A Pas ane Pol tetek a tarai
Kolosi
A warwara talapor nigo
E Pol i kes ting na karabus tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai a lotu to e Epeses, takai tetek a tarai a lotu tumo e Pilipai, takai tetek a tarai a lotu tumo e Kolosi pa takai otleng tetek e Pilimon.
A pas ne i tumusi tetek a tarai a lotu tumo e Kolosi. I sarani tetek e Tikikus pa e Onesimus pa dia han onoi utumo e Kolosi.
Nating ning e Pol i kes to e Epeses i sune ning a tena titol a risana e Epapras utumo e Kolosi sur ir warawai tetek la (oroi Kol 1:7), pa tetek a tarai ting na naur a hanua otleng, e Laodisia pa e Hierapolis (oroi Kol 4:13). E Pol bel i han utumo e Kolosi, ika i longori mang la ka lingir a nuknukinla pa i sira araring sur la.
E Pol i tumus a pas ne anasa e Epapras i ulak teteki, pa i atai i ana asasongo na tena asaerla tumo e Kolosi. E Pol bel i mang sur al asasongo na tena asaer lar alaulau a tortorot anuna tarai Kolosi. Na tena asasongo ne la atongi mang a tarai lar lotu tetek a rakrakai a ingunla pa tetek a angelola, pa la atongi mang e Iesu bel a Nat e God, i arlar ka ana angelo. La mang otleng sur a tarai lar mur a Warkuraila ane Moses pa dir kot talilis a palaonla. Te na pas ne e Pol i asaer la mang e Iesu pa e God dia takai ka. Anundiau a matatar, a nuknukindiau, pa anundiau a toltol i arlar ka. Pa oe Iesu Karisito, e God i akes a rakrakan hanua, pa esaning a pukul a tarai a lotu. Oe Iesu ka dalar laun tikin.
A tinan ana buk Kolosi:
A kamkama buk ne (1:1-2)
E Pol i araring sur a tarai Kolosi (1:3-14)
E Karisito i itna kol (1:15-23)
E Pol i titol rakrakai (1:24—2:5)
Lar mur a tona lalaun oe Karisito (2:6—3:17)
A asaer ana wakak a toltol ning dalar toli artalai tetek dala (3:18—4:1)
A ararop a warwara ane Pol tetek la (4:2-18)
1
1 Iau e Pol, aposel ane Karisito Iesu ana nuknuk e God. Miau ma e Timoti a tasindala ana tortorot, mia tumtumus 2 tetek mulo a tarai ane God ning mulo kes ting e Kolosi, ning mulo na tastasimiau ana numulo a keskes oe Karisito, pa mulo momol ana numulo a tortorot. A marmaris pa balmolmol ta e God a Tamandala ir kes omulo.
E Pol pa e Timoti dia araring sur a tarai Kolosi
3 1:3 Epeses 1:15, 16Ning mia araring sur mulo, mia sira atong wakak tetek e God, a Tamana nundala Leklek e Iesu Karisito, 4 anasa mia ka longori mang mulo ka tortorot oe Karisito Iesu, pa mulo mang sur a taraila rop ane God. 5 Anumulo a tortorot pa marmaris ne i kamkamna ana numulo a keskes harnanai ana tortorot sur a utna ning e God i tai alari sur mulo saot na langit. A utna ning mulo ka longor tar a warwara onoi, ting na momol a warwara, i a Wakak a Warwara 6 ning i hanot tetek mulo. A Wakak a Warwara ning i gomo pa i wai te na rakrakan hanua rop, arlar larning ka suah tari na arpotor tamulo, turpasi ana pukakiar ning mulo longori pa mulo tasman momol a marmaris ane God. 7 1:7 Kolosi 4:12; Pilimon 1:23E Epapras ka asaer tar mulo onoi. I a wakak a tena titol taum omila, ning mila mang kol suri, pa momol a tena titol ane Karisito ning i tur aslang mila. 8 I ka atai tar miau ana numulo a marmaris, ning a Talngan Tabu i tabar mulo onoi.
9 1:9 Epeses 1:16, 17Ine a kamkamna mang bel mia manah ana niaring sur mulo, turpasi ana pukakiar ning mia longor a warwara omulo. Mia sira nunung e God sur ir abukus tar mulo ana tastasmai sur mulor tasman a nuknukna, pa tastasmai pa wakak a nuknuk rop ir kes omulo, ning a Talngan Tabu i sira artabar ono. 10 1:10 Epeses 1:11, 18Mia araring larne sur anumulo a lalaun ir arlar ana toltol anuna Leklek, pa mulor sira tol asaning ir gas onoi. Larning anumulo a lalaun ir suah a waimulo ana wakak a titol rop ning mulor toli, pa mulor gomo ana numulo a tastasman oe God.
11 Pa e God ir arakrakai mulo ana rakrakaila rop, ning i bukus ana matatar, sur mulor kes wowon pa mulor tur rakrakai ana mamahatla rop ning mulor pasteki. Pa mulor gas, 12 pa mulor atong wakak tetek e Tamandala, esaning i nangan mulo sur mulor tolsot sur mulor kibas a ututnala taum ana nuna tarai. A ututnala ning ka lele tari tetek la, ning la kes ting na talapor. 13 1:13 Luk 22:53; Epeses 2:2I ka alaun pas dala kusun a rakrakai ana mormorom, pa ka ben kas pas dala uting na matanitu ane Natnalik ning i mang kol suri, 14 1:14 Epeses 1:7esaning ka lou alangolango pas dala pa ka kepsen tar anundala na toltol laulau.
A keskes a leklek ane Karisito
15 1:15 2 Korin 4:4; Jon 1:18Bel dala oroi tar e God, ika e Karisito a manar e God. I a ningnigo na Nat e God pa i leklek kol tana akakesla rop. 16 Anasa e God i akes a ututnala rop ana rakrakai e Karisito: a ututnala saot na langit pa ututnala te lapiu, a ututnala ning di oroi la pa ututnala ning bel di oroi la, mange, a ingunla ning la kes na leklek, a ingunla ning la tong akes a rakrakai, a ningnigola anuna ingunla pa ingunla ning la tong akes a rakrakai sur lar warkurai. Oe Karisito, e God i akes a ututnala rop pa i akes la sur lar hanrawai e Karisito. 17 1:17 Jon 1:1; 8:58Ning e God belot i akes a ututnala rop, e Karisito ka laun, pa i tong akes a ututnala rop sur lar titol taum wakak. 18 1:18 Epeses 1:22-23; Aposel 26:23; Tatatai 1:5I ot a pukul a tarai a lotu, pa la a palaona. I a kamkama lalaun anunla, pa ningnigona ning i kamtur ulak kusun a minat, sur i ot ir leklek tana ututnala rop. 19 1:19 Kolosi 2:9Anasa e God i gas sur anuna lalaun rop ir kes oe Natnalik. 20 1:20 Epeses 1:10; 2:16Pa ana minat e Natnalik, a ututnala rop la ulak teteki sur lar kes na armoro taum onoi, a ututnala te na rakrakan hanua pa ututnala saot na langit. I tol a balmolmol ana suluk e Natnalik ning i mat saot na rakai kutus.
21 1:21 Rom 5:10; Epeses 2:12Nating mulo kes bakbak kusun e God, pa ting na nuknukimulo mulo ngeti, anasa ana numulo na toltol laulau. 22 1:22 Epeses 2:14-16; 5:27Ika onone, e God ka kibas pas mulo teteki sur mulo na halna ulak. I tol a titol ne ana palaona e Karisito ning i mat, sur ir ben otnan pas mulo na matana e God, pa mulo anuna totoh na tarai ning bel ta dur i kes omulo, pa bel dir tiu sot pas mulo on ta rongo. 23 E God ir tol a utna ne ning mulor rakrakai ana tortorot, pa mulor tur rakrakai onoi. Pa gong mulo han masik kusun a keskes a harnanai ana tortorot sur a ututnala ning e God ir toli, ning mulo ka longor tari ana Wakak a Warwara. A Wakak a Warwara ning, di ka atatai tar onoi tetek a taraila rop te na rakrakan hanua. Iau e Pol, a hanot a tena titol ana Wakak a Warwara ning.
E Pol i titol rakrakai sur a tarai a lotu
24 Onone a gas ana mamahatla ning a kilangi sur ir nangan mulo. A kilang a mamahatla te na palaok sur ar arop a mamahatla ane Karisito, ning belot i rop, sur ar nangan a tarai a lotu, la ning a palaona e Karisito. 25 1:25 Epeses 3:2, 7-8E God i suah tar iau sur iau a tena titol anuna tarai a lotu. I saran tar a titol ne tak sur ar warawai ana nuna warwarala rop tetek mulo. 26 1:26 Rom 16:25-26; Epeses 3:5, 9A warwara ne, a utna ning nating i mumun tar kusun a tarai tagun nating, ika onone e God ka apuasa i tetek anuna tarai. 27 E God i apuasa i mang, a tarai ning bel na tarai Juda, la otleng lar tasman anuna warwara, a utna ning nating i mumun tar, ning i wakak pa i bukus ana matatar. Ine a utna ning i mumun tar: E Karisito ot kaning omulo, i maining, mulo harnanai ana tortorot sur a matatar ane God ning mulor kes onoi lamur.
28 Mila warawai oe Karisito tetek a taraila rop. Mila atumarang la pa mila asaer la ana tastasman rop, sur milar saran tar la rop tetek e God, pa lar tostos rop, anasa la kaning oe Karisito. 29 1:29 Epeses 3:7, 20; Pilipai 4:13A titol rakrakai sur a utna ne ir hanot momol. A rakrakai ana tnan rakrakai e Karisito, ning i titol rakrakai te na nuk a lalaun.
1:3: 1:3 Epeses 1:15, 16
1:7: 1:7 Kolosi 4:12; Pilimon 1:23
1:9: 1:9 Epeses 1:16, 17
1:10: 1:10 Epeses 1:11, 18
1:13: 1:13 Luk 22:53; Epeses 2:2
1:14: 1:14 Epeses 1:7
1:15: 1:15 2 Korin 4:4; Jon 1:18
1:18: 1:18 Epeses 1:22-23; Aposel 26:23; Tatatai 1:5
1:19: 1:19 Kolosi 2:9
1:20: 1:20 Epeses 1:10; 2:16
1:21: 1:21 Rom 5:10; Epeses 2:12
1:22: 1:22 Epeses 2:14-16; 5:27
1:25: 1:25 Epeses 3:2, 7-8
1:26: 1:26 Rom 16:25-26; Epeses 3:5, 9
1:29: 1:29 Epeses 3:7, 20; Pilipai 4:13