A Wakak a Warwara oe Iesu Karisito
e Matiu
i tumusi
A warwara talapor nigo
E Matiu i tumus a buk ne, i ning na halin ning a bonot pa pisir naur a kakak a asaer ane Iesu, pa ning a risana otleng e Liwai. Lanigo i a tena los totokom, pa i titol taum ana matanitu Rom. Lamur e Iesu i kabah pasi, pa i hanot a kaklik a asaer ane Iesu (oroi Matiu 9:9-13).
E Matiu i tumus a buk ne tetek anuna tarai, a tarai Juda. A tarai Juda la harnanai sur a tinan ot ana barsan ning e God i aslang pasi, sur ir king anunla. Ana warwara Hibru di atongi a Mesaia, pa ana warwara Grik di atongi a Karisito.
E Matiu i mang sur ir atai la mang e Iesu ot a Karisito, a King ana tarai Juda. Sur i ma ning i warwara ana tinan ot ane Iesu ning i arlar ana king.
Pa i atong puasai otleng dingla na warwarala tagun a Ningnigo na Buk Tabu oe Karisito. A tinan ot ane Iesu i amomol a warwarala ne. E Matiu i tumtumus otleng ana asaer ane Iesu ana matanitu ane God.
A tinan ana buk Matiu:
A agon oe Iesu (1:1—2:23)
A titol ane Jon a Tena Baptais (3:1-12)
Di baptais e Iesu pa lamur e Satan i lari (3:13—4:11)
E Iesu i titol tumo e Galili (4:12—18:35)
E Iesu i han usaot e Jerusalem (19:1—20:34)
A ararop a wik pa minat e Iesu (21:1—27:66)
A kamkamtur ulak ane Iesu kusun a minat (28:1-20)
1
A risan a mangis a tarai ane Iesu Karisito
(Luk 3:23-38)
1 1:1 1 Stori 17:11; Stat 22:18Ine a risan a mangis a tarai tagun nating ning e Iesu Karisito i hanot tagun la. E Iesu, a nat e Dewit, e Dewit a nat e Abaram.
2 E Abaram e tamana e Aisak,
E Aisak e tamana e Jekop,
pa e Jekop e tamana e Juda pa na tastasna.
3 1:3 Stat 38:29-30; Rut 4:18-22E Juda i aitna e Peres dia ma e Serah, pa e Tamar e kabatnandiau.
E Peres e tamana e Hesron,
e Hesron e tamana e Ram,
4 pa e Ram e tamana e Aminadap,
e Aminadap e tamana e Nason,
pa e Nason e tamana e Salmon,
5 1:5 Rut 4:13-17e Salmon e tamana e Boas, pa e tana a risana e Rehap.
E Boas e tamana e Obet, pa e tana a risana e Rut.
E Obet e tamana e Jesi,
6 1:6 2 Samuel 12:24pa e Jesi e tamana e Dewit, i ning a king.
E Dewit e tamana e Solomon pa e tana a hane ning i taulai pas oe Uria.
7 E Solomon e tamana e Rehoboam
e Rehoboam e tamana e Abia
e Abia e tamana e Asa
8 e Asa e tamana e Jehosapat
e Jehosapat e tamana e Jehoram
pa e Jehoram e tamana e Usia
9 e Usia e tamana e Jotam
e Jotam e tamana e Ahas
pa e Ahas e tamana e Hesekia
10 e Hesekia e tamana e Manase
e Manase e tamana e Amon
pa e Amon e tamana e Josaia
11 1:11 2 King 24:14-15; 2 Stori 36:10; Jeremaia 27:20e Josaia i aitna pas e Jekonia taum ana tastasnala. Lamur tana, a tarai Babilon la dat pas a tarai Israel utumo e Babilon sur lar kes na karabus.
12 1:12 Esra 3:2Lamur tana tinan utumo e Babilon:
E Jekonia i aitna e Salatiel,
e Salatiel e tamana e Serubabel,
13 e Serubabel e tamana e Abiut,
e Abiut e tamana e Eliakim,
pa e Eliakim e tamana e Asor,
14 e Asor e tamana e Sadok,
e Sadok e tamana e Akim,
pa e Akim e tamana e Eliut,
15 e Eliut e tamana e Eliaser,
e Eliaser e tamana e Matan,
pa e Matan e tamana e Jekop,
16 e Jekop e tamana e Josep, i ning i taulai oe Maria. E Maria i agon e Iesu, ning di atongi a Karisito, i ning e God i sune seni.
17 I arlar ana ning a bonot pa pisir diat a tumtubunla turpasi oe Abaram tuk oe Dewit, pa turpasi oe Dewit tuk ana tinan na karabus tumo e Babilon ning a bonot pa pisir diat otleng la, pa turpasi ana tinan na karabus tumo e Babilon tuk ana Karisito ning a bonot pa pisir diat a tumtubunla otleng.
A ususrai oe Maria ning i agon e Iesu Karisito
(Luk 2:1-7)
18 1:18 Luk 1:27, 35Di agon pas e Iesu Karisito larne: E tana, e Maria, di ka aslang tari sur ir taulai e Josep, ika lanigo ana nundiau a tinaulai, e Maria ka tasmani mang i tianan tana Talngan Tabu. 19 E Josep ning di ka aslang tar e Maria suri, ai a tena tostos, pa bel i mang sur ir ame e Maria na matan a tarai. Pa i nuki mang ir kutus kumnan sen anundiau a lele sur a tinaulai.
20 Ning i nuknuk kol ot ana utna ne, a angelo ana Leklek i hanot teteki ana reresa pa i atongi mang, “Josep, a nat e Dewit, gong u urmatana nuknuk oe Maria, ur ben pasi ka sur anum a hane. Anasa a kaklik ning i tianan pasi, i hanot tagun a Talngan Tabu. 21 1:21 Luk 1:31; 2:21Ir agon pas a kaklik barsan pa ur pasar a risana e Iesu*1:21 A rising Iesu a kamkamna mang a Leklek i alaun a tarai., anasa ir alaun pas anuna tarai kusun anunla na toltol laulau.”
22 A ututnala rop ne i hanot sur dir tolsot pas a warwarala ana Leklek ning anuna propet ka apuasa tari mang, 23 “Oroi i, a basbas a hane ir tianan pa ir agon pas a kaklik barsan pa dir atongi e Emanuel,” Aisaia 7:14
a kamkamna mang, “E God i kes taum ondala.”
24 Ning e Josep i mata, i muri larotning a angelo ana Leklek i ka atai tari ono, pa i ben pas e Maria sur anuna hane. 25 1:25 Luk 2:21Ika bel dia borbor taum pas tuk ning e Maria i agon pas a kaklik barsan. Pa e Josep i pasar a risana e Iesu.