1 18:1 Luk 22:24Ana taim ning, a kakak a asaerla la han tetek e Iesu, pa la dekeni mang, “Esining i leklek kol ana matanitu misaot na langit?” 2 I kabah pas ning a kaklik teteki, i atur potor tari tanla, 3 18:3 Matiu 19:14; Mak 10:15; Luk 18:17pa i atongi mang, “A atong momoli tamulo, ning bel mulor lingir a nuknukimulo sur mulor arlar ana kakakla, bel mulor tolsot pasi sur mulor kas ana matanitu misaot na langit. 4 Esining i anatarna pasi, arlar ana kaklik ne, i leklek kol ana matanitu misaot na langit.

5 18:5 Matiu 10:40; Luk 10:16; Jon 13:20“Esining ir gas pas ta kaklik larne ana risak, i gas pas iau. 6 Ika, ning tik ir ben rongon ta halin a kakakla ne, ning i tortorot hok, ir laulau kol a warkurai teteki tan tik ning dir dot tar ta tnan hat ting na ruana, pa dir migen murungi sa na laman.

7 “Ir laulau tetek a tarai mite na rakrakan hanua, anasa ana ututnala ning i dat a tarai sur lar punga ana laulau. A ututnala ning ir hanot ot, ika ir laulau kol tetek esining i tol otnan pasi. 8 18:8 Matiu 5:29-30Ning a kum, o a ham ir ben rongon u, ur kutus seni pa ur migen seni. Ir wakak ning ur kas uting na lalaun tikin a takumut ka, sur gong di migen u taum ana naur a kum, pa naur a ham, uting na tnan iah ning bel i sira rop. 9 Ning a matam ir ben rongon u, ur liok seni pa ur migen seni. Ir wakak ning ur kas ana lalaun tikin ana takai a matam ka, sakana dir migen u taum ana naur a matam rop uting na tnan iah ning bel i sira mat.

10-11 18:10-11 Hibru 1:14“Gong mulo oroi purpurum pas ta halin na kakakla ne. A atai mulo, anunla na angelola saot na langit la sira oroi a patar e Tata ning i kes saot na langit.*18:10-11 Dingla na tena tastasmai ana Buk Tabu la nuki mang dingla na warwara otleng i kes te na ves ne. I larne: A Nat a Barsan i hanot sur ir alaun la ning la ka rongo.

12 “Asa a nuknukimulo? Ning ta barsan anuna ta mar a sipsip, pa ta halinla i rongo, i mangasa, bel ir han kusun a siuk a bonot pa pisir siuk tingia na mangirla, pa ir tai sur takai ning i rongo? 13 A atong momoli tamulo, ning kar pastek pasi, a gasgas anunai ono, ir itna tana gasgas anunai ana siuk a bonot pa pisir siuk ning bel la rongo. 14 Larka otleng ning, a Tamamulo ning i kes saot na langit, bel i mang sur ta halin a kakakla ne ir hirua.

15 18:15 Luk 17:3; Galesia 6:1“Ning e tasimlik i tol a toltol laulau tetek u,†18:15 Dingla na tena tastasmai ana Buk Tabu la nuki mang e Matiu bel i tumus a warwara “tetek u”. La nuki mang tik masik i tumus tari lamur. ur han teteki, pa mu ka mur kes. Pa ur apuasa anuna rongo teteki. Ning ir longor u, u ka amoro ulak pasi. 16 18:16 Lo 19:15; Jon 8:17Ning bel ir longor u, ur ben ulak pas tik o ir naur sur diar nangan u. Anasa a Buk Tabu i atongi larne, ‘Ning ir naur o ir natol, anunditol a warwara na artitiu i takai ka, anunditol a warwara i momol.’ 17 Ning bel ir longor diau, ur apuasa i tetek a tarai a lotu. Ning bel ir longor otleng a tarai a lotu, i wakak sur ur oroi i arlar o esaning bel a tena tortorot, o arlar ana tena los totokom.

18 18:18 Matiu 16:19; Jon 20:23“A atong momoli tamulo, asaning mulo kubusi te na rakrakan hanua, dir kubusi otleng saot na langit, pa asaning mulo paki te na rakrakan hanua, dir paki otleng saot na langit. 19 18:19 Mak 11:24; Jon 15:7A atongi otleng tamulo, ning ir naur omulo te na rakrakan hanua dia malmaling ana ta utna ning dia nunung suri, e Tata ning i kes saot na langit ir tolsoti ot tetek diau. 20 Ning ir naur o ir natol ditol kes taum ana risak, iau ar kes taum onditol.”

21 E Pita i han tetek e Iesu, pa i dekeni mang, “Leklek, ar munaisa na nuk duman sen a toltol laulau ning a tasiklik i toli tetek iau? Mais a taim?” 22 18:22 Luk 17:4E Iesu i kelesi mang, “Bel a atongi tam mang mais a taim ka. A atongi mang mais a bonot pa pisir mais a taim.

23 “Oroi i, a matanitu misaot na langit i arlar ana king, ning i mang sur anuna tena titol orosla lar atostos a mani ning la dinau pasi tana. 24 Ning i turpas a deke, di ben otnan takai a tena titol oros teteki. A tena titol ning i dinau pas ning a bonot a rip a mani, 25 ika bel ta mani sur ir kelesi ono. Pa anuna leklek i arsune sur dir siuran a barsan ning, taum oe nuna hane, pa na natnatna, pa nuna ututnala rop, sur dir keles a mani ning ono. 26 Pa tena titol ning, i kes ana bokona hana na matan anuna leklek, pa ka nunungi mang, ‘Ur noren sen iau kaba, lamur ar keles rop anum na mani.’ 27 Pa leklek anuna tena titol ning i marisi, pa ka atai i mang, ‘Ur han. Gong kama u kelesi.’

28 “Ning a tena titol oros i purum utumo lapiu, i han barat a tena titol oros, ning nating i dinau pas ka ning a bonot a mani tana. I tong akes pasi, i bing a pogolna, pa ka atai i mang, ‘Ur keles anuk a mani ning u dinau pasi.’ 29 A halna ning i kes ana bokona hana na matana pa ka nunungi mang, ‘Ur noren sen iau kaba, lamur ar keles anum a mani.’ 30 Ika bel i longor pasi. I beni pa i akas tari ting na karabus, tuk ning ir keles a mani ning i dinau pasi. 31 Dingla na tena titol oros la oroi a toltol ning, pa la kilang laulaui. La han tetek anunla a leklek, pa la atai i ana ututnala ning a tena titol oros ka tol tari.

32 “Anuna leklek i kabah pasi, pa ka atai i mang, ‘U a laulau a tena titol oros. A noren sen u sur gong ma u keles a mani ning u dinau pasi tak, anasa u nunung iau. 33 I mangasa ning bel u maris a halim arlar hok ning a maris u?’ 34 18:34 Matiu 5:25-26Anuna leklek i balakut teteki, pa i saran tari tetek na tena tai alar ting na karabus sur lar akadik laulau i tuk ning ir keles a manila rop ning i dinau pasi.

35 18:35 Matiu 6:15; Mak 11:25; Epeses 4:32; Kolosi 3:13“E Tata ning i kes saot na langit ir toli otleng larning tetek mulo taktakai, ning bel mulo nuk duman momol sen a toltol laulau ning na tastasimulo la tol tari tetek mulo.”