A Wakak a Warwara o e Iesu Karisito
e Luk
i tumusi
A warwara talapor nigo
E Luk i tumus a buk ne. Bel sur i ning a halin na ning a bonot pa pisir naur a kakak a asaerla ane Iesu. Pa bel otleng i a te Juda, i a te Grik. Anuna hanua ngandek e Antiok ana papar Siria. E Luk bel i oroi tar a ututnala ning e Iesu i toli. I kibas tastasman ka tanla ning la atatai o e Iesu.
Nating anuna titol a dokta, pa i tasman wakak a warwara Grik.
A buk ne a ningnigo na buk ning e Luk i tumusi, pa i tumus otleng a buk Aposel. I tumus a buk ne sur a tarai Grik lar tasman wakak a warwara o e Iesu pa lar tortorot onoi. Lar tasmani mang e Iesu i hanot purum ute sur ir alaun a taraila rop. E Luk i tumtumus otleng o e Iesu mang i hanot a barsan momol, pa i asangan anuna marmaris tetek a kapan na taraila pa tetek dala rop taktakai.
I tumtumus otleng ana ututnala ne: A atong leklek tetek e God, a rakrakai ana Talngan Tabu, a nunung, pa a lalaun anuna kapan na taraila pa a gongon a tarai.
A tinan ana buk Luk:
A kamkama buk ne (1:1-4)
A agon ane Iesu pa e Jon a Tena Baptais (1:5-2:52)
A titol ane Jon a Tena Baptais (3:1-20)
Di baptais e Iesu pa lamur e Satan i lami (3:21-4:13)
E Iesu i titol to e Galili (4:14-9:50)
E Iesu i han usaot e Jerusalem (9:51-19:27)
A ararop na wik pa a minat ane Iesu (19:28-23:56)
A kamkamtur ulak ane Iesu kusun a minat, pa anuna tinan kas (24:1-53)
1
1 Tetek e Tiopilus,
A galis la tohoi pa la ka tolsot pas a tumtumus ana ututnala ning i hanot arpotor i mila. 2 La ning la ka oroi nigon tar a ututnala ne, pa la asaer a tarai ana Wakak a Warwara, la atai mila ana ututnala ne. 3 Pa iau otleng, ia ka tikin otnan pas a ututnala ne ana turturkamna, larning a nuki mang i wakak sur ar tumus tari tetek u, e Tiopilus a leklek. Ar tumus a ututnala ne arlar ana armuri ot anunla, 4 sur ur tasmani mang a ututnala di ka asaer tar u onoi, i momol.
A warwara talapor nigo mang dir agon e Jon a Tena Baptais
5 Ana rau ning e Herot i king ana papar Judia, ning a tena artabar tetek e God a risana e Sekaria, tagun a kunum na tena artabarla o e Abia. E Sekaria, anuna hane a risana e Elisabet, i otleng a mangis a tarai ane Aron. 6 Dia naur a tena tostos namatana e God, dia mur wakak a Warkuraila rop anuna Leklek. 7 Ika bel ta natundiau, anasa e Elisabet i pombo, pa dia ka lapun otleng.
8 Ning a pukakiar, ana pukakiarla na artabar anuna kunum ane Sekaria, e Sekaria i tol anuna titol na artabar namatana e God. 9 Arlar ana toltol a aslang*La tol ning a titol sur ir asangan la mang esining ir tol a titol na artabar. Dingla na tarai la nuki mang i arlar lar la ning la tumus a risanla taktakai ting na hatatla, pa esining a risana i hanot ir los a titol ning. ning a tena artabarla tetek e God la sira muri, la aslang e Sekaria sur i ot ir kas ting na rumai a artabar anuna Leklek, pa ir tun a utna ning i toboh wakak. 10 Ning i tun a utna ning i toboh wakak, a tarai a lotu ning la tur tumolapiu la nunung.
11 A angelo anuna Leklek i hanot tetek e Sekaria, pa i tur ana ris a sot ana logo na tun artabar, ning di tun a utna ning i toboh wakak onoi. 12 Ning e Sekaria i oroi i, a palaona i suren, pa i matmataut kol onoi. 13 Ika a angelo i atai i mange, “Sekaria, gong u matmataut, e God ka longor anuma nunung, pa anuma hane e Elisabet ir agon pas a natumlik a barsan, pa ur pasar a risana e Jon. 14 Ur gas kol onoi, pa galis otleng lar gas ana nuna agon, 15 anasa ir itna na matan a Leklek. Bel ir gang a wain, pa a gang laulaula, pa ning belot dir agoni, ka bukus ana Talngan Tabu. 16 Pa ir ben ulak a galis a tarai Israel tetek a Leklek a God anunla. 17 Ir rakrakai arlar ana propet Elias, pa a magirana otleng ir arlar onoi. Ir nigo tana Leklek, sur ir ben taum na tamtamana kakakla tetek na natnatunla sur lar aremoro ulak, pa ir ben a tarai a tabun longor sur a wakak a nuknuk anuna tostos a tarai, sur ir sang a tarai anuna Leklek sur anuna tinan ot.”
18 E Sekaria i deken a angelo mange, “Ar tasman mangmangasa i mang a utna ne ir hanot? Anasa mia ka lapun.” 19 Pa a angelo i kelesi mange, “Iau e Gebriel, a sira tur namatana e God. I ot i sune iau sur ar atai u, pa ar los a wakak a warwara ne tetek u. 20 Oroi, onone bel ur warwara lar pas tuk ana pukakiar ning a utna ne ir hanot. Bel ur warwara, anasa bel u tortorot ana nuka warwara, ning ir hanot tostos ana pukakiarna.”
21 A tarai la nanan e Sekaria, pa la nuknuk kol mang sur asa ning ka bongnani ting na rumai a artabar. 22 Ning i purum, bel i warwara lar pasi tetek la. Pa la tasmani mang e Sekaria ka oroi tar ta tatatai ana rumai a artabar, anasa i akinalang kama tetek la ana naur a kuna.
23 Ning ka rop anuna pukakiarla na titol, i ulak sur anuna hanua. 24 Pa lamur, e Elisabet anuna hane i tianan, pa dilima na kalang bel i han masik pas kusun a rumai. 25 Pa i atongi mang, “Onone bot a Leklek i nangan iau pa i kepsen a utna ning a meme onoi tan a tarai.”
Di atai e Maria mang ir agon e Iesu
26 Ning ka diono na kalang ane Elisabet, e God i sune a angelo Gebriel utumo e Galili ana ning a hanua a risana e Nasaret. 27 I han tetek a basbas a risana e Maria, ning di ka suah alar tari sur ane Josep, i ning tagun a mangis a tarai ane king Dewit. 28 A angelo i han tetek e Maria pa i atai i mange, “Ur gas, u angis kol! A Leklek i kes taum hom.” 29 Pa e Maria i nuknuk loklokron kol ana warwara ne, mang asa a kamkamna. 30 Pa a angelo i atai i mange, “Maria, gong u matmataut, e God i gas kol hom. 31 Longori! Ur tianan, ur agon pas a kaklik barsan, pa ur pasar a risana e Iesu. 32 Pa a risana ir rarang, pa dir atongi mang a Nat e God i Leklek Kol. Pa a Leklek e God, ir akesi ana keskes a king ane tubuna e Dewit, 33 pa ir king tikin ana mangis a tarai ane Jekop, pa anuna matanitu bel ir rarop.” 34 E Maria i deken a angelo mang, “Ir mangmangasa? Anasa bel a lasan taum ana ta barsan.” 35 A angelo i kelesi mang, “A Talngan Tabu ir kes hom, pa a rakrakai e God ir poroi alar u. Larning a Tena Totoh ning ur agon pasi, dir atongi mang a Nat e God. 36 Oroi, a maim e Elisabet ka lapun, pa di atongi mang a pombo, ika anone ka tianan, pa ka diono na kalang anunai. 37 Anasa bel ta utna i ngangaten tetek e God.” 38 Pa e Maria i atongi mang, “Iau a tena titol oros anuna Leklek, i wakak ka ning dir toli hok arlar ana numa warwara.” Lamur a angelo i han kusuni.
E Maria i han tetek e Elisabet
39 Lamur e Maria i sang pas, pa i han kas kapit sur a hanua ning i kes saot na mangir ana papar Judia. 40 I kas ana rumai ane Sekaria, pa i kabah na gasgas pas e Elisabet. 41 Ning e Elisabet i longor a arkabah na gasgas ane Maria teteki, a kaklik i pele ting na balana, pa e Elisabet i bukus ana Talngan Tabu. 42 Pa i warwara ana tnan elngena mang, “U angis tan a gurarala rop, pa a kaklik otleng ning ur agoni i angis. 43 Iau esi na ngas a hane ne ning e tana Leklek anuki ir han tetek iau? 44 Ning a longor anuma arkabah na gasgas tetek iau, a kaklik i gas, pa i pele te na balak. 45 U angis anasa u tortorot mang a warwara anuna Leklek tetek u ir hanot momol.”
E Maria i aleklek pas e God
46 E Maria i atongi mang,
“A inguk i aleklek pas a Leklek,
47 pa a balak i gas o e God, anuka Tena Alaun,
48 anasa i maris iau anuna tena titol oros, ning iau a hane oros ka.
Turpasi anone a mangis a taraila rop lar atongi hok mang a angis,
49 anasa Esi ning i Leklek Kol, ka tol tar a tatatnan utnala hok,
a risana i totoh.
50 Anuna marmaris i kes tetek la ning la hanrawai i,
i kes tetek a tarai tagun onone, pa tagun lamur.
51 I tol a rakrakai a titol ana kuna,
pa ana rakrakaina i minggen sarara la ning la rakan aleklek la ana nuknukinla.
52 I minggen purum a kingla kusun anunla keskes a leklek,
pa i aleklek pas la ning di nuki mang a tarai oros ka.
53 I tabar a kapan a tarai ana wakak a ututnala
pa i sune sen a leklekla ana wah a kunla.
54 I nangan anuna tena titolla, a tarai Israel,
pa i nuk pas anuna marmaris
55 tetek e Abaram pa anuna mangis a tarai tikin,
larning ka atong tari tetek anundala mangis a tarai tagun nating.”
56 Pa e Maria i kes napirna e Elisabet arlar ana natol a kalang, pa lamur i ulak sur anuna hanua.
Elisabet i agon pas e Jon a Tena Baptais
57 Ning a pukakiar ane Elisabet i sot sur ir agon onoi, i agon pas a kaklik barsan. 58 A halalna pa na mainala la longori mang a Leklek i maris kol e Elisabet, pa la gas taum onoi.
59 Ning ka siwal a pukakiar anuna kaklik, la sang sur dir kot talilisi, pa la mang sur lar pasar a risana e tamana e Sekaria onoi. 60 Ika e tana i atongi mange, “Gong! A risana ot e Jon.” 61 La atongi tana mang, “Bel ta maim i kibas a rising ning.” 62 Lamur la tol a asilang ana kunla tetek e tamana, sur lar dekeni mang esi na rising ning i mang sur dir pasar a kaklik ono. 63 Pa i akinalang sur ta utna ning ir tumtumus onoi, pa i tumusi mang, “A risana e Jon.” La rop la kulkulan. 64 Ono otne a pahana e Sekaria i sapang, pa a laigeremna i tapalas, pa i warwara kakat, i atong leklek pas e God. 65 Pa na halalindiau rop, la matmataut kol. A warwarala ana ututnala ne, i han sarara ana hananuala ning la kes saot na mangir ana papar Judia. 66 La rop ning la longori, la nuknuk kol onoi, pa la atongi mang, “A kaklik ne ir hanot esi na ngas a barsan?” Anasa la oroi mang a rakrakai ana Leklek i kes onoi.
E Sekaria i warwara na propet
67 E Sekaria e tamana e Jon, i bukus ana Talngan Tabu, pa i warwara na propet mange,
68 “Dalar aleklek pas a Leklek, a God anuna tarai Israel,
anasa ka hanot tetek anuna tarai,
pa ka alangolango pas la.
69 Ka saran tar a rakrakai na Tena Alaun tetek dala,
tagun a mangis a tarai ane Dewit, anuna tena titol,
70 larning ka atong tari nating ot ana pahana nuna totoh a propetla.
71 Ka saran tari sur ir alaun pas dala kusun anundala hiruala,
pa kusun a kunla rop ning la nget dala,
72 pa sur ir maris anundala mangis a tarai tagun nating
pa ir tolsot pas anuna totoh na kunubus.
73 I lele tar tetek a tubundala e Abaram,
74 mang ir alaun dala kusun a kuna nundala hiruala,
sur dalar titol teteki pa bel dalar matmataut.
75 Dalar titol teteki ana toltol ning i totoh pa i tostos namatana,
ana nundala pukakiarla na lalaun rop.
76 Pa u a natuklik, dir atong u, a propet ane God i Leklek Kol,
anasa ur han nigo tana Leklek,
sur ur tol nigon anuna ngas,
77 sur ur atalapor anuna tarai mang dir alaun pas la mangmangasa.
Dir kepsen tar anunla na toltol laulaula,
78 anasa ana tnan marmaris anuna God anundala.
Pa ana nuna marmaris a talapor misaot ir sasai ot tetek dala.
79 Ir sasai onla ning la kes ana mormorom,
pa ana mormorom na minat,
sur ir nigon dala ana ngas a bal molmol.”
80 Pa a kaklik i itna amon, pa i rakrakai ana inguna. Pa i kes ana hanua bel tuk ning i tur ot tetek a tarai Israel.
*1:9: La tol ning a titol sur ir asangan la mang esining ir tol a titol na artabar. Dingla na tarai la nuki mang i arlar lar la ning la tumus a risanla taktakai ting na hatatla, pa esining a risana i hanot ir los a titol ning.