A Pas ane Pol tetek a tarai
Rom
A warwara talapor nigo
Ning e Pol i kes tumo e Korin, i tumus a pas ne tetek a tarai a lotu tumo e Rom. I saran a pas tana ning a hane a risana e Pibi pa i abarani utumo e Rom (oroi Rom 16:1).
E Rom a tnan hanua kol, ning a tnan king, ning di atongi mang e Sisar i kes ia.
Ning e Pol i tumus a pas ne belot i han utumo e Rom pa belot i asaer la. Pa ana pas ne i mang sur ir asaer la ana galis a utna. Ning a tnan utna ning i mang sur lar talapor onoi i mange: A taraila rop la ka tol a laulauna pa bel tik i tostos namatana e God. Dalar tostos namatana e God ning dala tortorot o e Iesu Karisito. Pa ning dala tortorot o e Karisito, dalar laun ana tona lalaun pa dalar mur ma a Talngan Tabu. I warwara otleng ana tarai Juda, mang e God bel i duman la.
E Pol i atai la otleng mang i mang sur ir han tetek la.
A tinan ana buk Rom:
A kamkama buk ne (1:1-17)
A tarai rop la tol a laulauna pa la kapan sur a lalaun (1:18-3:20)
E God ir alaun dala anasa dala tortorot o e Karisito (3:21-4:25)
O e Karisito dala laun ana tona lalaun (5:1-8:39)
E God bel i duman a tarai Israel (9:1-11:36)
A wakak a toltol ning dalar muri (12:1-15:13)
A ararop a warwara ane Pol tetek a tarai Rom (15:14-16:27)
1
E Pol i warwara talapor ana nuna titol na aposel
1 Iau e Pol, a tena titol oros ane Iesu Karisito, a tumus a pas ne tetek mulo. E God i kabah pas iau, sur ar aposel, pa i aslang pas iau sur ar warawai ana nuna Wakak a Warwara tetek a taraila. 2 A Wakak a Warwara ne, e God ka lele nigo tar onoi, ana warwara ning anuna propetla la ka tumus tari ting na Buk Tabu. 3 A Wakak a Warwara i atai dala o e Natnalik, ning di agon pasi miting na mangis a tarai ane king Dewit. 4 Pa ana nuna kamkamtur ulak kusun a minat, a Talngan Tabu i asangani mang i a Nat e God pa i rakrakai kol. I ot e Iesu Karisito anundala a Leklek. 5 O e Karisito ot, e God i maris mila pa i saran a titol na aposel tetek mila, sur milar aleklek pas a risana. Mila sira warawai tetek a tarai rop ning bel na tarai Juda, sur lar tortorot pa lar longor onoi. 6 Mulo otleng dingla na tarai tagun la, ning e God ka kabah pas mulo, sur mulo ane Iesu Karisito.
7 A tumus a pas ne tetek mulo rop ting e Rom, ning e God i maris mulo pa i kabah pas mulo sur mulo anuna taraila.
A marmaris pa bal molmol tetek mulo ta e God a Tamandala pa tana Leklek e Iesu Karisito.
E Pol i nunung sur a tarai Rom
8 Ine a ningnigo na utna, ana risana e Iesu Karisito, a atong wakak tetek anuka God o mulo rop, anasa a tarai te na rakrakan hanua rop la warwara talapor ana numulo a tortorot. 9 A titol tetek e God ana nuka lalaun rop, ning a warawai ana Wakak a Warwara o e Natnalik, pa e God ot i tasmani mang a sira nuk pas mulo 10 ana nuk a nunungla ana taemla rop. A nunung otleng mang, ning a nuknuk ot ane God, ngandek ono bot ne ir sapang anuka ngas sur ar han tetek mulo.
11 A mang kol sur ar oroi mulo, sur ar tabar mulo ana artabarla, ning ir nangan a ingumulo, sur ir arakrakai mulo. 12 Manglarning, ning ar oroi anumulo a tortorot, pa mulo otleng mulor oroi anuka tortorot, dalar arakrakai artalai dala. 13 Na tastasikla, a mang sur mulor tasmani mang, a galis a taem, a mang sur ar oroi mulo, sur ar nangan mulo par oroi a wana nuka titol ting na numulo a lalaun, larning a oroi ting na lalaun ana maskan a tarai, ning la otleng bel na tarai Juda. Ika, tuk onone, bel a han lar pas.
14 Anuka titol ot ning e God i saran tari tak, sur ar warawai tetek a tarai ning la tasman a warwara Grik pa tarai otleng ning bel la tasmani, tetek na tena tastasim pa la ning anunla tastasman bel i itna. 15 Ine a kamkamna ning a mang kol sur ar warawai ana Wakak a Warwara tetek mulo otleng tumo e Rom.
A Wakak a Warwara i a rakrakai e God
16 Bel a meme ana Wakak a Warwara, anasa i a rakrakai e God sur ir alaun pas a taraila rop ning la tortorot. Tetek mila a tarai Juda nigo, pa onone tetek mulo otleng ning bel na tarai Juda. 17 Anasa a Wakak a Warwara i apuasa a ngas ning e God i toli, sur a tarai lar tostos namatana. A ngas ning, a tortorot ka. A tortorot sot ka miting na kamkamna tuk ana araropna. Larning di ka tumus tari ting na Buk Tabu mange, “Esining i tortorot, e God ir atongi mang a tena tostos pa ir laun.” Hab 2:4
E God i balakut tetek a tarai ana nunla a toltol laulaula
18 E God i apuasa anuna balakut misaot na langit, tetek a tarai ning bel la hanrawai e God pa la tol a laulauna, pa ana nunla na toltol laulaula, la sairas a momolna. 19 E God i balakut, anasa a ututnala ning dir tasman e God onoi, i talapor ka tetek la, anasa i ot ka atalapor tari tetek la. 20 Turpasi ana akakes ana rakrakan hanua, a tarai la oroi a ututna na akakes. I maining la tolsot pasi sur lar tasman na ginina e God, na ginina ning bel dir oroi. La tasmani mang a rakrakai e God ir kes tikin, pa i e God. I maining bel la tolsot sur lar atongi mang bel la tasman e God.
21 La tasman ot e God, ika bel la aleklek pasi larning i e God, pa bel la atong wakak otleng teteki. La nuknuk oros ka, pa a balanla i mormorom, anasa bel ta tastasman inla. 22 La atongi mang la tastasman kol, ika la hanot a longlongla ka. 23 Bel la mang sur lar lotu tetek e God ning i laun tikin, pa i bukus ana matatar. La lotu ka tetek a manarla ana tarai ning la sira mat ka, pa tetek a manarla ana manila, pa a inagoila, pa a ututnala ning la kaukawar.
24 I maining e God i noren tar la sur lar tol a dur a toltolla, larning la mang suri miting na balanla, pa lar tol a toltolla na meme artalai ana palaonla. 25 La keles sen a momolna o e God sur a asasongo. La lotu pa la nunung kama tetek a ututnala ning e God i akes tar la, pa bel ma la lotu tetek a Tena Akakes, i ning dir atong aleklek pasi onone pa lamur pa bel ir rarop. Amen.
26 Ning la toli larning, e God i noren tar la ana nunla tnan nuknuk sur a laulau a toltolla na meme. I manglarne: A gurarala la keles sen a ngas a tinaulai ning di ka akes tari, pa la taulai ulak la ot. 27 Mang otleng larning tetek a taraila, la han masik kusun a ngas a tinaulai ning di ka akes tari sur lar taulai a gurarala, pa la bukus ana tnan nuknuk sur la ulak ot, pa la tol a laulauna tetek la ulak. Bel al meme inla ning la toli larning. La ot la ka alaulau pas anunla na lalaun ana toltolla ne. Ine a warkurai na arkeles tetek la, ning i sot taum ana nunla na laulauna.
28 Ning a utna otleng, bel ma la nuk pas e God, la nuki mang a asasaer o e God i utna oros ka. I maining i noren tar la sur ir laulau a nuknukinla, pa la tol kama a ututnala ning bel i sot sur lar toli. 29 La bukus ana toltol laulau, la tol a laulauna tetek a tarai, la mang sur na utna ning lar tena gongon onoi, la mang sur lar alaulau a tarai. La bukus ana toltol na ram, la umkol a tarai, la arngaras, la asasongo, la nget a tarai. La warwara kumkumna, 30 la arle, la nget e God, la harum, la dat abarah a pukulunla, la iaunan pas la ot. La nuknuk sur a tona ngas sur lar tol a laulauna. La tabun longor tetek na tamtamanla pa kabatnanla. 31 Bel la titol na tastasman, bel la tolsot pas anunla na lelela, bel la tasman a marmaris pa wakak a toltol tetek a taraila. 32 A ngas a tarai larne, la tasman ot a warkurai ane God, mang la ning la sira tol a ututnala ne, i sot sur lar mat. Ika la toli ka, pa la malmaling sur a tarai masik otleng lar toli.