9
E Pol i balmaris sur anuna tarai
1 Bel a asongo, a atong ot a momolna ne na matana e Karisito. Pa Talngan Tabu taum ana balak dia malmaling mang a warwara ne i momol. 2 A nuknukik i mamahat kol, pa anuk a balmaris bel i manah. 3 9:3 Kisim Bek 32:32Ning ar tolsot pasi, a mang sur ar tur keles anuk a tarai, a tarai Israel, pa dir suah tar anunla warkurai a arkeles hok, pa dir kepsen iau kusun e Karisito, sur dir alaun pas la. 4 9:4 Kisim Bek 9:4La a tarai Israel, ning e God i ras pas la sur la na natnatnala. I asangan tar anuna matatar tanla, i tol tar a kunubusla taum onla, i saran tar a Warkuraila tanla, i asangan tar la ana ngas a lotu momol, pa i lele tar tanla. 5 La na mangis a tarai ane Abaram, Aisak pa e Jekop. Pa ning e Karisito i hanot a barsan momol, i hanot onla. E Karisito i warkurai a ututnala rop, pa i ot e God. Dalar atong alekleki, onone pa lamur pa bel ir rarop. Amen.
A titol ane God tetek a tarai Israel
6 Ning a atongi larne, bel a atongi mang e God bel i tolsot pas anuna lele tetek a tarai Israel. Anasa bel a tarai Israel rop, la a tarai Israel momol na matana e God. 7 Pa bel otleng la rop ning la hanot oe Abaram, la na natnat e Abaram momol. E God i atai e Abaram mange, “La ka miting na mangis a tarai ane Aisak, ning dir atong la mang anum a mangis a tarai.” Stat 21:12
8 9:8 Galesia 4:23Bel la rop ning la hanot oe Abaram, dir atong la mang na natnat e God. La ka ning di agon la ana lele ane God, la ning e God i atong la mang na natnat e Abaram momol. 9 A lele ane God i mange, “Ning a pukakiar ir sot, ar ulak, pa e Sara kar agon pas a kaklik barsan.” Stat 18:10, 14
10 Bel i ka i ning, e Rebeka i agon pas a kasang, pa ning a tamandiau ka, e Aisak, a tubundala. 11-12 Ning belot di agon e Esau pa e Jekop, e God i atai e Rebeka mange, “A ningnigo ir titol tetek a murmur.” Stat 25:23
A warwara ne i hanot ning naur a kaklik belot dia tol ta wakakna pa ta laulauna. E God i toli larning sur anuna aslang ir arlar ot ana nuknukna. E God i kabah pas esining i mang suri, bel ana ta titol ning ka tol tari. 13 Larning e God i atongi ting na Buk Tabu mang, “E Jekop a mang suri, ika e Esau a ngeti.” Malakai 1:2-3
14 I maining asa dalar atongi? Mangasa, e God bel i tol a tostos a toltol? Gong dala atongi manglarning! 15 Anasa e God i atai e Moses mange,
“Ar maris tik ning a mang sur ar marisi,
pa ar tol a wakakna tana tik ning a mang sur ar tol a wakakna teteki.” Kisim Bek 33:19
16 9:16 Epeses 2:8I maining, ning e God i aslang pas a taraila, bel i kamkamna ana nuknukinla pa ana ta titol ning la toli. Anuna aslang i kamkamna ot ana nuna marmaris. 17 Larning di ka tumus tari ting na Buk Tabu mang, e God i atongi tetek a king mitumo e Ijip mange, “A suah tar u sur king sur ar asangan a rakrakaik ning ar tolsot pas u, pa sur a taraila rop te na rakrakan hanua lar tasmani mang iau ka e God.” Kisim Bek 9:16
18 I maining e God i maris a taraila ning i mang sur ir maris la, pa i arakrakai a balan a taraila, ning i mang sur ir arakrakai a balanla sur gong la longor.
19 Sakana tik ir deken iau mang, “E God ot ning i arakrakai a balan a taraila sur gong la longor, pa i mangasa ning i tiu la? Bel tik ir tolsot sur ir sairas asaning e God i mang sur ir toli ting na nuna lalaun.” 20 9:20 Aisaia 29:16; 45:9Esi u ning u nuki mang ur keles a warwara ane God? U a barsan ka u. Ning tik i tol ta kuro ana piopap, mangmangasa, a kuro ning i to pasi sur ir atongi tetek esaning i toli mang, “Asa kamkamna ning u tol iau larne?” 21 9:21 Jeremaia 18:6Ning a tena toltol kuro i mang sur ir tol ir naur a kuro tagun ning a diah piopap ka, ir mur ot a nuknukna. Ir tol ta wakak a kuro sur a tatatnan ngasala, pa tik otleng sur a pukakiarla oros ka.
22 Mangotleng larning e God i toli tetek a tarai. I mang sur ir asangan anuna balakut pa rakrakaina. Ika kaning ot i harnanai, pa bel i saran kapit a warkurai a arkeles tetek a tarai ning la kes nahai a balakut anunai, la ning ka sang tar la sur lar hirua. 23 I toli larning sur ir asangan anuna tnan matatar tetek a tarai ning la kes nahai a marmaris anunai. La ning i sang tar la nating ot sur lar kes taum ono ting na nuna matatar. 24 Esi la? Dala ot, ning ka kabah pas dala. Mila ning tagun a tarai Juda, pa mulo ning tagun a tarai masik otleng. 25 I arlar ana warwara ane God ana tarai ning bel a tarai Israel, ning a propet Hosea ka tumus tari mang,
“A tarai ning bel anuki, ar atong la anuk a tarai,
pa la ning bel a maris la, ar maris la.” Hosea 2:23
26 Pa e Hosea i atongi otleng mange,
“Ting na hanua ning nating e God i atong tari tanla mang,
‘Mulo bel anuk a tarai,’
dir atong la mang ‘na natnat e God, ning i laun.’ ” Hosea 1:10
27 Ika ona tarai Israel, e Aisaia i warwara rakrakai mange,
“A tarai Israel la galis arlar ana woio tumo latasi,
ika a siklik tarai ka ning e God ir alaun pas la.
28 A Leklek ir tol kapit pas anuna warkurai a arkeles rop ting na rakrakan hanua.” Aisaia 10:22-23
29 Larot ning e Aisaia i atong tari nating mang,
“A Leklek i rakrakai kol,
ning bel ir noren al tarai tagun anundala mangis a tarai,
dala kar hirua rop arlar ana tarai miting e Sodom pa e Gomora.” Aisaia 1:9
A tarai Israel bel la tortorot
30 I maining asa dalar atongi ana ututnala ne? La ning bel a tarai Israel bel la rakrakai sur lar tostos na matana e God. Ika e God i atong la mang la tostos anasa ana nunla tortorot. 31 A tarai Israel la rakrakai sur lar atostos pas la ana mur warkurai, ika bel la tolsot pasi. 32 9:32 Aisaia 8:14Asa kamkamna? Anasa bel la tortorot, la nuki ka mang lar tostos anasa ana nunla na wakak a titol. La buh a hanla ana hat ning la sira buh a hanla ono. 33 9:33 1 Pita 2:6Larotning di ka tumus tari ting na Buk Tabu mang,
“Oroi! Ia ka suah tar a hat saot e Saion, a hat ning, a tarai lar buh a hanla onoi,
pa lar punga onoi.
Ika esining ir tortorot onoi, bel ir meme.” Aisaia 8:14; 28:16
9:3: 9:3 Kisim Bek 32:32
9:4: 9:4 Kisim Bek 9:4
9:8: 9:8 Galesia 4:23
9:16: 9:16 Epeses 2:8
9:20: 9:20 Aisaia 29:16; 45:9
9:21: 9:21 Jeremaia 18:6
9:32: 9:32 Aisaia 8:14
9:33: 9:33 1 Pita 2:6