10
A tarai Israel bel la tasman a ngas ning lar tostos ono
Na tastasikla, a mang kol sur e God ir alaun pas anuka tarai, a tarai Israel, pa sira nunung otleng larne. Anasa a tasmani ot mang, la mang kol sur lar agasgas e God, ika bel la talapor ana toltol ning ir gas onoi. Bel la anatarna pas la nahai e God, sur ir atong la mang la tostos namatana, anasa bel la tasman a ngas ning e God i asangani sur tik ir tostos namatana, pa la tohi ka sur lar asangan la mang la tostos namatana. E Karisito i tolsot pas a Warkuraila ane Moses. I maining la ning la tortorot o e Karisito lar tostos namatana e God.
E Moses i tumtumus onla ning la mur a Warkuraila, mang lar tostos mangmangasa namatana e God. I atongi mange, “Esining ir mur sot pas a Warkuraila ane Moses, ir laun.” Liwai 18:5
Pa e Moses i warwara otleng onla ning la tortorot, mang lar tostos mangmangasa namatana e God. I atongi mang, “Gong mulo nuki mang: Esi ir han usaot na langit?” I manglarning mulo mang sur mulor ben pas e Karisito ute. Pa gong mulo nuki mang: “Esi ir han purum uting na hanua anuna minatla?” I manglarning mulo mang sur mulor ben pas e Karisito kusun a minat. A kamkam a warwara ne i larne, “A warwara ane God ka milau. Kaning ot na pahamulo, pa ting na balamulo otleng.” Lo 30:12-14
Ine a warwara na tortorot ning mila warawai onoi. Ning u apuasa i ana numa warwara mang e Iesu a Leklek, pa u tortorot ting na balam mang e God ka akamtur ulak pasi kusun a minat, e God ir alaun u. 10 E God i atong u mang u tostos namatana anasa u tortorot ting na balam. Pa ir alaun u anasa u apuasa i ana numa warwara mang e Iesu a Leklek. 11 Larning di ka tumus tari ting na Buk Tabu mang, “Esining ir tortorot onoi, bel ir amei.” Ais 28:16
12 I arlar rop ka tetek a tarai Juda pa tetek a tarai masik otleng: Takai ka a Leklek anundala rop. Pa ir angisngis la rop ning la nunung teteki. 13 Larning a Buk Tabu i atongi mange, “La rop ning la nunung tetek a Leklek, ir alaun la.” Joel 2:32
14 Ika, ning bel la tortorot ana Leklek, lar nunung mangmangasa teteki? Ning bel la longor tar ta warwara onoi, lar tortorot mangmangasa onoi? Ning bel tik i atai la onoi, lar longor mangmangasa? 15 Ning bel tik i sune na tena warawai, lar han mangmangasa ana warwara talapor? Larning di ka tumus tari ting na Buk Tabu mange, “A tinan ot anunla ning la hanot ana Wakak a Warwara, i wakak kol.” Ais 52:7
16 Ika bel a taraila rop la kibas a Wakak a Warwara. Larning a propet Aisaia ka atong tari mang, “Leklek, mila warwara talapor, pa bel tik i tortorot ana numila warwara.” Ais 53:1
17 I maining a tortorot i hanot tetek a tarai ning la longor a Wakak a Warwara. A warwara ning la longori, a warwara ot ane Karisito. 18 Ika, a kabah: Mangmangasa, a tarai Israel belot la longor a Wakak a Warwara? La longori ot. Larning a Buk Tabu i atongi mang,
“A tarai mite lapiu la ka longor a elngenla* “A elngenla” i warwara ana kamis, a nangnangla pa kalang. I arlar onoi ning la warwara talapor ona matatar pa a tnan titol ane God tetek a tarai te na rakrakan hanua..
A warwara ning ka han sarara ana pukna rop ting na rakrakan hanua.” Buk Song 19:4
19 A kabah kale: I mangmangasa, a tarai Israel bel la talapor ana warwara ane God? La talapor ot. Anasa nating ot e Moses i warwara ana warwara ane God mang,
“Iau ot ar asanan tar mulo sur mulor ram sur a tarai ning bel la itna,
Par asanan tar mulo otleng sur a balamulo ir kut,
anasa ar nangan a tarai ning bel la tastasman.” Lo 32:21
20 Pa e Aisaia otleng i warwara taum ana rakrakai mang,
“A tarai ning bel la tatatai sur iau,
la ka pastek pas iau.
A asangan iau tetek la
ning bel la deke sur iau.” Ais 65:1
21 Ika, ana tarai Israel, e Aisaia i atong a warwara ane God, mang,
“A pukakiarla rop a arkabah na marmaris
tetek a tarai ning bel la longor, la na tabun longor.” Ais 65:2

*10:18: “A elngenla” i warwara ana kamis, a nangnangla pa kalang. I arlar onoi ning la warwara talapor ona matatar pa a tnan titol ane God tetek a tarai te na rakrakan hanua.