1 Na tastasimitol, mulo ot mulo tasmani mang anumitol a tinan ot tetek mulo bel i utna oros ka, i suah ot a wana. 2 2:2 Aposel 16:19-24; 17:1-9Mulo tasmani mang lanigo tan anumitol a tinan ot tetek mulo, a tarai la alaulau mitol pa la ame mitol to e Pilipai. Ika ana arnangai anuna nundala God, mitol rakrakai ot sur mitol ar atatai ana nuna Wakak a Warwara tetek mulo, pa bel mitol matatan la ning la sairas rakrakai mitol. 3 Ning mitol nunung mulo sur mulor lingir a nuknukimulo, bel anumitol a warwara i rongo, bel otleng mitol warwara ana laulau a nuknuk pa bel mitol asongo pas mulo. 4 2:4 Galesia 1:10Ika mitol atatai ana Wakak a Warwara, anasa e God ka toho tar mitol, pa i tortorot omitol mang mitol ar toli. Ning mitol atatai bel sur mitol ar agasgas a taraila, sur e God ot ir gas ono, esaning i toho mitol. 5 Mulo ka tasmani mang bel mitol agasgas mulo anal namnamin a warwara, pa bel mitol nuknuk kumna sur ta mani tamulo. E God i oroi mitol pa ka tasman mitol. 6 Bel mitol mang sur mulo o tik masik otleng ir atong leklek pas mitol.

I tostos ning mitol ar nunung mulo sur ta arlou, anasa mitol natol a aposel ane Karisito. 7 Ika bel mitol toli larning. Mitol asangan a molmol a ginimitol na arpotor tamulo, arlar ana hane ning i tai alar na natnatna. 8 Mitol mang kol sur mulo, pa mitol gas kol sur mitol ar atai mulo ana Wakak a Warwara ane God. Bel i ka ine, mitol gas sur mitol ar saran anumitol a lalaun otleng tetek mulo, anasa mulo itna kol na matamitol.

9 2:9 Aposel 20:34Na tastasimitol, mulor tasman anumitol a rakrakai a titol. Mitol titol ana kumitol ana moromla pa a kabakiarla. Mitol toli larne sur gong mitol saran ta mamahat tetek mulo ning mulor lou mitol, ana numitol a titol na warawai tetek mulo ana Wakak a Warwara ane God. 10 Mulo ot, pa e God otleng, mulo oroi anumitol a lalaun ning mitol kes taum ono na arpotor tamulo, a tena tortorotla. Anumitol a lalaun i totoh pa i tostos, pa bel dir tiu tar mitol on ta rongo. 11 2:11 Aposel 20:31Mulo tasmani mang anumitol a toltol tetek mulo rop taktakai i arlar ana toltol ning a barsan i toli tetek na natnatna. 12 Manglarne, mitol wunan mulo, mitol warwara na armoro tetek mulo, pa mitol atai mulo sur mulor laun taum ana ngas a lalaun ning i agasgas e God, esaning i sira kabah pas mulo sur anuna matanitu pa anuna matatar saot na langit.

13 2:13 2 Tesalonika 2:13Pa mitol sira atong wakak otleng tetek e God anasa ning mulo longor a warwarala ane God tamitol, mulo kibasi. Bel mulo kibasi arlar ana warwarala ka anuna tarai, mulo kibasi anasa a warwara ane God ot. A warwara ning kaning i titol ting na lalaun anumulo ning mulo ka tortorot. 14 2:14 Aposel 17:5Na tastasimitol, i manglarning anasa mulo arlar ana tarai a lotu ane God ning la kaning oe Karisito Iesu, ning la kes to na papar Judia. Pa mulo otleng mulo kilang kankan ana kuna taraila ting na numulo a hanua, arlar ana tarai a lotu to e Judia la kilangi ana kuna nunla na tarai ot, a tarai Juda, 15-16 2:15-16 Aposel 9:23, 29; 13:45, 50; 14:2, 5, 19la ning la umkol a Leklek e Iesu pa a propetla, la kepsen mitol otleng. La tohoi sur lar sairas mitol, sur gong mitol warawai tetek a taraila ning bel na tarai Juda sur gong e God ir alaun pas la. Ning la toli larne, e God bel i gas onla, pa la kes na hirua taum ana taraila rop. Pa ana nunla toltol ning, la palataum anunla na toltol laulau, tuk ning a balakut ane God ka hanot tetek la.

17 Na tastasimitol, ning a tarai Juda la akes sarara tar mitol kusun mulo, anundala keskes sarara bel i bongnani. Dala kes sarara ana palaondala, ika ana nuknukimitol mitol nuk mulo ot. Mitol mang kol sur mitol ar oroi mulo, pa mitol rakrakai sur mitol ar tolsot pasi. 18 Mitol mang kol sur mitol ar ulak tetek mulo. Iau e Pol, a galis a taim, a tohoi sur ar han tetek mulo, ika e Satan i sairas mitol. 19 2:19 Pilipai 2:15-16; 4:1; 2 Tesalonika 1:4Mitol mang kol sur mitol ar oroi mulo, anasa mitol tortorot omulo mang mulo tur rakrakai, pa mulo a kama gasgas anumitol, pa mitol ar iaunan mitol omulo ana pukakiar ning anundala Leklek e Iesu ir hanot, pa dalar tur na matana. 20 I momol kol mang mitol ar iaunan mitol omulo pa mulo ot anumitol a gasgas.