7
Gong mulo warkurai atoltol ana tik
(Lk 6:37-38, 41-42)
“Gong mulo warkurai a toltol ana tik, sakana e God ir warkurai a toltol anumulo. Anasa e God ir warkurai mulo arlar larning mulo warkurai tik. Pa a ngas a warkurai ning mulo warkurai tik ono, i ot ning e God ir warkurai ulak mulo ono. Sur asaning u oroi pas ka a beren kaning namatana e tasimlik, pa bel u nuk pas a puka rakai kaning na matam? Ning a puka rakai kaning na matam, ur atong mangmangasa i tetek e tasimlik mang, ‘Ar kepsen a beren kusun a matam’? U a tena asasongo, ur kepsen nigon a puka rakai kusun a matam, pa ur tai wakak, sur ur kepsen a beren kusun a matana e tasimlik.
“Gong mulo tabar a papla ana utna ane God, sakana lar talingir, pa lar arat gingini mulo. Pa gong mulo minggen anumulo a sar tetek a boroila, sakana lar pas gingini i ka ana hanla.
Mulor nunung pa e God ir tabar mulo
(Lk 11:9-13)
“Mulor nunung, pa dir tabar mulo, mulor sereni, pa mulor pasteteki, mulor pinpidir, pa dir sapang pas mulo. Anasa la rop ning la nunung dir tabar la, pa esining i sereni ir pasteteki, pa esining i pinpidir, dir sapang pasi.
“Esi na halimulo, ning e natnalik ir nunungi sur ta bret, ir tabari ka ana hat? 10 Pa ning ir nunungi otleng sur ta sis, ir tabari ka ana soi? 11 Mulo na laulau a tarai, ika mulo tasman ot a wakak a artabarla sur mulor tabar na natnatumulola ono. Ning mulo sira toli larne, i momol kol mang, e Tamamulo ning i kes saot na langit ir saran a wakak a ututnala tetek esining ir nunungi. 12 A ututnala rop ning mulo mang sur a tarai lar toli tetek mulo, mulo otleng, mulor sira toli tetek la. Ine a kamkama warkurai ane Moses, pa asasaerla ana propetla.
A ngas sur a lalaun pa ngas sur a inirua tikin
(Lk 13:24)
13 “Mulor kas ana natar a taman lik. Anasa a taman pa ngas ning i han sur a hinirua tikin, i palar pa i langolango, pa galis a tarai kol la sira kas ono. 14 Ika a taman pa ngas ning i han sur a lalaun, i natarna, pa silik tarai ka la sira pastek pasi.
A atumarang ana asasongo na propetla
(Lk 6:43-44)
15 “Mulor tumarang ana asasongo na propetla. La sira han tetek mulo ana wakak a gininla arlar ana sipsipla, ika tingia na balanla, la mang sur lar alaulau mulo arlar ana ngalngalia na papla. 16 Mulor oroi lalan a asasongo na propetla ana gininla. I mangasa, dir git pas ta wana wain miting na kadas, pa ta wana fig miting na rosros? Bel! 17 Larka otleng ning a wakak a rakaila rop la sira suah a wakak a wanla, ika a laulau a rakaila rop la sira suah a laulau a wanla. 18 A wakak a rakai bel ir suah ta laulau a wana, pa a laulau a rakai otleng bel ir suah ta wakak a wana. 19 A rakaila rop ning bel la suah a wakak a wanala, dir ting sen la, pa dir minggen la ting na iah. 20 Manglarning, mulor oroi lalan a asasongo na propetla ana gininla.
A Leklek ir puai mang, “Bel a tasman mulo”
(Lk 13:25-27)
21 “Belsur la rop ning la atong iau mang, ‘Leklek, Leklek,’ lar kas uting na matanitu saot na langit. La ka, ning la sira mur a nuknuk e Tata, ning i kes saot na langit, lar kas uting na nun a matanitu. 22 Ana pukakiar a warkurai a galis lar atongi tak mang, ‘Leklek, Leklek, mila warwara na propet ana risam, pa mila kepsen a motla otleng ana risam, pa mila tol a galis a ututnala na kulkulan ana risam.’ 23 Ar keles la mang, ‘Bel a tasman mulo. Mulo na tena laulau, mulor han masik kusun iau.’
Naur a tena tol rumai
(Lk 6:47-49)
24 “La rop ning la longor anuka warwarala ne, pa la longor ono, la arlar ana tena tastasmai, ning i tol tar anuna rumai saot na hat. 25 A kiar i punga, pa lomom i hanot, pa wuwu i ragati pa i um a rumai ning, ika bel i taroh, anasa di atur tari saot na hat. 26 La rop ning la longor anuka warwarala ne, ika bel la muri, la arlar ana longlong, ning i tol tar anuna rumai saot na woio, pa bel i por rakrakai a kasanga. 27 A kiar i punga, pa a lomom i hanot, pa wuwu i ragati pa i um a rumai ning, pa i taroh, pa i tarege kakat.”
28 Ning e Iesu ka atong rop tar a warwarala ne, a kunum a tarai la kulkulan ana nuna asasaer, 29 anasa i asaer la arlar o esaning a warkurai kaning tana. Bel i asaer la arlar ana anunla na tena asaer tagun a warkurai la sira toli.