13
E Pol i atumarang la
1 Ine a munatol a tinan anuki tetek mulo. Pa di ka tumus tari ting na Buk Tabu mang, “Ning ir naur o ir natol anunla a warwara i takai ka on ta utna, anunla a warwara i momol.” Lo 19:15
2 Ana nuk a munaur a tinan ot tetek mulo, ia ka atumarang tar mulo ana numulo na toltol laulaula. Pa onone ning a kes masik, ar atai mulo ulak ot ana utna ne: Lamur, ning ar hanot, ar warwara rakrakai tetek la ning belot la lingir a nuknukinla kusun anunla na toltol laulaula tagun nating, pa tetek esi otleng ning i tol a toltol laulau. 3 Mulo mang sur mulor tasman momoli mang a warwara ana warwara ane Karisito, gepi? A rakrakai e Karisito bel i natarna, i sira titol napirimulo ana rakrakai. 4 I momol, ning di sai ahat e Karisito saot na rakai kutus, bel ta rakrakaina. Ika ana rakrakai e God ot, i laun ulak. Manglarne belal rakrakaim mila taum o e Karisito, ika mila laun taum onoi ana rakrakai e God, sur milar titol tetek mulo.
5 Mulor oroi anumulo a lalaun, ning anumulo a tortorot i momol o bel. Mulor toho a lalaun anumulo. Mulo tasmani mang a lalaun ane Karisito Iesu i kes omulo, gepi? Ning bel, anumulo a tortorot bel i momol. 6 A tortorot mang mulor tasmani otleng mang mila laun momol ana tortorot ane Karisito. 7 Pa onone, mila nunung tetek e God mang gong mulo tol ta laulauna, bel sur a taraila lar oroi i mang mila na tostos a taraila, ika sur mulor tol ka a ututnala ning i tostos. Ning a taraila la nuki mang bel mila tostos, i wakak ka. 8 Bel milar tol ta utna ning ir sairas a momolna ane God, milar muri ka. 9 Ning mulo rakrakai pa mila bel mila rakrakai, mila gas ka. Pa mila nunung sur mulor tostos ana numulo a tortorot. 10 Ine a kamkamna ning a tumus na ututnala ne tetek mulo ning belot a hanot. Pa ning ar hanot, bel ar warwara ana rakrakai a warwara tetek mulo, pa bel ar warkurai mulo ana warkurai ning a Leklek i ka saran tari tak. I saran tari tak sur ar arakrakai mulo onoi, bel sur dir alaulau mulo onoi.
A ararop a warwara
11 Anuk a ararop a warwara ne: Na tastasimila, mulor gas! Mulor atostos mulo, mulor mur anuk a warwara, ir takai ka a nuknukimulo, pa mulor kes na molmol artalai. Pa e God ning i sira saran a marmaris pa a bal molmol ir kes taum omulo.
12 Ning mulo arpastek, mulor maris artalai mulo taum ana argoro a marmaris, pa mulor toli ana totoh a toltol.
13 A taraila rop ane God ning la kes taum hok la saran anunla na marmaris tetek mulo.
14 A marmaris anun a Leklek Iesu Karisito, pa a marmaris ane God, pa a keskes taum ana Talngan Tabu ning i dat taum dala, ir kes taum omulo rop.