7
Loemba ano gbaworo saraŋ laaligo rara
1 Oŋo qaa tosaaŋa ooŋ qisigiti, ii jeŋ asarimaŋa. Ejanoŋ emba mende meŋ gbaworoga laligoji, ii saanoŋ. 2 Ii awaa koloojato, sele busuwaa siiŋanoŋ serowiliŋ ambubotiwaajoŋ oŋo motomotooŋ mono aŋa aŋa loemba agimiŋ aoŋ laligowu. 3 Ejanoŋ mono embiaa siiŋaa so loemba laaligowaa areŋa otaawa. Embianoŋ kaaŋagadeeŋ mono loyaa siiŋa otaaŋ laligowa.
4 Embiaa selianoŋ mono aŋaa buŋaga mende kolooro aŋa ii mende galeŋ komakejato, loyanoŋ ii galeŋ komakeja. Loyaa selianoŋ kaaŋagadeeŋ aŋaa buŋaga mende kolooro aŋasiri mende galeŋ komakejato, embianoŋ ii galeŋ komakeja. 5 Kawaajoŋ oroaŋgara mono mende aŋgoŋ koma aoŋ laligowao. Yaŋgorodeeŋ uumotooŋ ama pondaŋ qamakooli gawoŋ mewojoŋ saanoŋ aŋa aŋa laligowaoto, kambaŋ tosaaŋa kaeŋ laligoŋgo mono mombo mindiriŋ motooŋ laligowao. Uugara saanoŋ mende galeŋ koni Satanoŋ aŋgobato meŋ orono siŋgisoŋgonoŋ kamaaŋ uruwabotiwaajoŋ mono iikaeŋ ama laligowao.
6 Kaeŋ ambaotiwaajoŋ saanoŋ jejento, jojopaŋ qaa kaaŋa ii mende ama oŋonjeŋ. 7 Niinoŋ ejemba korebore nii kaaŋa masaraŋa laligowutiwaajoŋ mojento, oŋo tosaaŋa Anutuwaa gawoŋ memewaa momo kaleŋ kaaŋa ii mende meŋ laligoju. Anutunoŋ momo kaleŋa mendeeno motomotooŋ nononoŋ ii me ii aŋa aŋa buŋa qeŋ aoŋ laligojoŋ.
8 Loemba mende kolooŋ malo laligojuti, oŋoojoŋ kokaeŋ jejeŋ: Oŋonoŋ nii kaaŋa toroqeŋ loemba mende kolooŋ solaŋa laligowuti, ii mono awaa kolooja. 9 Awaa koloojato, loemba koloowombaa uugia gere jero laligowubotiwaajoŋ mono saanoŋ loemba koloogi afaaŋgowaa. Kawaajoŋ yoŋonoŋ uugia galeŋ kombombaajoŋ amamaajuti eeŋ, mono saanoŋ loemba koloowu.
10 *Mat 5.32; 19.9; Maak 10.11-12; Luuk 16.18Loemba laligojuti, oŋoojoŋ kokaeŋ jeŋ kotojeŋ, niinondeeŋ qaagoto, Poŋnoŋ aŋo mono qaa koi jeja: Embianoŋ loya mende mesaowa. 11 Kaeŋ jejato, kileŋ loya mesaowaati eeŋ, mono eja moŋ mende meŋ eeŋ laligowa me loyawo mombo amiŋ moma somoŋgoŋ aoŋ laligowao. Kaaŋagadeeŋ loyanoŋ embia mende mesaowa.
12 Ii Pombaa qaagato, loemba tosaaŋa oŋoo gejanonogia ii Poŋnoŋ mende jejato, neeno ii kokaeŋ jejeŋ: Uumeleeŋ eja mombaa embianoŋ uuta mende meleema kileŋ iwo laligomambaajoŋ moji, iinoŋ mono embia ii mende mesaowa. 13 Kaaŋiadeeŋ uumeleeŋ emba mombaa loyanoŋ uuta mende meleema kileŋ iwo laligomambaajoŋ moji, iinoŋ mono loya ii mende mesaowa. 14 Iikawaa kania ii kokaeŋ: Mombaa loyanoŋ uumeleembaa gadokopa ejaga kolooro Anutunoŋ ii kileŋ uumeleeŋ embiawo qokotaajiwaajoŋ ama tak kotoŋ muro soraaya kolooja. Kaaŋiadeeŋ mombaa embianoŋ momalaaria qaagoto, uumeleeŋ loyawo qokotaajiwaajoŋ ama Anutunoŋ ii tak kotoŋ muro soraaya kolooja. Moŋnoŋ soraaya mende koloonagati eeŋ, meraboragaranoŋ mono Anutuwaa sopa seleeŋgeŋ laligowuyaga. Kaeŋ laligowuyagato, Anutunoŋ motooŋ tak kotoŋ oŋonotiwaajoŋ mono soraaya kolooju.
15 Soraaya koloojuto, moŋnoŋ mende moma laariŋ loya me embia mesaomambaajoŋ mojati eeŋ, mono saanoŋ mesaowa. Kaeŋ kolooro noo qaananoŋ uumeleeŋ alanana ii mende somoŋgowaa. Anutunoŋ oŋo luaenoŋ laligowutiwaajoŋ oŋoono. 16 Emba, gii loga uu kuuŋ muna uuta meleembaa me qaagoti, ii mono nomaeŋ monaga? Me eja, gii embaga uu kuuŋ muna uuta meleembaa me qaagoti, ii mono nomaeŋ monaga? Kawaajoŋ mono luaenoŋ laligowu. Kiaŋ.
Anutunoŋ oŋoonotiwaa so mono toroqeŋ laligowu.
17 Poŋnoŋ motomotooŋ oŋoo laaligogiaa areŋ ano loemba me masaraŋa laligogi Anutunoŋ oŋoonoti, iikawaa so mono toroqeŋ laligoŋ laaligogiaa kania mende utegowu. Uumeleeŋ kanagesoya kanagesoya liligoŋ gomaŋ so kaeŋ jeŋ kotoŋ oŋomakejeŋ.
18 Anutuwaa aiweseya eja mombaa selianoŋ kotogi laligoro kaaŋa oonoti eeŋ, ii mono kotomambaajoŋ mende kaparaŋ komba. Anutuwaa aiweseya mombaa selianoŋ mende kotogi laligoro kaaŋa oonoti eeŋ, mono ii kotowutiwaajoŋ mende kaparaŋ komba. 19 Anutuwaa aiweseya selenananoŋ kotogita eja me mende eji, iikanoŋ Anutuwaa jaanoŋ iwoi omaya koloojato, jojopaŋ qaaya teŋ koma otaaniŋ iikanoŋ mono hoŋawo kolooja.
20 Anutunoŋ oŋoono kambaŋ iikanoŋ loemba me masaraŋa laligogiti, oŋo motomotooŋ mono iikawaa so toroqeŋ laligowu. 21 Mombaa weleŋqeqe omaya koloona Anutunoŋ goonoti eeŋ, iikawaajoŋ mono majakaka mende ama laligowa. Uuga meleema saanoŋ solaŋa kolooŋ gawoŋ moŋ mokoloonagati eeŋ, ii mono saanoŋ mokoloowa me uuga afaaŋgoro saanoŋ toroqeŋ weleŋqeqe omaya laligowa.*Qaa kawaa kania moŋ ii kokaeŋ: Uuga meleema saanoŋ solaŋa kolooŋ gawoŋ moŋ mokoloojaŋi eeŋ, gii saanoŋ toroqeŋ weleŋqeqe omaya laligowa.
22 Ii kokaembaajoŋ: Moŋnoŋ weleŋqeqe omaya kolooro Poŋnoŋ kaeŋ oono uuta meleeno siŋgisoŋgoyaa kasia isano solaŋa kolooŋ laligoja. Kaaŋiadeeŋ moŋnoŋ solaŋa kolooro Poŋnoŋ kaaŋa oono uuta meleeno iyaŋaa aiŋa qaagoto, Kraistwaa jeta teŋ kombaatiwaa kasanoŋ nama weleŋa qeŋ laligoja. 23 Kraistnoŋ tawa somatanoŋ sewaŋgia mero laligojutiwaajoŋ mono baloŋ ejemba yoŋoo qaa baatanoŋ kema keegia moma weleŋqeqegia omaya kolooŋ laligowubo. 24 Kawaajoŋ uumeleeŋ alauruna, Anutunoŋ oŋoono kambaŋ iikanoŋ solaŋa kasagia qaa me weleŋqeqe togiaa kasa gbadonoŋ laligogiti, oŋo motomotooŋ mono iikawaa so Anutuwaa jaanoŋ toroqeŋ laligowu. Kiaŋ.
Gbaworo saraŋ ano malo yoŋoo gejanono qaagia
25 Emba saraŋ jumuŋa†Oloŋkalu mende qeqeta oŋoo gejanonogia ii Poŋnoŋ mende jeŋ kotoro mojeŋ. Kawaajoŋ Poŋnoŋ kiaŋkomuŋ nono qaana laŋ qaagoto, moma laariŋ noŋgi sokonjiwaa so jeŋkejeŋi, mono iikawaa so gosiŋ neenaa momonanoŋ kokaeŋ jemaŋa:
26 Kakasililiŋ kambaŋa dodowijiwaajoŋ eja gbaworo emba saraŋ laligojuti, kuuya oŋonoŋ mono iikawaa so toroqeŋ laligogi awaa koloowaa. Kaeŋ romoŋgojeŋ. 27 Emba meŋ laligojaŋi eeŋ, embaga mesaomambaajoŋ mende janjariŋ riiwa. Embaga qaa masaraŋa laligojaŋi eeŋ, mono embawaajoŋ mende moŋgamba. 28 Kileŋ emba mewaati, iikanoŋ mono siŋgisoŋgoyawo mende koloowaa. Kaaŋiadeeŋ emba saranoŋ eja mewaati, iinoŋ siŋgisoŋgo mende ambaa. Siŋgisoŋgo qaagoto, iikaaŋa ambuti, iyoŋonoŋ mono selegianoŋ kakasililiŋ mamaga mokoloowuya. Oŋonoŋ ii mokoloowubotiwaajoŋ mono aŋgoŋ koma oŋomambaajoŋ mojeŋ.
29 Kaeŋ moma gejanonogia jejento, kileŋ qaa moŋ kokaeŋ iŋijomaŋa: Uumeleeŋ alauruna, Poŋ kawaatiwaa kambaŋanoŋ torijiwaajoŋ ama emba meŋ laligojuti, oŋonoŋ mono kaaŋagadeeŋ kambaŋ kokainoŋga kanaiŋ embagia qaa tani kaaŋa kolooŋ laligowu. 30 Wosobiri moma saajuti, oŋonoŋ mono mende saabutiwaa tani kaaŋa kolooŋ laligowu. Uugia qeaŋgoro aisoojuti, oŋonoŋ mono mende aisoowutiwaa tani kaaŋa kolooŋ laligowu. Iwoi sewaŋa mejuti, oŋonoŋ mono ii mende buŋa qeŋ aowutiwaa tani kaaŋa kolooŋ laligowu.
31 Namonoŋ kambaŋ kokaamba areŋ otaaŋ laligoŋkejuti, iikanoŋ mono aliwaatiwaa so kolooja. Kawaajoŋ balombaa ilawoilaya koŋkororo ama gawombaajoŋ amakejuti, oŋonoŋ mono iikanoŋ uugia somoŋgoŋkejiwaa tani kaaŋa mende kolooŋ laligowu.
32 Oŋo balombaa lombotaajoŋ majakakagia qaa laligowutiwaajoŋ mojeŋ. Ejemba masaraŋa laligoji, iinoŋ mono Pombaa ilawoilawaajoŋ majakaka momakeja. Ii moma “Nomaeŋ ambe Pombaa uutanoŋ qeaŋgoro sokonaga,” aŋaajoŋ kaeŋ jeŋkeja. 33 Kaeŋ jeŋkejato, emba meŋ laligoji, iinoŋ mono balombaa ilawoilawaajoŋ majakaka momakeja. Ii moma “Nomaeŋ ambe embanaa uutanoŋ qeaŋgoro sokonaga,” aŋaajoŋ kaeŋ jeŋkeja.
34 Poŋnoŋ leegeŋ embianoŋ leegeŋ awaraŋgoŋ momoya horori uutanoŋ deeno laligoja. Kaaŋiadeeŋ emba loya qaa ano emba saraŋ masaraŋa laligojaoti, iyoronoŋ mono Pombaa ilawoilawaajoŋ majakaka momakejao. Ii moma “Nomaeŋ ambe uŋana ano sele busuna soraaya kolooro Pombaajoŋ sokonaga,” iyaŋgaraajoŋ kaeŋ jeŋkejao. Kaeŋ jeŋkejaoto, eja meŋ laligoji, iinoŋ mono balombaa ilawoilawaajoŋ majakaka momakeja. Ii moma “Nomaeŋ ambe lonaa uutanoŋ qeaŋgoro sokonaga,” aŋaajoŋ kaeŋ jeŋkeja.
35 Oŋoaŋgia ilaaŋ oŋomambaajoŋ moma gejanono qaa ii oŋonjeŋ. Ii tosaaŋa kasa kaaŋa somoŋgoŋ oŋombe lombo mokoloowutiwaajoŋ qaagoto, kania kokaembaajoŋ ii oŋonjeŋ: Niinoŋ oŋo nanamemeŋ dindiŋa otaaŋ uudendeeŋ qaagoto, pondaŋ Pombo qokotaaŋ nama kotiiwutiwaajoŋ mojeŋ. Kawaajoŋ gejanono qaagia ii iŋijojeŋ. Kiaŋ.
36 Eja moŋnoŋ emba sarambo buŋa qeŋ aoŋ laligoŋgo mesaomambaajoŋ romoŋgoji, iwaa goro qaa ii kokaeŋ jemaŋa: Eja iikanoŋ kokaeŋ romoŋgoŋ jeja, “Emba ii meŋ sili awaa mende ama mumambo.” Kaeŋ jero emba mewaatiwaa siiŋa moma kotiiro embawaa gbania eja memewaa so kolooji eeŋ, iinoŋ mono saanoŋ siiŋa otaaŋ agimiŋ aori sokombaa. Iikaaŋa kanoŋ siŋgisoŋgoyawo mende koloowaa. 37 Mende koloowaato, ejanoŋ emba ii mende mewaatiwaa qaaya aŋaa uutanoŋ somoŋgoŋ moma kotiiji, iikawaajoŋ kokaeŋ jemaŋa: Moŋnoŋ eja ii qaanoŋ mende kuuro osijato, saanoŋ aŋaa siiŋa otaaro qaa moŋnoŋ mende somoŋgoji, eeŋ, iinoŋ mono saanoŋ aŋaa siiŋa otaaŋ emba ii mende mewa.
38 Kaeŋ kolooro emba saraŋ mewaati, iwaa silianoŋ mono dindiŋa koloowaato, ii mende mewaati, iinoŋ mono kana awaa soro otaawaa. Kiaŋ.‡36b Eja moŋnoŋ borata eja mumambaajoŋ uuwoi moji, niinoŋ iwaa gejanono qaa kokaeŋ jemaŋa: Maŋanoŋ kokaeŋ romoŋgoŋ jeja, “Borana muŋ sili awaa mende ama mumambo.” Kaeŋ jero borataa gbania eja memewaa so kolooro eja mumambaa siiŋa moma kotiiji eeŋ, iinoŋ mono saanoŋ siiŋa otaaŋ eja muro mero sokombaa. Maŋanoŋ iikaaŋa kanoŋ siŋgisoŋgo mende ambaa. 37b Mende ambaato, maŋanoŋ borata eja mende mubaatiwaa qaaya aŋaa uutanoŋ somoŋgoŋ moma kotiiji, iikawaajoŋ kokaeŋ jemaŋa: Moŋnoŋ maŋa ii mende kuuro osijato, saanoŋ aŋaa siiŋa otaaro qaa moŋnoŋ mende somoŋgoji eeŋ, iinoŋ mono saanoŋ siiŋa otaaŋ borata aŋgoŋ komba. 38b Kaeŋ kolooro bora saraŋa eja mubaati, iwaa silianoŋ mono dindiŋa koloowaato, ii mende mubaati, iinoŋ mono kana awaa soro otaawaa. Kiaŋ.
39 Embanoŋ loyanoŋ jaawo laligowaatiwaa so meŋ aoaowaa qaayanoŋ somoŋgoro laligojato, loyanoŋ komuwaati eeŋ, qaa iikanoŋ kaaŋiadeeŋ komuro saanoŋ eja siiŋanoŋ jewaatiwaa so mewaa. Uumeleembaa gadokopa ejaga qaagoto, eja Pombo qokotaaji, iigadeeŋ mewaa. 40 Saanoŋ eja meŋ korisoro qereweŋa mokoloowaato, toroqeŋ masaraŋa laligowaati eeŋ, mono uukoisoro hoŋa mokolooŋ aisooŋkebaa. Niinoŋ qaa ii gosiŋ kaeŋ jejeŋ. Anutuwaa Uŋayanoŋ noo uunanoŋ kaaŋagadeeŋ laligoji, iikawaajoŋ mono kaeŋ romoŋgoŋ jejeŋ. Kiaŋ.
*7:10: Mat 5.32; 19.9; Maak 10.11-12; Luuk 16.18
*7:21: Qaa kawaa kania moŋ ii kokaeŋ: Uuga meleema saanoŋ solaŋa kolooŋ gawoŋ moŋ mokoloojaŋi eeŋ, gii saanoŋ toroqeŋ weleŋqeqe omaya laligowa.
†7:25: Oloŋkalu mende qeqeta
‡7:38: 36b Eja moŋnoŋ borata eja mumambaajoŋ uuwoi moji, niinoŋ iwaa gejanono qaa kokaeŋ jemaŋa: Maŋanoŋ kokaeŋ romoŋgoŋ jeja, “Borana muŋ sili awaa mende ama mumambo.” Kaeŋ jero borataa gbania eja memewaa so kolooro eja mumambaa siiŋa moma kotiiji eeŋ, iinoŋ mono saanoŋ siiŋa otaaŋ eja muro mero sokombaa. Maŋanoŋ iikaaŋa kanoŋ siŋgisoŋgo mende ambaa. 37b Mende ambaato, maŋanoŋ borata eja mende mubaatiwaa qaaya aŋaa uutanoŋ somoŋgoŋ moma kotiiji, iikawaajoŋ kokaeŋ jemaŋa: Moŋnoŋ maŋa ii mende kuuro osijato, saanoŋ aŋaa siiŋa otaaro qaa moŋnoŋ mende somoŋgoji eeŋ, iinoŋ mono saanoŋ siiŋa otaaŋ borata aŋgoŋ komba. 38b Kaeŋ kolooro bora saraŋa eja mubaati, iwaa silianoŋ mono dindiŋa koloowaato, ii mende mubaati, iinoŋ mono kana awaa soro otaawaa. Kiaŋ.