1 Ning e Iesu i han purum misaot na mangir, a galis a kunum a tarai la muri. 2 Ning a barsan, a lepra, i han teteki, i kes ana bokona hana ting napirna, pa i atongi mang, “Leklek, ning u mang, ur tolsot sur ur alangolango pas iau.” 3 E Iesu i tuslan a kuna, pa i tong a palaona, pa i atongi tana mang, “A mang ot, ur langolango.” Ono otning a lepra i rop kusuni. 4 8:4 Wok Pris 14:1-32; Matiu 9:30; Luk 17:14Lamur e Iesu i atongi tana mang, “Gong u atai tar tik ono. Ur han pa ur asangan u tetek a tena artabar tetek e God, pa ur saran a artabar tetek e God larning e Moses ka atong tari. Ning ur toli larne, ir talapor tetek a taraila mang a palaom ka wakak ulak.”

5 Ning e Iesu ka hanot tumo e Kapernaum, ning a ningnigo anuna tena harumla mitumo e Rom i han teteki, pa i atai i sur ir nangani. 6 I atongi mang, “Leklek, ning a tena titol anuki kanumo na rumai i borbor, a palaona rop i mat, pa i kilang a tnan kankan kol.” 7 E Iesu i atongi tana mang, “Ar han par alangolango pasi.” 8 A ningnigo ning i kelesi mang, “Leklek, bel a tostos sur ur kas ting na rumai ngasik. Ur atong ta warwara ka, pa anuk a tena titol ir langolango. 9 Anasa iau a barsan ning a sira longor ana warkurai anunla ning la leklek tak, pa di saran tar a warkurai otleng tak sur ar nigon a tarai a harum. Ning ar atongi tana tik mang, ‘Ur han,’ ir han ka. Pa tetek tik otleng larne, ‘Ur han ute,’ ir han ka ute. Pa tetek anuk a tena titol oros mang, ‘Ur tol a utna ne,’ ir toli ka.”

10 Ning e Iesu i longor anuna warwara, i kulkulan kol onoi, pa i atongi tetek a tarai ning la muri mang, “A atong momoli tamulo, bel a oroi ta te Israel ning anuna tortorot i itna arlar ana barsan ne. 11 8:11 Luk 13:29A atai mulo mang kaning lamur a galis a tarai lar han miting na matana tobar pa matana labur, pa lar kes taum oe Abaram, e Aisak pa e Jekop ana ngasa ting na matanitu saot na langit. 12 8:12 Matiu 22:13; 25:30; Luk 13:28Ika, a tarai Israel ning lanigo e God i aslang pas la sur lar kes ana nuna matanitu, ir lu purum sen a galis kusun la uting na mormorom. Pa lar tangtangis pa lar arngingit ngesenla tingia.” 13 Pa e Iesu i atongi tana ningnigo anuna tena harumla mang, “Ur han ka. Dir tol a utna ot ning u tortorot suri.” Ana taim ot ning anuna tena titol i langolango kakat.

14 E Iesu i kas uting na rumai ane Pita, pa i oroi a hane, a anmuna e Pita, i sasam, a palaona i laplapang, kaning i borbor ting na logo. 15 E Iesu i tong a kuna, pa laplapang i rop kakat kusuni. I kamtur, pa i tabar e Iesu ana utna na hangan.

16 Ning a kamis ka sup tar, di ben otnan a galis a tarai, ning a motla kaning onla, tetek e Iesu. I kepsen a motla ana warwara ka, pa i alangolango pas la rop, ning la sasam. 17 A utna ne i hanot sur dir tolsot pas a warwarala, ning a propet Aisaia ka warwara tar ono mang,

18 Ning e Iesu i oroi a kunum a tarai ning la tur talilis pasi, i atongi tana anuna kakak a asaerla mang, “Dalar han utumo na ris a puka tasi.” 19 Pa ning a tena asaer tagun a warkurai i han teteki, pa i atongi tana mang, “Tena Asaer, ar mur u uting na hananuala rop ning ur han ia.” 20 8:20 2 Korin 8:9Pa e Iesu i atongi tana mang, “Na rokoio na pap anunla na tung ot, pa manila otleng anunla na pios ot, ika a Nat a Barsan bel ta pukna sur ir borbor onoi.” 21 8:21 1 King 19:20Pa ning a barsan otleng, tagun anuna tarai a asaer i atongi tana mang, “Leklek, ur noren sen iau kaba sur ar han, sur ar por sen tar e tata.” 22 Ika e Iesu i atongi tana, “Ur mur iau, pa ur noren sen a minatla lar por anunla na minatla.”

23 E Iesu i kas ana mon, pa anuna kakak a asaerla la kas namurna. 24 8:24 Buk Song 4:8Lamur a rakrakai a wuwu i hanot kulkulan pa i ragati tetek la ting na puka tasi. A top i takube saot na mon. Ika e Iesu i borbor duman, 25 pa la han teteki, la amata pasi, pa la atai i mang, “Leklek, ur alaun dala. Dala kar hirua.” 26 8:26 Matiu 14:31; Buk Song 89:9Pa i atongi tanla mang, “Anumulo a tortorot i natarna kol. Sur asaning mulo matmataut?” I kamtur pa i sairas a wuwu pa top, pa i mililo rop. 27 Pa kakak a asaerla la kulkulan ono, pa la atongi mang, “Esi na ngas a barsan momol ne? A wuwu pa top dia longor tana!”

28 Ning e Iesu i sot tumo na ning a ris a tasi, ting na papar anuna tarai Gadara, naur a barsan ning a motla la solong diau, dia han miting na kulam ngas a minatla, pa dia han barati. Dia ngalngaliah kol, pa bel tik i sira han bolos tingia na ngas ning. 29 8:29 Mak 1:24; Luk 4:41Dia woiwoi mang, “Nat e God, asa u mang ur toli omiau? I mangasa, u han ute sur ur akadik mila ning belot a pukakiar a warkurai i sot?” 30 A kaba liur a boroi la hangan milau ka tingia. 31 Pa motla la nunung rakrakai e Iesu mang, “Ning ur kepsen mila, ur sune kas tar mila uting na liur a boroi.” 32 E Iesu i atongi tanla mang, “Mulor han!” Pa motla la purum kusun naur a barsan ning, pa la kas tar ana boroila. A boroila la liu purum uting na palis sur utumo na puka tasi, pa la dom rop.

33 A tarai ning la tai alar a boroila ning, la dun ulak sur a hanua ngasinla. Ning la hanot, la atatai ana ututnala rop ning i hanot, pa ondiau otleng, ning a motla la solong diau. 34 A tarai rop miting na hanua ning, la han sur lar oroi e Iesu. Ning la ka oroi tari, la nunungi sur ir han miting na nunla papar.