3
E Iesu i leklek ta e Moses
I maining na tastasikla ning e God i kabah pas mulo sur mulo anuna tarai, mulor nuk akes e Iesu. Esaning Aposel pa a ningnigo na tena artabar tetek e God ning dala tortorot onoi pa dala warwara talapor ono. E God ka aslang tari sur a titol ne, pa i momol onoi, larning e Moses i momol ana nuna titol na arpotor ana tarai ane God. A hanrawai ning di sarani tetek a barsan ning i tol a rumai, i itna kol tana hanrawai ning di sarani tetek a rumai ning i toli. I mang otleng larning, a hanrawai ning di sarani tetek e Iesu i itna kol tana hanrawai ning di sarani tetek e Moses. Na rumai taktakai rop taktakai barsan i toli, ika e God i tol a ututnala rop. E Moses, i a tena titol oros ane God, pa i momol ana nuna titol ting na rumai ane God. I warwara talapor nigo tar ana ututnala ning e God ir warwara talapor ono lamur. Ika e Karisito, i a Nat e God pa i momol ana nuna titol ning i tai alar a rumai ane God. Ning dala tur rakrakai ana tortorot, pa bel dala matmataut, pa dala harnanai sur a ututnala ning e God ir toli, dala a rumai ane God.
La ning bel la tortorot bel lar kas ting na hanua na manah ane God
Dala a tarai ane God, dalar mur a warwara ana Talngan Tabu ning i atongi larne,
“Onone ning mulo longor a elngena e God,
gong mulo arakrakai alar a balamulo
arlar larning na tumtubumulola nating la toli,
ning la gilam ris,
ana raula ning la kes ting na hanua bel, pa la lar iau.
La lar iau tingia,
pa la oroi ot anuk na titol ana diat a bonot a rau.
10 Ine a kamkamna ning a balakut tetek a tarai ning,
pa a atongi larne,
‘A nuknukinla i han rongo bolbolos,
pa bel la mur anuka ngas.’
11 I maining, a balakut pa a lele larne,
‘Bel lar kas ting na nuka hanua na manah.’ ” Buk Song 95:7-11
12 Na tastasikla, mulor tai alar mulo, sur gong tik o mulo a nuknukna ir mur a toltol laulau pa bel ir tortorot, pa ir han masik kusun e God, ning i laun. 13 Mulor warwara na harnangai artalai tetek mulo, ana pukpukakiarla rop ning di atongi mang “onone.” Mulor toli larning, sur gong a toltol laulau ir asongo pas tik o mulo, pa ir arakrakai alar a balana. 14 Dala o e Karisito, ning dalar tur rakrakai ana tortorot tuk ana araropna, arlar larning dala turpasi nating. 15 Larning di ka atong tari ting na Buk Tabu larne,
“Onone ning mulo longor a elngena e God,
gong mulo arakrakai a balamulo,
arlar larning na tumtubumulola nating la toli,
ning la gilam ris kusun iau.” Buk Song 95:7-8
16 Esi la ning la longor a elngena e God, ika la gilam ris? La rop ning e Moses i ben purum pas la mitimo e Ijip. 17 Esi la ning e God i balakut tetek la diat a bonot a rau? La ning la tol a toltol laulau pa la mat ting na hanua bel. 18 Esi la ning e God i lele mang bel lar kas ting na nuna hanua na manah? La ning bel la mur anuna warwara. 19 I maining dala oroi mang bel la tolsot pasi sur lar kas, anasa bel la tortorot.