2
E Maria i agon e Iesu
(Matiu 1:18-25)
1 Ana rau ning, e Sisar Augustus i warkurai i sur dir tumus a risana tarai ting na hananuala rop ning la kes nahai a matanitu Rom. 2 Ine a ningnigo na pukakiar ning di tumus a risandi, ning e Kwirinius i a ningnigo tumo na papar Siria. 3 Pa taraila rop la han uting na anunla na hananuala momol sur dir tumus a risanla.
4 E Josep otleng i han miting na hanua Nasaret ana papar Galili to e Betlihem ana papar Judia. E Betlihem, a hanua ning di agon e Dewit ia, pa e Josep i han uto, anasa i miting na mangis a tarai ane Dewit. 5 I han sur dir tumus a risana, taum ana risana e Maria ning di ka aslang tari sur ir taulai i. Ning dia han e Maria ka tianan. 6 Pa ning dia kes to e Betlihem, a pukakiar i sot sur e Maria ir agon, 7 pa i agon pas a ningnigo na natnalik, a kaklik barsan. Pa i poroi i ana kaenla anuna kakakla, pa i aborbori ting na bok ning a inagoila la sira hangan onoi, anasa a rumai wasira ka bukus pas kusun ditol.
A warwara ana agon ane Iesu tetek a tena tai alarla ana sipsipla
8 Dingla na tena tai alar ana sipsipla, la tai alar anunla na liur a sipsip ana morom saot milau a hanua ning. 9 Pa angelo anuna Leklek i hanot tetek la, pa matatar anuna Leklek i talapor talilis la, pa la matmataut kol. 10 A angelo i atai la mange, “Gong mulo matmataut. Mulo oroi, a hanot tetek mulo ana wakak a warwara ning ir agasgas a taraila rop. 11 Onone, ting na hanua ane Dewit, di ka agon tar anumulo a Tena Alaun, ai a Karisito*2:11 A Karisito ai a barsan ning e God i aslangi pa i sune purumi sur ir alaun a tarai rop. A Karisito a warwara Grik, pa ana warwara Hibru di atongi mang a Mesaia., a Leklek. 12 Pa mulor tai sur ta asilang mang: A kaklik di poroi tari ana kaenla ana kakakla, pa di aborbor tari ting na bok a hangan ana inagoila.”
13 Bel i bongnani pa tnan kunum a angelo misaot na langit la hanot tetek a angelo ning, pa la atong leklek pas e God mange,
14 2:14 Luk 19:38“Dalar atong leklek a risana e God tisaot kol,
pa balmolmol te na rakrakan hanua rop tetek la
ning i gas onla.”
15 Ning a angelola la ka han kusun la usaot na langit, a tena tai alarla ana sipsipla, la warwara artalai la mang, “Ano otne dala kar han utumo e Betlihem, dalar oroi a utna ne ka hanot, ning a Leklek ka atai tar dala onoi.”
16 Pa la han kapit, pa la pastetek pas e Maria pa e Josep pa kaklik betbete ning i borbor tar ting na bok a hangan ana inagoila. 17 Ning la ka oroi tar a kaklik, la patuai talapor ana warwara ning a angelo ka atai tar la onoi ana kaklik ning. 18 Pa la rop ning la longor a warwara anuna tena tai alarla ana sipsipla, la kulkulan onoi. 19 2:19 Luk 2:51Ning e Maria i longor a warwara ne, i tong akesi ana balana pa i nuknuk kol onoi. 20 A tena tai alarla ana sipsipla la ulak, la aleklek pas e God pa la atong leklek ana utna ning la longori pa la ka oroi tari, arlar ana warwara anuna angelo tetek la.
Di pasar a risana e Iesu
21 2:21 Luk 1:31Ning ka siwal a pukakiar anuna kaklik, pa ka sot sur dir kot talilis a palaona, di pasar a risana e Iesu. A rising ning, a angelo ot ka atong tari nating, ning e Maria belot i tianan.
Di saran tar e Iesu tetek a Leklek
22-24 2:22-24 Wok Pris 12:1-8E Josep pa e Maria dia tolsot pas a pukakiarla na atotoh, arlar ana warkurai ane Moses. Pa ning ka rop, dia han usaot e Jerusalem sur diar artabar ana “naur a tabun o naur a barman a balus,” Wok Pris 12:8
arlar ana warwara na warkurai anuna Leklek. Pa dia los e Iesu otleng usaot e Jerusalem, sur diar saran tari tetek a Leklek, larning di ka tumus tari ana warkurai anuna Leklek mang, “A ningnigo na kakak barsanla rop pa ningnigo na barsan a inagoila, dir saran la tetek a Leklek.” Kisim Bek 13:2, 12
25 Ning a barsan i kes saot e Jerusalem a risana e Simion, a tena tostos pa tena hanrawai tetek e God. I harnanai sur e God ir alaun a tarai Israel, pa Talngan Tabu i kes onoi. 26 A Talngan Tabu ka atalapor tari teteki mang bel ir mat tuk ning ir oroi tar ot a Karisito anuna Leklek. 27 A Talngan Tabu i nigon kasi uting na woroh na rumai artabar. Ning disuana los kas a kaklik e Iesu sur diar tol a artabar larning di ka tumus tari ana warkurai, 28 e Simion i kibas pas e Iesu ana naur a kuna. Pa i atong leklek e God mange,
29 “Leklek, onone ur alangolango iau, anum a tena titol oros, sur ar han ana balmolmol,
arlar ana num a lele.
30 2:30 Aisaia 52:10; Luk 3:6; Taitus 2:11Anasa a matak ka oroi tar a Tena Alaun,
31 ning u ka sang tari na matana mangis a taraila rop.
32 2:32 Aisaia 42:6; 49:6; 52:10Ai a talapor ning ir atalapor anum a ngas tetek la ning bel a tarai Israel,
a talapor sur a matatar tetek anum a tarai Israel.”
33 E Tamana pa e tana dia kulkulan kol ana warwara ne e Simion i atongi oe Iesu. 34 2:34 Aisaia 8:14; Matiu 21:42; 1 Pita 2:8E Simion i angis ditol, pa i atai e Maria, e tana e Iesu, mang, “A kaklik ne, e God i aslang pasi sur a galis a tarai Israel lar hirua onoi pa galis otleng lar laun onoi, pa ai a akinalang ning a galis a tarai lar bilbilori. 35 Ning lar bilbilori dir atalapor a nuknuk miting na balana a galis a tarai. Pa u, a bal mamahat ning ur kilangi ir arlar ana liwan a harum ning ir so anum a lalaun.”
36-38 Pa ning a hane, a propet, a risana e Ana, ano otning i hanot tetek ditol. A hane ne a nat e Panuel, miting na mangis a tarai e Aser. Ka wan laulau, ka siwal a bonot pa pisir diat a rau anunai pa ka lao. Dia taulai pas ka mais a rau pa lamur anuna barsan i mat. A hane ne bel i han kusun a rumai artabar, i lotlotu ana kabakiarla pa moromla, i sira tamai pa i sira araring. Ning i hanot na pirinditol i atong wakak tetek e God, pa i warwara ana kaklik tetek la rop ning la harnanai sur e God ir alaun pas a tarai Jerusalem.
Ditol ulak utumo e Nasaret
39 2:39 Matiu 2:23Ning e Josep pa e Maria dia ka tolsot pas a ututnala rop arlar ana warkurai anuna Leklek, ditol ulak utumo e Galili sur anunla hanua Nasaret. 40 Pa kaklik i itna amon pa i rakrakai, pa i bukus ana tastasman, pa marmaris ane God i kes onoi.
E Iesu i kes tingui na woroh na rumai artabar
41 2:41 Kisim Bek 12:24-27; 23:14-17; Lo 16:1-8Ana raula rop, e tamana e Iesu pa e tana dia sira han usaot e Jerusalem ana lotu na Han Lakai. 42 Ning ka ning a bonot pa pisir naur a rau ane Iesu, ditol han usaot e Jerusalem sur a lotu na Han Lakai, larotning la sira toli. 43 Ning a lotu ka rop pa la ulak amon, e Iesu i kes suai saot e Jerusalem, ika e tamana pa e tana bel dia tasmani. 44 Dia nuki mang e Iesu i han taum ana taraila. Ning ka takai a pukakiar ana nunla tinan ulak, dia turpasi sur diar tai sur e Iesu ting na arpotor na mainditol, pa halalinditol.
45 Ning dia tai panai tar suri, dia ulak usaot e Jerusalem, sur diar tai suri tisaot. 46 Ning dia ka tai pas natol a pukakiar, dia pastetek pas e Iesu tingui na woroh na rumai artabar. I kes taum ana tena asaerla tagun a warkurai, i longor la, pa i deken la ana kabahla. 47 Pa la rop ning la longori, la kulkulan ana nuna tastasim, pa ana nuna arkeles tetek la. 48 Ning dia oroi pasi, dia kulkulan, pa e tana i atai i mange, “Natuklik, sur asaning u toli larne omiau? Mia ma e tamam mia ka seren panan tar u, pa mia matmataut kol hom.” 49 Pa i deken diau mange, “Asaning mu seren iau suri? Bel mu tasmani mang i tostos sur ar kes te na rumai ane Tata?” 50 Ika bel dia talapor ana nuna warwara.
51 2:51 Luk 2:19Lamur ditol ulak utumo e Nasaret, pa i sira longlongor kol tandiau, pa e tana i nuk akes a ututnala rop ning. 52 2:52 1 Samuel 2:26; Gutpela Sindaun 3:4A palaona e Iesu i itna amon pa nuna tastasman otleng i gomo, pa gasgas ane God pa anuna tarai otleng i gomo ono.
*2:11: 2:11 A Karisito ai a barsan ning e God i aslangi pa i sune purumi sur ir alaun a tarai rop. A Karisito a warwara Grik, pa ana warwara Hibru di atongi mang a Mesaia.
2:22-24: 2:22-24 Wok Pris 12:1-8
2:30: 2:30 Aisaia 52:10; Luk 3:6; Taitus 2:11
2:32: 2:32 Aisaia 42:6; 49:6; 52:10
2:34: 2:34 Aisaia 8:14; Matiu 21:42; 1 Pita 2:8
2:39: 2:39 Matiu 2:23
2:41: 2:41 Kisim Bek 12:24-27; 23:14-17; Lo 16:1-8
2:52: 2:52 1 Samuel 2:26; Gutpela Sindaun 3:4