1 Lamur a oroi pas ning a rakrakai a angelo maleng i han purum amon misaot na langit. I mermer ana bakut, pa gogol i kes lao tar saot na pukulna. A patarna i arlar ana kamis, pa naur a hana i tatatai arlar ana naur a pos ning i irnga. 2 I tong pas a natar a buk ning di ka hin tari, kaning i sapang tar ting na kuna. I atur tar a sot a hana salatasi, pa kair a hana ting na piu. 3 Pa i kukuk ana tnan elngena arlar ana elngen a laion. Ning i agaia, a elngen mais a pungpugur la warwara. 4 10:4 Daniel 12:4, 9Ning mais a pungpugur la ka warwara rop, a mang suar tumtumus, ika a longor a elngen takai misaot na langit i atongi mang, “Gong u tumus akes a warwarala ning mais a pungpugur la ka atong tari, ur pidik alari ka.”

5 10:5 Lo 32:40; Daniel 12:7Pa angelo ning a oroi tari ning i tur tar salatasi pa ting na piu, i tuslan kas a sot a kuna usaot na langit. 6 Pa i lele tar o esaning i laun tikin, bel ir rarop, ning i akes a bakut pa ututnala rop ning la kaning ia, pa rakrakan hanua pa ututnala rop ning la kaning ia, pa tasi pa ututnala rop ning kaning ia, pa i atongi mang, “Bel ma e God ir harnanai ulak. 7 10:7 Amos 3:7Ana pukakiarla ning a ararop a angelo miting na mais a angelo ir mang suir wus anuna tawuru, dir tolsot pas a utna na pidik anun e God, arlar ono ning ka atong tari tana nuna tena titol orosla, a propetla.”

8 Pa elngen takai, ning ia ka longor tari misaot na langit, i atong ulaki tak larne, “Ur han pa ur kibas pas a buk, ning kaning i sapang tar ting na kuna angelo ning i tur tar salatasi pa ting na piu.”

9 10:9 Esekiel 2:8; 3:1-3Pa a han tetek a angelo pa a nunungi suir saran tar a natar a buk ning tak. Pa i atongi tak mang, “Kibasi, pa ur ieni. Ir amapak a balam, ika a paham ir namnamin arlar ana polo na tatos.” 10 Pa a kibas pas a natar a buk ning kusun a kuna angelo, pa a ieni. Pa pahak i namnamin arlar ana polo na tatos. Ika, ning a konomi, i amapak a balak. 11 Pa di atongi tak mang, “Ur warwara na propet ulak ana galis a tarai ting na hananuala, a galis a tarai miting na matanitula, a galis a tarai miting na urmatana ngas a warwarala pa galis a king.”