1 3:1 Aposel 17:15Bel ma mitol mang sur mitol ir kes liklik, anasa mitol nuknuk kol omulo. Mitol nuki mang i wakak ning mia ka ma e Sailas, miar kes to e Atens pa miar sune e Timoti. 2 3:2 Aposel 16:1-3Pa mia ka sune tar e Timoti a tasindala, pa a tena titol ane God taum omiau, ning mitol sira warwara talapor ana Wakak a Warwara oe Karisito. Mia ka sune tari tetek mulo, sur ir arakrakai mulo, pa ir wunan mulo ana numulo a tortorot, 3 3:3 2 Timoti 3:12sur gong tik omulo a nuknukna ir loklokron ana mamahatla ning mulo kilangi. Anasa mulo tasmani ot mang a mamahatla ir kibas dala. 4 Ning dala kes taum, mitol sira atai mulo mang dir alaulau dala. Pa mulo ka tasmani mang a mamahatla ning ka hanot. 5 Ine a kamna ning a sune e Timoti tetek mulo. Bel a mang ar kes liklik te, anasa a nuknuk kol omulo, pa sune i tetek mulo sur ar tastasman ana numulo a tortorot. A matmataut, sakana a Tena Alam ka apungan ulak tar mulo, pa anumitol a titol tetek mulo ir utna oros ka.

6 3:6 Aposel 18:5Ika onone e Timoti ka ulak kusun mulo tingia ute ma miau. I abaran a wakak a warwara talapor omulo tetek miau, ana numulo a tortorot pa anumulo a marmaris. I atai miau mang mulo sira gas ning mulo sira nuk ulak pas anundala keskes taum nating, pa mulo mang kol sur mulor oroi mitol, larning mitol otleng mitol mang kol sur mitol ar oroi mulo. 7 3:7 2 Tesalonika 1:4Na tastasimitol, ning mitol kes na arpotor ana mamahatla pa akadikla, anumulo a tortorot i wunan mitol. 8 Onone anumitol a lalaun i wakak kol, anasa mulo tur rakrakai ana Leklek. 9 Mitol gas kol omulo na matana nundala God, pa mitol atong wakak teteki. Ika anumitol a atong wakak bel i sot ana numitol a tnan gasgas, anasa anumitol a gasgas i itna kol. 10 Ana moromla pa kabakiarla, mitol saran arop tar anumitol a lalaun ana niaring. Mitol araring sur mitol ir oroi ulak mulo, pa mitol ar asaer mulo anal utna ning mulo kapan suri ana numulo a tortorot.

11 3:11 2 Tesalonika 2:16Pa mitol araring mang e God a Tamandala pa nundala Leklek e Iesu, ir atalapor anumitol a ngas sur mitol ar han tetek mulo. 12 Pa mitol araring otleng sur a Leklek ir agomo anumulo a marmaris sur ir bukus pa ir tapek artalai omulo pa tetek a tarai masik otleng, lar anumitol a marmaris tetek mulo. 13 Manglarning, a Leklek ir arakrakai mulo sur mulor totoh, pa bel dir tiu tar mulo ona ta rongo, ning mulor tur na matana e God a Tamandala, ana pukakiar ning anundala Leklek e Iesu ir hanot, taum ana nuna tarai rop.