1 Ana kobot ning ot ana ningnigo na pukakiar ana wik, kaning ot i mormorom, e Maria Magdalen i hanot ting na kulam a minat. I oroi mang di ka lakir sen a tnan hat kusun a taman a kulam a minat. 2 I dun tetek e Saimon Pita pa a kaklik asasaer ning e Iesu i katnani, pa i atai diau mange, “Di ka kepsen pas a Leklek kusun a kulam a minat, pa bel mila tasmani mang di aborbori taha.”

3 E Pita pa a kaklik a asaer ning, dia han sur a kulam a minat. 4 Dia rop dia dun, ika ning a halindiau i dun ot nigo ta e Pita uting na kulam a minat. 5 I roh purum, pa i sidok pa i oroi a kaenla kaning ia, ika bel i kas. 6 Ning e Saimon Pita i hanot murmur tana, i kas uting na kulam a minat, pa i oroi a kaenla kama kaning la borbor tar. 7 Ika a kaen ning di iris tar a pukul e Iesu ono, bel i kes taum on dingla na kaen, di ka in tari pa di suah masik tari. 8 Pa a kaklik asasaer ning i nigo ot tar uting na kulam a minat, i otleng i kas. I oroi pa i tortorot. 9 Belot dia talapor ana warwara na Buk Tabu mang e Iesu ir kamtur ulak kusun a minat. 10 Pa naur a kaklik asasaer dia ulak sur a hanua.

11 E Maria Magdalen i tur tumolapiu ana kulam a minat pa i domos. Ning kaning ot i domos, i roh purum pa i sidok uting na kulam a minat. 12 I oroi pas naur a angelo kaning ia, dia mermer ana kokok a kaenla, pa dia kes ting na pukna ning di aborbor tar a minat e Iesu ono. Ning i kes ting na ululnge, pa ning a halindiau i kes ting na kamkama. 13 Dia dekeni mange, “Wan, u domos sur asa?” I keles diau mange, “La ka los masik pas anuka Leklek, pa bel a tasmani mang di aborbori taha.”

14 Ning i gilam, i oroi e Iesu kaning i tur tingia, ika bel i oroi lalani mang e Iesu ot ning. 15 E Iesu i dekeni mange, “Wan, u domos sur asa? U tai sur esi?” E Maria i nuki mang a barsan ning i a tena tai alar ana barim, pa i atai i mange, “Lak, ning u los masik pas a minat e Iesu, ur atai iau mang u aborbori taha, sur ar han pa ar los pasi.” 16 E Iesu i kabahi mange, “Maria!” E Maria i gilam teteki pa i kabahi ana warwara Hibru mange, “Raboni!” a kamkamna mang a Tena Asaer.

17 E Iesu i atai i mange, “Gong u tong a palaok, anasa belot a han kas usaot tetek e Tata. Ika ur han tetek na tastasikla, pa ur atai la mang, ar han usaot tetek e Tata pa e Tamamulo, tetek anuka God pa anumulo a God.” 18 E Maria Magdalen i han pa i atai a kakak a asaerla mange, “Ia ka oroi tar a Leklek.” Pa i atai la otleng ana warwarala ning e Iesu i atai tari ono.

19 A rahmorom, ana ningnigo na pukakiar ana wik, a kakak a asaer la kes taum, pa la tagar alar la tingui narumai, anasa la matatan a Judala. Pa e Iesu i turot na arpotor inla, pa i atai la mange, “A bal molmol tetek mulo.” 20 Ning i atong tari larne, i asangan naur a kuna pa a kabarangragaina tanla. A kakak a asaerla, la gas kol ning la oroi a Leklek. 21 E Iesu i atong ulaki tanla mange, “A bal molmol tetek mulo. E Tata i sune iau, mang otleng larning ar sune mulo.” 22 Ning ka atong tar a warwara ne, i wus a wuwu na pahana onla, pa i atai la mange, “A Talngan Tabu ne, mulor kibasi ting na lalaun anumuloi. 23 Ning mulor nuk duman sen a toltol laulaula anuna tik, e God otleng ir kepsen seni kusuni. Ning bel mulor nuk duman sen a toltol laulau anuna tik, e God otleng bel ir kepsen seni kusuni.”

24 E Tomas, ning di atongi otleng mang a Kasang, i ning a halin a bonot pa pisir naur a kakak a asaerla, bel i kes taum onla ning e Iesu i turot tetek la. 25 A kakak a asaer la atai i mange, “Mila ka oroi tar a Leklek!” Ika e Tomas i atai la mange, “Ning bel ar oroi tar a ngena barbar ana naur a kuna pa bel ar subaran tar a pitlai kuk onoi, pa bel ar subaran a kuk ting na kabarangragaina, bel ar tortorot.”

26 Ning a wik alari, a kakak a asaer la kes taum ulak ting narumai, la taum o e Tomas. La tagar alar pas la. Ika e Iesu i turot na arpotor inla, pa i atai la mange, “A bal molmol tetek mulo!” 27 Lamur i atai e Tomas mange, “Subaran a pitlai kum ute, pa ur oroi naur a kuk. Atostos a kum ute, pa ur subarani ana kabarangragaik. Pa gong ma u urmatana nuknuk, ur tortorot ka.” 28 E Tomas i atai i mange, “Nuk a Leklek pa nuk a God!” 29 E Iesu i atai i mange, “U bot tortorot anasa u oroi iau. La ning bel la oroi iau pa la tortorot, la angis.”

30 E Iesu i tol a galis a akinalang otleng namatana anuna kakak a asaerla, ning bel di tumusi ana buk ne. 31 Ika di tumus pas ka a ututnala ne, sur mulor tortorot mang e Iesu i a Karisito, a Nat e God. Pa ning mulor tortorot onoi, mulor kibas ot a lalaun ana risana.