1 Setekayame yuu Bapilone kiŋi Nepukatenesa kando kamba lao mata maiya. Dopa piyasa ee kana mange mendaki karo dokopa kana akalisa dokona yuu gii akalisa dokopa kiŋi Setekayame isiyamo yuu gii dokopa Nepukatenesa banya ami yanda singi dupwa peparae epapala yuu Jerusaleme pyao nyiyami. Nakamame yuu taone wangu dupwana komau anda pyuo palyuo wambu dupwa nyisa epa nana lao karapusi pyao yuu taone dokona kana kame mende awali lao piyami. 2 Kame pisi dokona sukusa palyuo kareyaminyi pao Setekaya baa ee kana akalisa ipisu mendaki ingyuo kiŋi kareya. 3 Ee kana mendaki dokonako pao kana kisimana yuu gii mange mendaki karo dokopa ama lopo andake kopetame siyamopa wambu dupwa nenge mende pyarepala paramo narami ingya naya. 4 Dokopa yuu taone dokona kana kame dupwa pyao lalyiyami. Dokopa Bapilone yanda singi dupwame yuu taone dokona karo awali leyami. Dopa piyaminyipape kukwa dokopa yanda singi peparae range kyawa lete nyuo peyami. Nakama kiŋi dokona ee kata doko pao kana kame andake dolapo pyuo epo suu lenge kata kambu dokona nyisa epapala yuu Jotane pau lama lama dorena ingyuo pyako peyami. 5 Dopa pyuo peyaminyipape Bapilone ami yanda singi dupwame kiŋi Setekaya baa peta pao yuu Jereko repeta yuu lama lamandena minyaro nyiyaminyi dokopa banya yanda singi dupwame baa yaki nyepala peyami. 6 Setekaya baa minyuo pao kiŋi Nepukatenesa yuu taone kingi Oripila lenge dokona peteyamo maiyami. Dokopa dokona Nepukatenesame pii dupwa piso soo kote leya. 7 Dokopa Setekaya baa kandako kareyamo dokopa banya ikinyingi dusipa pyao kumakayami. Dokopa kiŋi Nepukatenesame kiŋi Setekayana lenge doko lukunyi nembena leyasa nembeyami. Dopa pipala puu maiyuo minyuo yuu Bapilone dokona peyami.

8 Ee kana akalisa ipisu mange mendaki karo dokona kana kingi paki yuu gii yanda ipingi dokopa kiŋi Nepukatenesame yuu Bapilone kiŋi kareyamopa akali Nepusaratane baame kiŋi dopa pinya dapa pinya lao karo dee banya yanda singi dupwana mupwa karenge doko yuu Jerusaleme dokona sukusa peya. 9 Papala baame tembole anda doko kiso kiŋinya anda doko kiso dee wambu kamongo Jerusaleme palenge dupwana anda dupwa peparae kiso piya. 10 Piyamo dokopa banya yanda singi dupwame yuu taone dokona kana kame doko pyao lalyuo isa palyiyami. 11 Dokopa Nepusarataneme wambu mora petengepe dee wambu lapo Jerusaleme dokona pyarepala pyao peteyaminyi dupwa dee lapo nakama Bapilone wambu keta rangeme maiyami dupwape nyuo lanyuo Bapilone peya. 12 Dopa piyamopa wambu muiyane lapo bange see nange dupwa yuu Juta dokona ee yuu dupwanape dee isa girapo ee dupwanape yulu pyuo petena leya.

13 Dokopa Bapilone wambu dupwame isa potende kone kaname waso karenge doko pyao poro leyami. Dee rate lapo tembole anda dokona siyamo dupwa pyao lalyiyami dee wate pingi disi kamame andake kone kaname wasingi doko pyao poro leyami. Lapala bange kone kana yale dupwa peparae nyuo yuu Bapilone dokona peyami. 14 Nakamame saporo dupwa nyuo dee kana pyare dupwa au pyuo pee nembenge penge dupwa nyuo yulu bange lambe minyaro karenge dupwa nyuo dee mena pyao kiso maingi dokopa pere mena ranjama warakyuo nyingi dupwa nyuo bange nenge rendamu pingi kiso reto maingi pere warake dupwa nyuo dee kone kana dopaleme bange wasisi tembole anda dokona minyuo yulu pingi dupwa nyuo piyami. 15 Nakama bange peparae golome wasisipi dee kana kulingimi wasisipi dupwa opetae nyuo peyami dee isare lengya minyuo papingi bangepe dee pere kukipi dupwa peparae nyuo peyami. 16 Kiŋi Solomoneme tembole anda dokona lao kone kaname bange kameya lapo waso reteya. Dokona rate lapope disi andake mendepe dee isa pote lamape waso reteya. Reteyamo dusipa ama kenda wakasa pingi. Dokome sikyali angi doko kapa pii nange. 17 Bange dolapo laparae mendare. Mende mendepe laparae mita mange lama karo ketae peya. Dokopa ketae dolapona laparae kone kana pere dopaleme wasisi mita mendaki dee kanya ingiya. Dolapona laparae awali lao kalya pyuo kone kaname waso bange isa jingi pomekeranate yale dupwa yuku awali leyami.

18 Nepusaratane akali yanda singinya mupwa dokome akali Setaya lenge purisi mupwa dokope akali Sepanaya lenge purisi lanena lapo ingyuo karenge dokope dee akalii rema mendasipa tembole anda dokona mupwa karenge dusipape opetae karapusi pyao minyuo peya. 19 Yuu taone dokona akali mende yanda singinya mupwa ingyuo iso karenge dokope dee akali kingi paki kiŋi doko dopa pyuo piri dapa pyuo piri lao nyiso lenge yuu taone dokona pyarepala pao kareyami dusipape yanda singi mupwa iso karenge dokona pepa dupwa isakamingi akali dokope dee akali mupwa akalisa pakinyamange dusipape opetae nyuo minyuo peya. 20 Papala Nepusarataneme Bapilone kiŋi doko yuu taone Oripila lenge yuu andake Amati dokona singi dokona peteyamo doko maiya. 21 Maiyamopa kiŋi dokome nakama nyepala randa andake maipala nakama pyao kumakaya.

Dokona lao Juta wambu dupwa nakamana yuu yaki nyuo karapusi ingyuo minyuo peyami.

22 Yuu Bapilone range kiŋi Nepukatenesame akali Getalaya akali Aikamena ikinyingi Sapanena kauwange doko Juta wambunya gapomane ingyuo karena lao rombo palyiya. Rombo palyapala wambu lapo karapusi ingyuo nyuo minyuo yuu Bapilone paa napala kareyami dupwana baa mupwa ingyuo karena leya. 23 Dokopa Jutia akali mupwape dee yanda singi lapope nakama rangeme Bapilone wambu keta mai nao mee kareyami dupwame pii doko siyami. Sepala yuu Misipa dokona akali Getalaya kareyamo dokona peyami. Akali mupwa dusipana mende Isimaele lenge akali Netanayana ikinyingipi Joanane lenge akali Kareyana ikinyingipi Seraya lenge akali Tanumetena ikinyingi yuu taone Netopa range dee mende Jesanaya lenge yuu Makya range dusipa peyami. 24 Dokopa Getalayame nakama lamaiyuo lao, Nakamame yuu Bapilone akali mupwa dupwa kando paka nalapape lao nakama lalu lao langilyu. Yuu dakena wangu lakao palipala yuu Bapilone kiŋi dokona yulu pyakamyuo kararami ramo dokopa nakama keta yulu dupwana peparae kapa elyape ingyuo para, leya.

25 Dopa leyamopape ee kana dokona kana yanda ipingi dokopa akali Isimaele Netanayana ikinyingi akali Elisamana kauwange baa kiŋinya ree palu wambu dokome dee akali akalisa opetaeko konda pyuo role pyapeta yuu Misipa dokona papala akali Getalaya doko minyaro nyepala pyao kumakayami. Baame Bapilone akali lapope dee Isaraele wambu lapope role pyao kareyami dupwa opetaeko pyao kumakaya. 26 Nakama Bapilone wambu dupwa kando pakapala Isaraele wambu peparae pendewa kamongope dee ami yanda singi mupwape dupwa mendaki kata palyapala yuu doko yaki nyuo yuu Isipi peyami.

27 Akali Ipilimorotake Bapilone wambunya kiŋi ingyuo kareyamo ee kana dokopa baame Juta kiŋi Jiyoakini doko kando anjiki pyuo mona reto karapusi paleyamo doko nyisa pena leya. Doo piyamo doko Jiyoakini baa karapusi pyao minyuo papeyaminyipa ee kana akalisa rema ipisu yanda ipingi dokona kana akalisa ipisu lama yuu gii akalisa lama ipisu yanda ipingi dokopa dopa piya. 28 Ipilimorotakeme kiŋi menge karapusi pyao minyuo yuu Bapilone peyaminyi dupwa kando anjiki piyamopape baa kiŋi Jiyoakini yulu andake maiyuo kingi ketae pyambuo anjiki pyuo kareya. 29 Dokona lao Jiyoakini banya karapusi komau alowa pipala kiŋinya nenge nenge dokona nao yuu gii lete kareyamo peparae palyuo karo piya. 30 Yuu gii peparae baa palyuo karo piyamo dokopa baa nenge narali dupwa maiyaminyi dokoko suu pyao maipa piyami.