1 Rang se inum oh, pe Yesus ile yi ndre Kaperneam, pe ninen ihtot lok ihpa ndre Iy insa yi. 2 Lau hohndur hala yi ndre ndrongon Iy, ile pe um ndre Iy imin eriy ti ihndrepit ta sa lau. Lonu‑um pe kiu ndrodan ti hepe lok ke porah indrisou pwi, pe Yesus impehre Nolwo‑on Lapan ile ta sa. 3 Su lau hamou hosori orngon homou ndriken pe lumwen kakukuw ile. 4 Lok indrehndrepit pe su handranon hana mukehe ta Yesus pwi, ile pe su hosori orngon kuti ile mbrungiy pe hosomukihi ngereu ise eriy. Ngereu ti ise ke ndre pule‑en Yesus. Inum pe su hosokombrute‑en osukei ile lokowon orngon kuti pe heduwe iy ile pwoi melsen, ile purmadan Yesus. 5 Yesus iltuwei ihpa ndre bilip ta su ti mandra‑an, ile pe Iy ipe ile tan orngon kakukuw ihpa, “Nedu, Yu undra‑as to-ir tadam handra‑au.”

6 Su tisa se odo Lo ta Moses ti hodo pe hehrungi Yesus, ile pe su hadawene ihpa, 7 “Ei! Iy ti ipe Iy ti sa pe inolou mo‑on ile ta Lapan tih? Homou lau kindranon kindra‑as to-ir ta homou lau pwi. Homou ke Lapan kenon kipu ertih!”

8 Odoke Yesus indrehtunon tawene ta su, ile pe Iy ipe ile ta su ihpa, “Oduu edentawene ihpa kirti ile sa? 9 Iy kehe mangsan ewehen lakopwi? Yu kupwe ‘to‑ir tadam handra‑au’ ndre pwi Yu kupwe ‘atlang, okuni lokowum pe alla’? 10 Yu we kulilngan kile ta oduu ihpa ndre Nedun Ndramat*Nedun Ndramat. Tok Pisin, Pikinini Blong Man. Inglis, The Son of Man. ti tadan pawa odo as to‑ir ta sa ndramat odo lokpoi.” Ile pe Iy ipe ile tan orngon kakukuw ti ihpa, 11 “Atlang, ekuni lokum pe owou ala emwem!”

12 Orngon ti itlang, ikuni lokowon, pe illa iyeu iyus mada’ sa lau ndre sulo‑on. Sa ndre sulo‑on hehretek pe hemesi‑iy, pe hesori rangan Lapan ile eleng. Pe sa hapa ihpa, “Odu hepe etsenendre‑et hangka‑an ihpa kuti pwi uu ndre mahkele.”

13 Yesus ile yi ndre ngerin ndras odo Galili. Sa lau sulo‑on hala ndrongon Iy, pe Iy innen Nolwo‑on Lapan ile ta su. 14 Iy inelila ile ti pe iltuwe Livai, taman ti Alfius. Livaia ti imin um odo sihsih takis, odosa iy maryan ti takun takis ta sa lau. Yesus ipe ile tadan ihpa, “Asa owus Yu.” Livai itlang pe iyus Iy.

15 Ndruwen erti pe Yesus ile ilyo‑on song ile um ta Livai. Su se ndramat odo takun takis pe sa ndramat se mo‑osa, hala yi pe hana‑an song hodo ke hondroh ndroda Yesus pe su lewen. 16  Su tisa odo Lo (su ti Paraseo) heltuwe Yesus ina‑an song ndroda sa lau mo‑osa pe su lau odo takun takis, ile pe su hehndremte su disaipel Tadan ihpa, “Ihpa kehe pe Iy ina‑an song ndroda sa lau kurtih?”

17 Yesus ihrungi su pe ipe ile ta su ihpa, “Sa lau hendrimat sik pwi ti hesereh tan ndrokta pwi, tapake sa ndre ta sa sik ti herreh tan ndrokta. Yu use ti odo yuw sa lau huye’ sa ti pwi. Yu use ti usuyuw sa lau mo‑osa.”

18 Petsih ti su lau honu‑us Jon Baptais, pe su lau ndre honohtot Lo ta Moses, eri holuhuw yo‑on song. Ile pe sa lau se hala hu Yesus pe hehndremte Iy, “Su lewen Jon pe su lau mandra‑ane odo Lo ta Moses ti heneluhuw yo‑on song, pe ihpa kehe pe su lewim ti hesempo erti pwi tih?”

19 Yesus ipe ihpa, “Ihpa kehe? Oduu waso‑o’ oduu atpa sa kowson ndramat ndre iyesou mahkele kopwi ti hoyo‑on song kolwii, idu iy mapwi imin ndroda su tih? Pwi tih! Idu iy mapwi imin, eri su kowson ti we hensinip ana’ su odo yo‑on song pwi. 20 Odoke rang ti we kise, pe sa lau mo‑osa we hekuni iy ke‑eu odo ngo’ su lewen. Iy ndre kah kindra‑au ti pe su ka we holuhuw song.”

21 “Homou indresokopti sehir kolau wuhou ile mundren siot ndruken iseket ti pwi, odosa, uh sa we hesingen, eri palan kolau wuhou kuti we kikuw kile lehyen pe kire‑e siot kile mandra‑an lakopwi. 22 Pe homou isentehen wain morowin ile lon keltun meme ndruken pwi. Pwi ti we wain kire‑e keltun meme kurti, pe wain ndrodan ndre keltun meme we herehmo‑on. Ile pe sa hentehen wain morowin ti illa ke lon kalatun meme wuhou.”†kalatun meme wuhou. Sa lau odo lonen Yesus ti hosokopti keltun meme illa puken wo, pe hentehen wain illa lon yi.

23 Idu rang sei Sabat eri Yesus illa iyus lon katen wit. Su lau Tadan ti ho‑us Iy yi, pe hentakun sengin wit pe hana‑an. 24 Ile pe su Paraseo‡Paraseo. Tok Pisin - Farasi. Su lau ndre hendrotowe Lo ta Moses pe lotu ta su Yuda ile puko‑on. hapa ile ta Yesus hahpa, “Hei, Lo ta tidu ti indresinip ana’ tidu odo yo‑on song odo langah ta sa lau ti pwi, odoke Lo ti ipe tidu we titndrepo erti kidu Sabat pwi.”

25-26 Yesus isomwi su ihpa, “Oduu ti hepe edempo rit pohtidi‑iy tan Devit iyin buk tam Profet Samuel ti ndre pwi? Idu mundrun ndre Abiatar ti hetpris, Devit pe su lewen hamat song pe hala lon omwen Lapan, pe hani bret odo ofa illa ta Lapan. Bret erti immin purmadan Lapan, pe sa lau ke porah we hendreyo‑on pwi. Sa pris kopwi we heyo‑on. Odoke Devit iyo‑on, pe itou se ile ana’ su lewen yi. Oduu edempo ridim nolou kuti ndre pwi?”

27 Inum pe Yesus ipe ile ta su yi ihpa, “Lapan iduwe Sabat ti odo henuwii ndramat. Lapan indrahnan ndramat odo we kinehnuwii Sabat ti pwi. 28 Ile pe Nedun Ndramat ti bos odo Sabat yi.”