2
Kraist maripoonoŋ komurotiwaa qaaya jewe.
1 Uumeleeŋ alauruna, niinoŋ oŋoonoŋ kaŋ Anutuwaa kania naŋgoŋ jeŋ asariŋ oŋombeti, ii qaana naaŋ siiŋsiiŋawo koloowaatiwaajoŋ mende jeŋ laligowe me balombaa momakooto uuta qendeema iikanoŋ selena mende meŋ uma laligowe. 2 Niinoŋ oŋoo batugianoŋ momo morota kuuya goraayanoŋ ama Jiisas Kraistwaa qaaya ano maripoonoŋ komurotiwaa kania iikayadeeŋ moma kotoŋ ii jeŋ seimambaajoŋ qaa somoŋgowe.
3 *Apo 18.9Qaa kaeŋ somoŋgoŋ oŋoonoŋ kaweti, kambaŋ iikanoŋ eja loolooria kolooŋ jenena mamaga ororo keena moma laligowe. 4 Niinoŋ Buŋa qaa jeŋ asariŋ oŋombeti, ii momakooto somataa kele qaa kanoŋ mende iŋijoŋ laligowe. Ii qaagoto, Uŋa Toroyanoŋ sololooŋ oŋono esuŋmumuyanoŋ uugianoŋ inaawaatiwaajoŋ kaparaŋ koma qaa iŋijoŋ laligowe. 5 Baloŋ ejembawaa momakootogianoŋ qaagoto, Anutuwaa ku-usuŋanoŋ nemuŋ koma oŋono moma laariwutiwaajoŋ kaparaŋ koma laligowe. Kiaŋ.
Uŋa Toroyaanoŋ momakooto ii qaita moŋ.
6 Niinoŋ kileŋ uumeleeŋ alauruna akadamugiawo laligojuti, iyoŋoo batugianoŋ rabe Anutuwaa momakootoya keemeya ii saanoŋ amiŋ momakejoŋ. Balombaa momakootoyaga mende amiŋ momakejoŋ. Baloŋa baloŋa galeŋ koma oŋoma laligogi ku-usuŋgianoŋ qaombaati, iyoŋoo momakootogia ii kaaŋagadeeŋ mende amiŋ momakejoŋ.
7 Ii qaagoto, Anutuwaa momakooto aasaŋgoya mono ii amiŋ momakejoŋ. Anutunoŋ Siwe namo mende mokolooŋ orono iikanoŋ waladeeŋ areŋa kokaeŋ ama somoŋgoro, “Ejembanoŋ kanageŋ kolooŋ akadamu mokoloowutiwaajoŋ mono momakootona qaita moŋ ii iŋisaamaŋa.” Kaeŋ jeŋ ii aasaŋgoyanoŋ ano ero. 8 Balombaa eja poŋa poŋa laligoŋ kougiti, iyoŋoonoŋga moŋnoŋ momakooto ii mende moma kotoro. Ii moma kotowuyagati eeŋ, Poŋnana asamararaŋawo ii maripoonoŋ mende qegi komunaga. 9 *Ais 64.4Momakooto qaita moŋ kawaajoŋ qaa kokaeŋ oogita eja,
“Moŋnoŋ iwoi ii jaa gejianoŋ mende iima moro. Iikawaa momoyanoŋ mombaa uutanoŋ mende kolooro moroto, ejemba Anutu uugianoŋ jopagoŋ muŋkejuti, iyoŋoojoŋ ii mono mozozoŋgoŋ anota eja.”
10 Baloŋ ejemba iwoi ii mende moma titou laligogito, Anutunoŋ ii mono Uŋaya wasiro nonoojoŋ ninisaano moniŋ. Iinoŋ qaa kuuyaa kania moŋgama mokolooŋkeja. Anutuwaa momo keemeya kaaŋagadeeŋ modaboroji, iinoŋ mono ii sololooŋ nonono moniŋ.
11 Mombaa uuta moŋnoŋ mende moja. Uutaa uŋaya iinondeeŋ mono ii moma yagoja. Kaaŋiadeeŋ Anutuwaa uuta ii moŋnoŋ mende mojato, Anutu iyaŋaa Uŋa Toroya iinondeeŋ ii moma yagoja. 12 Nononoŋ balombaa nanamemeŋ bologaa omeya moŋ mende buŋa qeŋ aoninto, Anutunoŋ iwoi kaleŋ nononoti, iikawaa kania mobombaajoŋ mono iyaŋaa Uŋaya wasiro uunananoŋ kemerota laligojoŋ.
13 Iikawaa kania keemeya ii ajorooŋ amiŋ momakejoŋ. Baloŋ ejembanoŋ momakootogiaa qaganoŋ qaa kuma nonoŋgi iikawaa so ii mende amiŋ momakejoŋ. Kaeŋ qaagoto, Uŋa Toroyanoŋ qaa kuma nononoti, iikawaa so mono uuwaa qaa hoŋa gosiniŋ sololooŋ nonono jeŋ asariŋkejoŋ. 14 Uŋa Toroyanoŋ sololooŋ nonono qaa ii kaeŋ gosijoŋi eeŋ, kania mono mokolooŋ moma asariwoŋatiwaa so kolooja. Kawaajoŋ Uŋa Toroyanoŋ daeŋ yoŋoo uugianoŋ mende laligoro eeŋ laŋ laligojuti, iyoŋonoŋ Anutu Uŋayaa buŋa ii moma aŋgoŋ kombombaajoŋ amamaaŋkeju. Yoŋonoŋ Buŋa iikawaajoŋ mogi qaa motoya kaaŋa kolooro kania moma asariwombaajoŋ amamaaju.
15 Yoŋonoŋ amamaajuto, Uŋa Toroyanoŋ sololooŋ nononji eeŋ, mono qaa kuuyaa kania gosiŋ jeŋ tegowoŋatiwaa so koloojoŋ. Kaeŋ koloojonto, uumeleeŋ ejemba mombaa kania ii baloŋ ejemba kuuyanoŋ tororo jeŋ tegowombaajoŋ amamaaŋkeju. 16 *Ais 40.13Iikawaa kania ii Buŋa Terenoŋ kokaeŋ oogita eja,
“Pombaa uumomoya ii eja moŋnoŋ moŋ mende moro.
Kawaajoŋ moŋnoŋ ii qambaŋmambaŋ mubaatiwaa so qaago.”
Moŋnoŋ ii mende moroto, nononoŋ Kraistwaa uumomoya meŋ laligojoŋ. Kiaŋ.