A munaur a Pas
ane Pol tetek a tarai
Tesalonika
A warwara talapor nigo
Ning e Pol i kes to e Korin i tumus a pas ne.
I longori mang dingla na tarai la urmatana nuknuk ana tinan ot ulak ane Iesu. Dingla na tarai la atongi mang e Iesu ka hanot tar. Ana pas ne e Pol i asaer la ana tinan ot ane Iesu. I atai la mang a laulau a barsan ir hanot nigo pa ir asongo a galis a tarai. Lamur e Iesu ir hanot ulak pa ir warkurai a tena laulau. E Pol i atai la otleng mang gong la palaona ngoro, lar rakrakai ana tol a wakak a toltol.
A tinan ana Munaur a Buk Tesalonika:
A kamkama buk ne (1:1-2)
E God ir warkurai a tarai (1:3-12)
A tinan ot anuna laulau a barsan pa lamur e Iesu ir hanot (2:1-17)
Lar tol a wakak a titol pa gong a palaonla i ngoro (3:1-15)
A ararop a warwara ane Pol tetek la (3:16-18)
1
Iau e Pol, Sailas pa e Timoti, mitol tumtumus tetek mulo a tarai a lotu to e Tesalonika, mulo ning mulo laun o e God e Tamandala pa a Leklek e Iesu Karisito.
A marmaris pa a bal molmol tetek mulo miting ta e God a Tamandala pa a Leklek e Iesu Karisito.
E God ir saran a warkurai na arkeles tetek a tarai
Na tastasimitol, i wakak sur mitol ar sira atong wakak tetek e God o mulo. I tostos ning mitol toli larning, anasa anumulo a tortorot i gomo, pa i gomo rakrakai, pa a marmaris artalai tetek mulo otleng i gomo amon. Ine a kamkamna ning mitol ot mitol sira atong aitna pas mulo tetek a tarai a lotu ane God ting na hananuala. Mitol sira atong aitna pas mulo ana numulo a tuntunur rakrakai pa anumulo a tortorot, na arpotor ana mamahatla ning mulo kilangi taum ana kankan ning a tarai la akadik mulo onoi.
A ututnala rop ne i apuasa i mang a warkurai ane God i tostos. Mulo kilang kankan anasa mulo agomo anuna matanitu. Manglarning e God i atong mulo mang mulo tostos sur anuna matanitu. E God i tostos, pa ir akadik la ning la akadik mulo, pa ir saran a manmanah tetek mulo ning mulo kilang kankan, pa tetek mitol otleng. E God ir toli larning, ning a Leklek e Iesu ir hanot misaot ana langit taum ana irnga na iah pa anuna na rakrakai a angelola. Ir saran a warkurai na arkeles tetek la ning bel la tasman e God, pa bel la longor ana Wakak a Warwara ana nundala Leklek e Iesu. Lar kilang a warkurai na arkeles ning bel ir rarop, i a hinirua tikin, pa lar kes masik kusun a Leklek taum ana matatar ana rakrakaina. 10 A warkurai ne ir hanot ana pukakiar ning a Leklek ir hanot sur anuna totoh na tarai lar aitna pasi pa la rop ning la tortorot onoi lar hanrawai i. Mulo otleng taum onla, anasa mulo tortorot ana warwarala ning mitol ka atai tar mulo onoi.
11 Ine a kamkamna ning mitol sira nunung o mulo. Mitol nunung tetek anundala God sur ir atong mulo mang mulo tostos sur mulor mur a ngas a lalaun ning i kabah pas mulo suri. Pa ana rakrakaina ir nangan mulo, sur mulor tolsot pas a wakak a titol ning mulo mang sur mulor toli, pa a toltolla rop ning anumulo a tortorot i tol otnani. 12 Mitol nunung larning sur dir aitna pas a risana nundala Leklek e Iesu anasa mulo muri, pa e God otleng ir aitna pas mulo. A ututnala rop ne, ir hanot anasa ana marmaris ana nundala God pa a Leklek e Iesu Karisito.