2
E Iesu a lalaun a hat
I maining mulor kepsen a toltol laulaula rop, a warwara asasongo pa lalaun a asasongo, ram sur a utna ana tik masik pa urmatana warwara laulau. Mulor mang kol sur a utna na ingun ning i totoh, arlar ana kakak mermeremla la mang kol sur a polo na sus. Mulor mang sur a utna na ingun, sur mulor gomo onoi tuk ana pukakiar ning mulor kibas a lalaun tikin. Anasa mulo ka toho tar a lalaun ana Leklek, pa mulo tasmani mang a Leklek i wakak kol.
Mulor han tetek a Leklek, esaning a lalaun a hat. A taraila la kepseni, ika e God i aslang pasi, pa i wakak kol namatana. Pa mulo otleng, mulo arlar ana lalaun a hatatla, ning e God i titol o mulo sur mulor hanot a rumai ana Talngan Tabu. Mulor hanot na totoh a tena artabar tetek e God, sur mulor saran na artabar ning i hanot miting na Talngan Tabu, ning i wakak namatana e God, anasa o e Iesu Karisito. Larning di ka tumus tari ting na Buk Tabu larne,
“Oroi i, ia ka suah tar a hat saot e Saion.
A hat ning a aslang pasi sur ir a wakak a hat kes, ning di tol a rumai saot ono.
Pa esining ir tortorot onoi, anuna tortorot bel ir ame i.” Ais 28:16
Tetek mulo ning mulo tortorot, a hat ning i wakak, ika tetek la ning bel la tortorot,
“A hat ning na tena tol rumai la kepseni,
i ot ning a hat kes, ning di tol a rumai saot ono.” Buk Song 118:22
“A hat ning, a tarai lar buh a hanla onoi,
pa lar punga onoi.” Ais 8:14
La buh a hanla onoi, anasa bel la longor ana warwara ane God. Ning la toli larning, anuna warwara ning ka atong tari nating i sot onla.
Ika mulo na tarai a aslang, na tena tuntun artabar tetek a King, mulo na totoh a mangis a tarai, pa mulo na tarai ane God. E God ka kabah pas mulo miting na mormorom sur anuna talapor ning i wakak kol, sur mulor warwara talapor ana anun na wakak a titol. 10 Nating bel mulo na tarai ane God, ika onone mulo anuna tarai. Nating bel mulo kibas a marmaris ane God, ika onone mulo ka kibasi.
11 Na halalik, mulo kes na wasira te na rakrakan hanua, bel anumulo a hanua ne. I maining a nunung mulo, sur gong mulo mur na laulau a nuknuk, ning la harum taum ana ingumulo. 12 Ika mulor tol a wakak a toltol na arpotor tanla ning bel la tortorot, sur la ning la tiu mulo mang mulo tol a laulaula, lar oroi anumulo na wakak a titol, pa lar atong leklek pas e God ana pukakiar ning ir hanot ono.
Mulor anatarna pas mulo tetek a ningnigola
13 Mulor anatarna pas mulo tanla rop ning la tong akes a warkurai te lapiu. Mulor toli anasa a Leklek i mang suri. Mulor anatarna pas mulo tetek a king, esaning a tnan ningnigo ting na matanitu. 14 Pa mulor anatarna pas mulo otleng tetek na tena warkurai ning a king i sira sune sen la, sur lar warkurai a tarai ning la tol a laulau, pa lar aitna pas a tarai ning la tol a wakakna. 15 Anasa e God i mang sur mulor tol na wakak a titol, sur mulor sairas na warwara oros ka ana tarai ning bel la tastasman. 16 Mulo ka langolango, ika gong mulo nuki mang mulo ka langolango sur mulor tol a laulau pa mulor nuki mang i wakak ka. Mulor laun arlar larning mulo na tena titol oros ane God. 17 Mulor hanrawai a tarai rop. Mulor mang sur na tastasimulo ana tortorot, mulor matmataut sur e God, pa mulor hanrawai a king.
Dalar mur a toltol ane Iesu
18 Mulo na tena titol oros, mulor sira anatarna pas mulo tetek anumulo na ningnigo taum ana hanrawai. Bel mulor anatarna pas mulo ka tetek la ning la wakak pa la sira maris mulo, mulor anatarna pas mulo otleng tetek la ning i rakrakai na magiranla tetek mulo. 19 Ning bel mulo tol ta laulau a utna, ika mulo kilang a mamahat kusun a tarai, e God ir gas o mulo ning mulo mur a nuknukna pa mulor tur rakrakai. 20 Ning di um mulo ana numulo na toltol laulau ot, pa mulo tur rakrakai, e God bel ir aitna pas mulo. Ika ning mulo tol a tostos a toltol, pa di akadik mulo onoi, e God ir gas o mulo ning mulo tur rakrakai.
21 E God ka kabah pas mulo sur mulor tur rakrakai ning mulo kilang na mamahat. Anasa e Karisito i kilang a kankan sur mulo, pa ka tol tar a manar tamulo, sur mulor mur a kiuna.
22 “Bel i tol tar ta toltol laulau,
pa bel i atong tar ta asasongo na warwara.” Ais 53:9
23 Ning di atong laulau i, bel i kelesi. Ning di akadiki, bel i balakut pa bel i atong tar ta warwara mang ir alaulau la. I noren tari ot na kuna e God, esaning anuna warkurai i tostos. 24 E Karisito ot i kibas pas anundala na toltol laulau ana palaona ning i mat saot na rakai kutus, sur dalar mat kusun a toltol laulau, pa dalar laun sur a tostos a toltol. Pa ana hirua ting na palaona, i alangolango pas mulo. 25 Anasa nating mulo han rongo arlar ana sipsipla, ika onone mulo ka han ulak tetek anumulo Tena tai alar anuna sipsipla, pa Tena tai alar ana ingumulo.