A Wakak a Warwara ane God Luk 3

E Jon a Tena Baptais i warawai

(Matiu 3:1-12; Mak 1:1-8; Jon 1:19-28)

1 Ka takai a bonot pa pisir dilima na rau ana matanitu ane Sisar Tiberius, e Pontius Pailat a tnan ningnigo tumo na papar Judia, pa e Herot a ningnigo ting na papar Galili, pa e tasnalik e Pilip a ningnigo ting na naur a papar Ituria pa e Trakonitis, pa e Lisanias a ningnigo ting na papar Abilene 2 pa e Anas pa e Kaiapas dia kibas a titol a ningnigo na tena artabar tetek e God. Ana rau ning, a warwara ane God i hanot tetek e Jon, a nat e Sekaria, ning i kes saot na hanua bel. 3 Pa i han uting na puknala rop milau a malum Jodan, i warawai sur a tarai lar lingir a nuknukinla pa dir baptais la, pa e God ir kepsen anunla na toltol laulaula. 4 Larning di ka tumus tari ting na buk anuna propet Aisaia mang,

“A elngena mainla i arkabah ting na hanua bel mang,

‘Mulor sang a ngas anuna Leklek,

mulor atostos anuna ngasla.

5 A lawala rop dir por la

pa pukaleklekla rop pa mangirla dir kel tostos la.

A ngasla rop ning la ngokngok dir atostos la,

pa puknala ning la tungtung, dir por tostos la.

6 Pa taraila rop lar oroi a titol ane God ning i alaun a tarai ono.’ ” Aisaia 40:3-5

7 A kunum a tarai la hanot tetek e Jon sur ir baptais la. Pa i atai la mang, “Ai, mulo na natnat a soi! Bel mulor tolsot sur mulor liu kumna kusun a balakut ane God ning ir hanot. 8 Ning mulo ka lingir momol a nuknukimulo, mulor tol a ututnala ning ir apuasa i mang mulo ka lingir a nuknukimulo. Pa gong mulo nuki mang e God bel ir warkurai mulo anasa mulo a mangis a tarai ane Abaram*. A atai mulo, e God i tolsot sur ir tol otnan a mangis a tarai ane Abaram tagun a hatatla ne. 9 Di ka suah tar a hek ting na kama rakaila, pa rakaila rop ning bel la suah al wakak a wanala, dir ting sen la, pa dir migen la uting na iah.”

10 A kunum a tarai la dekeni mang, “Asa milar toli?” 11 I keles la mang, “Esining anuna ir naur a kaen a mermer, ir saran tik tana tik ning bel anuna ta kaen a mermer, mang otleng larning ana utna na hangan.” 12 Pa dingla na tena los totokom la hanot sur ir baptais la. Pa la dekeni mange, “Tena asaer, asa milar toli?” 13 Pa i keles la mange, “Gong mulo kibas totokom i itna tana asaning a matanitu ka suah tari.” 14 Pa dingla na tena harum la dekeni mang, “Pa mila, asa milar toli?” Pa i keles la mang, “Gong mulo angongos pas ta mani kusun a tarai, pa gong mulo artitiu asasongo, mulor gas ka ana numulo na arlou.”

15 A tarai la harnanai sur e Karisito. Ning la longor e Jon, la nuki mang ngandek ai a Karisito. 16 Pa e Jon i atai la rop mang, “A baptais mulo ana malum, ika esaning a rakrakaina i itna tana rakrakaik ir hanot. Pa bel a tolsot sur ar pak sen a inau ana anuna su. A natarna kol tana. I ir baptais mulo ana Talngan Tabu pa iah. 17 I tong pas anuna saol ana naur a kuna sur ir migen a witla usaot sur a wuwu ir wus sen a palpalnala kusun a patnala. Ning ka tol rop tari, ir suah taum anuna wit ting na rumai a wit, pa ir tun sen a palpalnala ting na iah ning bel i sira mat.” 18 Ning e Jon i warawai tetek la ana Wakak a Warwara i arakrakai la ana galis a warwara sur lar lingir anunla na toltol.

19 Pa e Jon i warwara rakrakai tetek e Herot a ningnigo tagun a matanitu, anasa i taulai ulak e Herodias, a hane ane tasnalik, pa i tol otleng a laulau a ututnala. 20 Pa e Herot i tol ulak a toltol laulau ning i akas e Jon ting na karabus.

E Jon i baptais e Iesu

(Matiu 3:13-17; Mak 1:9-11)

21 Ning e Jon i baptais amon a taraila rop, i baptais otleng e Iesu. Pa ning i araring, a langit i sapang, 22 pa Talngan Tabu i han purum, i suah a palaona lar a tabun, pa i kes saot oe Iesu. Pa elngena mainla misaot na langit i atongi mang, “U a Natuklik, a katnan u, a gas kol hom.”

A wawas ana mangis a tarai ane Iesu

(Matiu 1:1-17)

23 E Iesu i turpas anuna titol ning ngandek i natol a bonot a rau a lalaun anunai. A tarai la nuki mang ai a nat e Josep.

E Josep a nat e Heli,

24 e Heli a nat e Matat,

e Matat a nat e Liwai,

e Liwai a nat e Melki,

e Melki a nat e Janai,

e Janai a nat e Josep,

25 e Josep a nat e Matatias,

e Matatias a nat e Amos,

e Amos a nat e Nahum,

e Nahum a nat e Esli,

e Esli a nat e Nagai,

26 e Nagai a nat e Mat,

e Mat a nat e Matatias,

e Matatias a nat e Semen,

e Semen a nat e Josek,

e Josek a nat e Joda,

27 e Joda a nat e Joanan,

e Joanan a nat e Resa,

e Resa a nat e Serubabel,

e Serubabel a nat e Salatiel,

e Salatiel a nat e Neri,

28 e Neri a nat e Melki,

e Melki a nat e Adi,

e Adi a nat e Kosam,

e Kosam a nat e Elmadam,

e Elmadam a nat e Er,

29 e Er a nat e Josua,

e Josua a nat e Elieser,

e Elieser a nat e Jorim,

e Jorim a nat e Matat,

e Matat a nat e Liwai,

30 e Liwai a nat e Simion,

e Simion a nat e Juda,

e Juda a nat e Josep,

e Josep a nat e Jonam,

e Jonam a nat e Eliakim,

31 e Eliakim a nat e Melea,

e Melea a nat e Mena,

e Mena a nat e Matata,

e Matata a nat e Natan,

e Natan a nat e Dewit,

32 e Dewit a nat e Jesi,

e Jesi a nat e Obet,

e Obet a nat e Boas,

e Boas a nat e Salmon,

e Salmon a nat e Nason,

33 e Nason a nat e Aminadap,

e Aminadap a nat e Atmin,

e Atmin a nat e Arni,

e Arni a nat e Hesron,

e Hesron a nat e Peres,

e Peres a nat e Juda,

34 e Juda a nat e Jekop,

e Jekop a nat e Aisak,

e Aisak a nat e Abaram,

e Abaram a nat e Tera,

e Tera a nat e Nahor,

35 e Nahor a nat e Seruk,

e Seruk a nat e Reu,

e Reu a nat e Pelek,

e Pelek a nat e Eber,

e Eber a nat e Sela,

36 e Sela a nat e Kainan,

e Kainan a nat e Arpaksat,

e Arpaksat a nat e Sem,

e Sem a nat e Noa,

e Noa a nat e Lamek,

37 e Lamek a nat e Metusela,

e Metusela a nat e Enok,

e Enok a nat e Jaret,

e Jaret a nat e Mahalalel,

e Mahalalel a nat e Kenan,

38 e Kenan a nat e Enos,

e Enos a nat e Set,

e Set a nat e Adam,

e Adam a nat e God.

3:3: 3:3 Aposel 13:24

3:7: 3:7 Matiu 12:34; 23:33

3:8: 3:8 Jon 8:33, 39

*3:8: 3:8 A tarai Israel la nuki mang e God bel ir warkurai la anasa la a mangis a tarai ane Abaram.

3:9: 3:9 Matiu 7:19

3:12: 3:12 Luk 7:29

3:16: 3:16 Aposel 13:25

3:19: 3:19 Matiu 14:3-4; Mak 6:17-18

3:22: 3:22 Jon 1:32

3:23: 3:23 Luk 4:22; Jon 6:42

3:32: 3:32 Rut 4:17-22

3:36: 3:36 Stat 11:10-26

3:38: 3:38 Stat 4:25-26