1 Kawaajoŋ ejemba kuuyanoŋ mono nonoojoŋ kokaeŋ mogi sokombaa: Kraistnoŋ jeŋ kotoŋ oŋono gawoŋa meŋkeju. Anutunoŋ qaaya aasaŋgoya nonono buŋanana kolooro galeŋ komakejoŋ. Nononoŋ miri galeŋaa tani kaaŋa koloojoŋ. 2 Galeŋ yoŋoo togianoŋ miri iwoiya galeŋ kombutiwaajoŋ borogianoŋ anji, iinoŋ mono qaa waŋa kokaeŋ kaparaŋ koma jeŋ kotoŋ oŋomakeja, “Gawoŋgia mono meteqetetaŋa qaa nama pondaŋ meŋ laligowu. Membiriqembiri mende ambu. Kaeŋ mokolooŋ oŋombe sokombaa.” 3 Korint oŋonoŋ me balombaa qaa jake mombaa galeŋanoŋ nii gosiŋ jeŋ tegoŋ nombuyagati eeŋ, niinoŋ mono qaa iikawaajoŋ mobe kamaaŋqeqeta totooŋ kolooja. Neeno kaaŋagadeeŋ neenaa qaana mende jeŋ tegojeŋ. 4 Uuna gosiŋ qaa moŋ mende mobe meŋ bimooŋ nonjato, iikawaajoŋ kileŋ solaŋa mende koloojeŋ. Ejembanoŋ qaagoto, Poŋnoŋ mono noo qaana gosiŋ jeŋ tegoŋ nomakeja.

5 Kawaajoŋ oŋo mono kambaŋ kokaamba mombaa qaaya moŋ ii mende jeŋ tegowu. Poŋnoŋ kambaŋa ano kaŋ kuuwaatiwaajoŋ mono mambombu. Mamboma laligogi iikanoŋ kaŋ qaa iwoi mesaŋgogita eji, ii mono asasaganoŋ isaano asuganoŋ asugiwaa. Iinoŋ kaŋ ejemba uunana meŋ asariro nanamemenanaa kanianoŋ asuganoŋ asugiro iibaa. Nanamemenanaa kania iima motomotooŋ gosiŋ nonono Anutunoŋ mono iikawaa so kambaŋ iikanoŋ mepeseeŋ nononaga.

6 Oo uumeleeŋ alauruna, oŋo juma jaba-arambaraŋ ama laŋ leelee aroŋ qeŋ nama utama aoŋkeju. Kaeŋ laligowubotiwaajoŋ mono Apoloswo noro romoŋgoŋ noroma oŋoaŋgiaa aiŋgia mesaoŋ qaa kokawaa kania moma kotowu, “Buŋa qaa oogita eji, ii mono mende uuguwu.” Qaa ii moma kotogi uugianoŋ ero teŋ koma qeaŋgowutiwaajoŋ sundunara kaeŋ oojeŋ. Ii neena ano Apolos noroo kananara gosiŋ romoŋgoŋ moma asariwutiwaajoŋ oojeŋ. Deendeeŋgianoŋ kaeŋ tegowaa.

7 Balombaa iwoi moŋnoŋ mono mende meŋ letoma gono tosaaŋa uŋuuguŋ qaita moŋ koloonaga me qaago? Ii qaago. Iwoi kuuya eŋ gonji, ii mono Anutunoŋ kaleŋ gono buŋa qeŋ aona me qaago? Ii kaleŋga buŋa qeŋ aonati eeŋ, mono naambaajoŋ kaleŋ ii qakooma selega eeŋ meŋ umakejaŋ? Ii mende sokonja.

8 Iwoi kuuya meŋ laligowombaa siiŋa mojuti, ii eŋ oŋondaboroja. Anutunoŋ Siwe kowianoŋga kaleŋa kaleŋa maama oŋono simbawoŋawo kolooju. Nononoŋ mende ilaaŋ oŋoniŋ oŋoaŋgio kileŋ momalaariwaa kiŋ poŋ kaaŋa kolooju. Oŋoaŋgiaajoŋ kaeŋ romoŋgoŋ aoju. Oo oŋanoŋ oŋo kiŋ koloogi sokonaga. Kaeŋ koloogi nononoŋ mono kaaŋagadeeŋ eja poŋurugia kolooŋ oŋoo kooroŋgianoŋ saanoŋ motooŋ selenana meŋ uma awelegoŋ aowonaga. Niinoŋ kaeŋ ambombaa siiŋa mojeŋ.

9 Niinoŋ kaeŋ mojento, ananaa kanianana iibe tani kokaeŋ kolooja: Anutunoŋ aposol nono kuuŋ nonono ejemba jaagianoŋ kamaaŋqeqeta tooŋ kolooŋ laligojoŋ. Ejemba uŋugi komuwutiwaajoŋ jeŋ tegogitiwaa tania asuganoŋ kema kaniŋ laŋ qama gamu qeŋ nonomakeju. Iwoi ii-iita qaita moŋ kolooniŋ baloŋ so yoŋoo toya ano Siwe jakeya jakeya yoŋoo poŋ qereweŋa gajoba yoŋonoŋ mono jaagianoŋ niniima kotoŋ niniigigiiŋkeju.

10 “Kraistwaajoŋ nama uuta sooro laligoji,” noojoŋ kaeŋ jeŋkejuto, oŋonoŋ Kraistwo nama momo ejemba akadamugiawo koloojutiwaa tani kolooju. Niinoŋ loolooria koloojento, oŋonoŋ “Ejemba kotiga koloojoŋ,” jeŋkeju. Ejembanoŋ oŋo goda qeŋ oŋomakejuto, noojoŋ mogi kamaaro jejewili ama nomakeju. 11 Kambaŋ koi kaaŋanoŋ kaaŋagadeeŋ nembanenewaa komuŋ apuwaajoŋ moma opo walaga junjuraŋa mouma laligoniŋ manjanoŋ laŋ nunugi duŋ mirinana qaa laligoŋ toroqeŋ kema kaŋkejoŋ.

12 *Apo 18.3Ananaa boronananoŋ seleqeqe gawoŋ meŋkejoŋ. Ejembanoŋ laŋ qasuaaŋ nonomakejuto, nononoŋ mono kotuegoŋ oŋoma yoŋoojoŋ qama kooliŋkejoŋ. Sisiwerowero ama nonomakejuto, nononoŋ mono ii moma mokosiŋgoŋ kaparaŋ koma laligojoŋ. 13 Uuqeqe qaa tokoroŋkota jeŋ nonomakejuto, nononoŋ mono gumbonjonjoŋ qaganoŋ sosooda meleemakejoŋ. Nononoŋ balombaa gojejera roŋaa kaaŋa kolooniŋ baloŋa baloŋa yoŋonoŋ sisinana meŋ gema nunuŋkeju. Kaaŋa laligoŋ kouma kambaŋ koi kaaŋanoŋ kaeŋ toroqeŋ laligojoŋ.

14 Gamu qeŋ oŋomambaajoŋ qaa koi mende oojento, wombo meraborauruna kaaŋa mono qambaŋmambaŋgia oŋomambaajoŋ mojeŋ. 15 Momalaariwaa boi 10,000 yoŋonoŋ Kraistwo qokotaaŋ kalaŋ koma kuma oŋombuyagati eeŋ, ii kileŋ niinoŋ mono Kraist Jiisaswo qokotaaŋ Oligaa Buŋa jeŋ asariŋ maŋgia koloowe uugia meleeŋgi. Kawaajoŋ maŋurugia mamaga mende laligoju.

16 *1 Kor 11.1; Fil 3.17Kawaajoŋ uugia kokaeŋ kuuŋ oŋonjeŋ: Niinoŋ sili amakejeŋi, iikawaa so oŋonoŋ mono noo silina ii otaaŋ laligowu. 17 Niinoŋ silina Kraist Jiisaswo qokotaaŋ ama meŋ baloŋa baloŋa liligoŋ uumeleeŋ kanageso so kuma oŋomakejeŋi, iikawaajoŋ mono duduuwubo. Niinoŋ kawaajoŋ ama wombo merana Timoti wasiwe oŋoonoŋ kawaa. Iinoŋ niwo pondaŋ laligoŋ Pombo qokotaaŋ nama kaŋ kanana jeŋ koma gbiliŋ oŋombaa.

18 Oŋoonoŋga tosia yoŋonoŋ niinoŋ oŋoonoŋ mende kawenaga, kaaŋa moma selegia mepeseeŋ jaba-arambaraŋ ama laŋ laligoju. 19 Kaeŋ laligojuto, Pombaa siiŋanoŋ noojoŋ “Kemba!” jewaati eeŋ, mono uulaŋawo oŋoonoŋ kamaŋa. Kamaŋati, kambaŋ iikanoŋ jaba-arambaraŋ ejemba yoŋoo ku-usuŋgiaajoŋ qisiŋ oŋombe jokoloogi momaŋa. Selegia meŋ uma qaa somasomata laŋ jeŋkejuti, ii niinoŋ mobe kamaaŋqeqeta kolooŋkeja. 20 Anutuwaa bentotoŋ ii qaagadeeŋ jejetaa iwoiga qaagoto, hoŋa ii Anutuwaa ku-usuŋa. Iikanoŋ mono nemuŋ koma nononja.

21 Kawaajoŋ uugia mende meleema laŋ laligowuyati eeŋ, niinoŋ mono koobiŋ meŋ kaŋ qaanoŋ oŋootimaŋa. Uugia meleembuti eeŋ, mono uubonjoŋ qaganoŋ uujopa ama oŋomambaajoŋ kamaŋa? Qaa woi ii gosiŋ noojoŋ siiŋgia nomaeŋ mojuti, ii mono moma gosiŋ nijowu. Kiaŋ.