3
Anundala toltol laulau i asangani mang e God i tostos
1 Ning tik a te Juda, anuna keskes na te Juda ir nangan mangmangasa i? Pa ning tik di ka kot talilis tari ir nangan mangmangasa i? 2 I wakak kol teteki. A ningnigo na utna, e God ka suah tar anuna warwara ting na kuna tarai Juda. 3 I momol, dingla na tarai Juda bel la tortorot. Ning bel la tortorot, mangmangasa, i to pasi sur ir sairas e God sur gong i tolsot anuna warwara? 4 Bel momol! Ning a taraila rop lar asongo, a warwara ane God i momol ot. Larning a warwara tetek e God ning di ka tumus tari ting na Buk Tabu mang:
“Anum a warwara ir asangani mang u tostos.
Pa ning dir tiu u,
bel tik ir pastetek pas ta rongo.” Buk Song 51:4
5 Ning dala tol a laulauna, anundala toltol laulau i asangan momoli mang e God i tostos. Mangasa, e God i rongo ning ir balakut pa ir saran a warkurai a arkeles tetek dala? A ngas a kabah ning, i hanot miting na nuknuk a tarai ka. 6 Ika bel. Ning anuna warkurai a arkeles bel i tostos, bel ir tolsot suir warkurai a tarai mite na rakrakan hanua. 7 Ngandek tik ir atongi mang, “Ning iau a tena asasongo, anuk a toltol i asangan momoli mang a warwara ane God i momol, pa i aitna pas a risana. I maining bel i tostos sur e God ir atong iau mang a tena laulau pa ar hirua ana nuna warkurai a arkeles.” 8 Ngandek tik ir atongi mang, “Dalar tol a laulauna sur a wakakna ir hanot talapor.” Dingla na tarai la atong laulau mila pa la tiu mila mang mila asaer a tarai larne. Ika bel i momol. La ning la atong a warwara ne i sot sur lar hirua ana warkurai a arkeles ane God.
Bel tik i tostos na matana e God
9 3:9 Rom 1:18—2:24; 3:23Asaning dalar atongi ana utna ne? Mangasa, mila na tarai Juda mila ka tostos tana tarai masik? Bel i momol! Ia ka atong tari mang a te Judala pa tarai masik otleng la arlar ka. Dala rop dala kes nahai a toltol laulau. 10 3:10 Buk Song 53:1-3Larning di ka tumus tari ting na Buk Tabu mang,
“Bel tik i tostos. Bel tik ot!
11 Bel tik otleng ning i tastasim.
Bel tik i seren e God.
12 La rop la ka han masik kusun e God.
La rop bel la to pas ma ta utna.
Bel ta halinla i tol a wakakna, bel tik ot.” Buk Song 14:1-3
13 “A pahanla i sapang arlar ana kulam a minat,
pa warwara anunla i arlar ana goh a minat.
La sira atong a asasongo ana pahanla.” Buk Song 5:9
“A warwara miting na pahanla,
i arlar ana kusmapak a soi ning i sira harat amat tik.” Buk Song 140:3
14 “A pahanla i bukus ana warwara laulau pa i saran a mamahat tetek a tarai.” Buk Song 10:7
15 “La raras sur lar umkol a tarai.
16 Ting na ngasla ning la han ia, la kamar a ututnala, pa la alaulau a tarai.
17 Pa ngas sur a balmolmol, bel la tasmani.” Aisaia 59:7-8
18 “Bel la matmataut sur e God.” Buk Song 36:1
19 Dala tasmani mang, asaning a Buk a Warkurai i warwara ono, bel i warwara ana tarai ning bel a tarai Juda ka, i warwara otleng ana tarai Juda, ning la kes nahai a Warkuraila. I maining a tarai rop mite na rakrakan hanua lar tur ana warkurai ane God, pa bel tik ir puai sot pas na matana e God. 20 3:20 Buk Song 143:2; Rom 7:7; Galesia 2:16I maining bel tik ir tostos sot pas na matana e God anasa i mur anuna Warkuraila. A Warkuraila i sira asangan dala ka ana nundala na toltol laulaula.
E God i atong a tarai mang la tostos ana tortorot ka
21 Ika onone, e God ka tol a ngas sur a tarai lar tostos na matana, ika bel ana mur warkurai. A ngas ne, a Buk a warkurai ane Moses pa propetla la ka warwara talapor tar onoi. 22 3:22 Galesia 2:16A ngas ne i hanot ta e God, pa i mange: A tarai rop ning la tortorot oe Iesu Karisito, e God ir atong la mang la tostos. A tarai Juda pa tarai masik otleng la arlar ka. 23 Anasa a taraila rop la ka tol tar a toltol laulau, pa la ka kes bakbak kusun a matatar ane God. 24 3:24 Rom 5:1Ika ana marmaris ane God, e God i atong la mang la tostos. I toli larne arlar ana artabar oros ka, anasa e Karisito Iesu i lou langolango pas la. 25 E God i saran tar e Natnalik, sur ir mat pa sulukna ir kepsen a toltol laulaula anuna taraila rop ning la tortorot onoi. Pa sulukna ir arop sen a balakut ane God ning nating kaning onla. I toli larne sur ir asangan anuna tostos a toltol. Nating e God i noren tar ka a toltol laulaula anuna tarai, pa bel i warkurai la onoi, anasa i wowon taum onla. 26 Ika onone, i toli larne sur ir asangan anuna tostos a toltol, sur i ot i tostos pa esaning i atong a taraila mang la tostos ning la tortorot oe Iesu.
27 Pa asa ma dalar iaunan pas dala onoi? Bel ta utna! Mangasa, dalar iaunan pas dala anasa dala mur a Warkuraila? Bel momol! Ana tortorot ka oe Iesu, dala tostos na matana e God. 28 Anasa onone, dala tasmani mang e God i atong a taraila mang la tostos na matana, ana tortorot ka oe Iesu, pa bel ana mur warkurai. 29 3:29 Rom 10:12Mangasa, e God a God anuna tarai Juda ka, o a God anuna tarai masik otleng? Momol, ai a God anuna tarai masik otleng. 30 3:30 Lo 6:4; Galesia 3:20Anasa takai ka a God, pa ir atong na tarai Juda mang la tostos na matana ana tortorot. Mangotleng larning tetek a tarai masik, ir atong la mang la tostos ana tortorot otleng. 31 3:31 Matiu 5:17Mangasa, ning dala tortorot dala nuki mang a Warkuraila i utna oros ka? Bel momol! Ana tortorot dala asangani mang a Warkuraila a rakrakainla ot.
3:10: 3:10 Buk Song 53:1-3
3:20: 3:20 Buk Song 143:2; Rom 7:7; Galesia 2:16
3:22: 3:22 Galesia 2:16
3:30: 3:30 Lo 6:4; Galesia 3:20
3:31: 3:31 Matiu 5:17