hena eḡe gau niduꞌa haḡae hauḡiꞌuma. 33 Naginiꞌa eḡe mazao fureraꞌuma rehano, eꞌe izidi oname madaḡano Ierusalema habaꞌa onamiꞌuma. Mazaḡa peroveta azaḡaꞌe Ierusalema habaꞌa enogano mene rudaꞌuma.

34 O, Ierusalema azaḡa, Ierusalema azaḡa! Zaeꞌa peroveta azaḡa zimiro zu Badiꞌaꞌa tuḡuziroteꞌe azaḡa hadi hina zimi ruziro. Kokorokuꞌa isaḡa zamaḡano ubuga gugubeꞌeteꞌe teige, eꞌe mada ḡehaḡa zae taufihi reiro, rehano zaꞌe mene uratinu! 35 Eꞌanoꞌo ḡianoꞌi, neze fahiꞌuma! Ebu zaꞌe eḡe mene bare horohiꞌuma onamo zaeꞌa raenaꞌa, 'Zuhiꞌa Boro niḡano onaeꞌeteꞌe vazeḡa mae ḡihinoꞌi!'”