15
Lamanoŋ soorotiwaa sareqaa
Mat 18.12-14
1 *Luuk 5.29-30Takis tiliqili ama megiti ano siŋgisoŋgo ejemba tosaaŋa ii jaasooŋgoyanoŋ Jiisaswaa Buŋa qaaya mobombaajoŋ kagi. 2 Kaeŋ kagito, Farisii ano Kana qaawaa boi yoŋonoŋ Jiisaswaajoŋ uugia boliro ŋindiŋ-ŋunduru qaa kokaeŋ jegi, “Eja kanoŋ siŋgisoŋgo ejemba uŋuama yoŋowo rama nene neja.” 3 Kaeŋ jegitiwaajoŋ Jiisasnoŋ sareqaa moŋ kokaeŋ iŋijoro,
4 “Oŋoonoŋga mombaa lamauruta 100 laligogi yoŋoonoŋga moŋnoŋ sooŋ jiŋjauŋ keno toyanoŋ nomaeŋ ambaa? Iinoŋ mono 99 ii baloŋ qararaŋkoŋkoŋanoŋ oŋomesaoŋ kema motooŋgo jiŋjauŋ kenoti, iikawaajoŋ moŋgama kema laligoŋ mokolooro tegowaa. 5 Mokolooŋ uukoisoro ama sawiŋanoŋ ama bosima kawaa. 6 Mirinoŋ kaŋ alauruta ano tosaaŋa kosere laligojuti, ii oŋoono ajoroogi kokaeŋ iŋijowaa, ‘Lamana sooroti, ii mokoloojeŋatiwaajoŋ mono kagi niwo korisoro amboŋa’ 7 Niinoŋ kokaeŋ iŋijowe mobu: Iikawaa so siŋgisoŋgo eja motooŋgonoŋ uuta meleembaati, iwaajoŋ Siwe gomanoŋ korisoro somata koloowaa. Ejemba 99 iyaŋgiaa jaagianoŋ solaŋa dindiŋa kolooŋ uugia meleembombaajoŋ mende moma laligojuti, iyoŋoojoŋ korisoro kaaŋa mende koloowaa.” Kiaŋ.
Moneŋ kota soorotiwaa sareqaa
8 “Kaaŋagadeeŋ emba moŋnoŋ silwa moneŋ kota 10 meŋ laligoro yoŋoonoŋga motooŋgonoŋ kemeŋ sooro nomaeŋ ambaa? Iinoŋ mono kiwa ootiriŋ kaparaŋ koma miri usuma moŋgambaa. Moŋgama laligoŋ mokolooro tegowaa. 9 Ii mokolooŋ emba alauruta ano emba tosaaŋa kosere laligojuti, ii oŋoono ajoroogi kokaeŋ iŋijowaa, ‘Noonoŋ silwa moneŋ kota motooŋgonoŋ sooroti, ii mokoloojeŋatiwaajoŋ mono kagi niwo korisoro amboŋa.’ 10 Iikawaa so niinoŋ kokaeŋ iŋijowe mobu: Siŋgisoŋgo ejemba moŋnoŋ uuta meleeno Anutuwaa gajobauruta yoŋonoŋ iwaajoŋ korisoro uuta ambuya.” Kiaŋ.
Qewoloŋ ejanoŋ uuŋgonjaŋ ama uuta meleeno.
11 Jiisasnoŋ toroqeŋ kokaeŋ jero, “Eja mombaa merawoita woi laligori. 12 Koganoŋ maŋaajoŋ kokaeŋ ijoro, ‘Amana, gii mono moneŋ esuhinaga mendeema bakaya nomba.’ Kaeŋ ijoro maŋgaranoŋ ilawoilaya kuuya sogaranoŋ mendeema orono. 13 Ii orono meria melaanoŋ gomaŋ boria woi karooŋ laligoŋ hina iwoiya kuuya ii kololooŋ meŋ kantri moŋgeŋ keno. Iikanoŋ kema iyaŋaa jaajaa kana somata emba yoŋowo bao kasu kaaŋa paŋgamaŋ laaligo laligoŋ moneŋ hinaya gilidabororo.
14 “Iwoi kuuya gilidabororo bodi somata kolooŋ baloŋ kuuya ii sokono. Iinoŋ kambaŋ kanoŋ kanaiŋ tapekokoro kolooŋ memeqemeaŋ ama amamaaro. 15 Amamaaŋ kantri iikawaa toya mombaanoŋ kema gawombaajoŋ qisiŋ muro wasiro iwaa bao sopanoŋ kemeŋ bao galeŋgiaga laligoro. 16 Iikanoŋ laligoro bao yoŋonoŋ sako kota negi iima ‘Saanoŋ ii newe tomena sokonaga,’ jeroto, ii kaaŋagadeeŋ moŋnoŋ mende muro.
17 “Kaeŋ laligoŋ uuta tooro kokaeŋ jero, ‘Maŋnaa gawoŋ ejemba naa afaaŋa yoŋonoŋ gawoŋ megi sewaŋa oŋono nene neŋ timbiriŋgoŋ laligojuto, niinoŋ kokanoŋ koŋkorara bodi laligoŋ komumambaajoŋ anjeŋ. 18 Nii mono waama maŋnaanoŋ eleema kema kokaeŋ ijomaŋa, ‘Ama, nii siŋgisoŋgo ama iikanoŋ gii ano Siwe Toya qaagara qotogoŋ qagara meŋ boliwe. 19 Kawaajoŋ giinoŋ mombo noojoŋ ‘Merana,’ jewagatiwaa so mende koloojeŋ. Gii saanoŋ jena weleŋqeqega moŋ koloomaŋa.’
20 “Kaeŋ jeŋ waama maŋaanoŋ keno. Kema miri dodowiro maŋanoŋ korikori endu nama iiro karo bata pororogoro iima kobooŋ esuŋagadeeŋ qiqigoŋ kema kema aroyanoŋ giliro kemero buuta kitoŋ neŋ ‘Merana, oowe oowe!’ jero. 21 Kaeŋ anoto, merianoŋ ijoro, ‘Maŋna, nii siŋgisoŋgo ama iikanoŋ gii ano Siwe Toya qaagara qotogoŋ qagara meŋ boliwe. Kawaajoŋ giinoŋ mombo noojoŋ ‘Merana,’ jewagatiwaa so mende koloojeŋ.’
22 “Kaeŋ ijoro maŋanoŋ iikanondeeŋ weleŋqeqeuruta kokaeŋ iŋijoro, ‘Oŋo mono uulaŋawo maleku akadamuyawo moŋ meŋ kaŋ mouma mubu. Ilawage aroyanoŋ koma menjereŋgoŋ muŋ kana esu kanianoŋ mouma mubu. 23 Kaaŋagadeeŋ sopanoŋ kema bulmakao doŋa kelegawo moŋ meŋ kaŋ qeŋ oogi neŋ korisoro amboŋa. 24 Merana koi komuŋ tagoroti, iinoŋ mono mombo gbiliŋ kaja. Iinoŋ mono soorogo Anutunoŋ mombo mokolooro asugija.’ Kaeŋ iŋijoro kanaiŋ korisoro aŋgi.
25 “Korisoro aŋgito, datanoŋ gawonoŋ laligoŋ eleema miri dodowiŋ kanoŋ rii gbawe qama oroŋ aisoogiti, iikawaa otoŋa moro. 26 Ii moma weleŋ mera moŋ qaro karo ‘Ii nomaembaajoŋ anju?’ jeŋ qisiŋ muro. 27 Qisiŋ muro kokaeŋ ijoro, ‘Koganoŋ luluuŋkota eleema karo maŋganoŋ ii mombo aŋaliŋ ba koma muŋ iikawaajoŋ iŋijoro bulmakao doŋa kelegawo qeŋ ooŋ aisooju.’
28 “Kaeŋ ijoro iriŋa soono mirinoŋ umambaajoŋ togoro. Togoroto, maŋanoŋ ii moma seleeŋgeŋ kamaaŋ uuluae qaa bonjoŋanoŋ jeŋ meŋ looriŋ muro. 29 Meŋ looriŋ muroto, iinoŋ meleema kokaeŋ ijoro, ‘Maŋna, niinoŋ gbani mamaga weleŋga qeŋ laligoŋ jeŋkootoga kambaŋ moŋnoŋ mende uuguŋ laligoweto, kileŋ giinoŋ kambaŋ moŋnoŋ meme (noniŋ) melaa moŋ alauruna yoŋowo korisoro ambombaajoŋ mende nona. 30 Mende nonato, meraga koi kanoŋ kana somata emba yoŋowo laligoŋ moneŋ hinaga tiwilaaŋ kouro giinoŋ mono iwaajoŋ ama iŋijona bulmakao doŋa kelegawo qeŋ ooju.’
31 “Ijoro maŋanoŋ kokaeŋ meleema jero, ‘Merana, gii kambaŋ so neenawo laligoŋkejaŋ. Kawaajoŋ neenaa buŋana kuuya ii mono goo buŋaga kaaŋgadeeŋ kolooja. 32 Kaaŋgadeeŋ koloojato, koga koi kanoŋ komuŋ tagoroto, mombo gbiliŋ eleema kaja. Iinoŋ soodabororoto, Anutunoŋ ii mombo mokolooja. Kawaajoŋ keteda koi nene korisoro aniŋ sokonja.’ ” Kiaŋ.