3
Sahou i tiri tasou
1 Buku none le iri lau ta gok nane anuhun sahou tiri lau an bwena tiri, aha badih ndratasou, aha ka-en bahandra udu aha iri, ma aha kanuhun sahou tiri. Tasah, udu aha iri rayah badeh, ba-en hamon ta sahou ta Kindrei bwe. Mwasin, iri baranyolom aha udu iri badeh, bamekes sahou ta aliu budon tiri bwe. Iri anyolom aha amekes kandriyen mwasin le. Idoh kameh mesekei iri atehei budon tiri i ta sahou ta Kindrei, ma bwidi iri tubuni ndrine iri, ma iri ame an hamon ta Krais. 2 Ma, iri kameh anyolom aha udu iri badeh, abudon ma alelek udu aha iri handru, ma aha amekes kandriyen ma budon mwasin. Ma, na kandriyen taha le iri anyolom, iri kameh atana iri sahou ta Kindrei, handru. Eme ma iri kameh tubuni ndrine iri, ma ame an hamon ta Krais. 3 Aha sanyosowaniy le bada aha badu manan, kandriyen buku aha tapwiu batu aha, hawe aha adeu iri nyasou ere bada aha, buku none lakou lomadan labai, ma hawe iri kolau sowa iri tinan labai. 4 Mwasin ta aha kanyosowani bolo oda aha na iri nyasou winiyan bandra-i bwe. Iri nyasou doh badeh, kandriyen ta ndrine aha udu mwasin, ma ade aha bare len tiri lakou solo-an asahan, bwe. Iri kandriyen doh badeh, mwasin labai ja ereu mada Kindrei. 5 Iri badih handru bwena badeh, iri atehei budon tiri i ta Kindrei. Eme ma iri anyasou iri, ma kone iri asahan mwasin, na kandriyen mwasin nane doh. Ma tekedek tiri badeh, udu mwasin bahandra udu iri, ma iri alelek udu iri handru. 6 Buku none Sara, iy anuhun sahou ta Abraham, ya iy aloh Abraham, “Ou Laban tek.” Ya na dah, aha nadun ale, buku none aha amekes kandriyen mwasin i buku le iy. Ma aha winiyan banoh ta udu aha bwe, buku none iri anya ka-um aha ta kandriyen mwasin taha.
7 Buku none aha lau tasou ale, aha kakohok budon mwasin, ya aha kamanyah kamwenen hawe udu aha iri. Aha kalelek iri badih ale, tasah bada iri badih badeh, boto-on handru bwe. Idoh le aha kamekes kandriyen mwasin ki tiri. Iri badih ale kameh akohok koha iri ma nyosowa Kindrei mwasin hamon hawe aha mwan. Eme ma, buku none aha an hamon ta sahou dah, ari lakou winiyan basokei salom taha bwe, buku none aha asolom i ta Kindrei.
Len mari taha kamekes kandriyen mwasin ki ta ndramak ari ja
8 Sahou tek anya kano kere dan ai. Arile, aha badeh, ndrokowa aha ma manyah taha kudu mwasin. Aha kaso-ok ndramak ari ja, buku none nadu tinem amwenen. Aha katikisi ndramak ari ja, ma aha karuwani iri kandriyen ta bar ndra-in. 9 Buku none iri lau amekes ndra-in ewek taha, aha samekes ndra-in sala hamon sala tiri. Ma buku none iri aluhe aha, aha saluhe sala hamon, arile aha kasolom ki ta Kindrei, ta iy kanyosowani iri. Tasah, Kindrei mene ndraluhi aha, ma iy ndratandrakan ta edeu nyosowan mwasin ewek la-u aha. 10 Taha ndratana taha, buk ndrabun asehek i buku doh,
“Are lau aso-ok kohan mwasin hamon, hawe manyah tan kudu mwasin, iy badeh, saluhe hawe iy sawasai, ndri-iy labai.
11 Iy kedeu konan ki ta kandriyen ndra-in, ma iy kere hamon ta kandriyen mwasin, hawe iy kabadok ta amekes manyah tiri lau rayah ja kudu mwasin, ma iy kabadok handru ta amekes kandriyen mwasin le.
12 Tasah, Laban anyolom ma atondrok iri lau kandriyen tiri mwasin, ma iy anuhun salom tiri. Arile, Laban bwalen ma iy ibolosen i tiri lau amekes kandriyen ndra-in, ma iy winiyan baseben iri bwe.” Wari 34:12-16
13 Buku none aha abo gok boto-on ta amekes kandriyen mwasin, are lau baramekes kandriyen ndra-in barawek taha kameh? 14 Arile, buku none aha akohok maha-an ma sisi-in ta kandriyen mwasin aha amekes, mwasin, aha kasekesek le kado.
“Aha sanoh ta ari ndramak, ma aha sabudon sandra-i ndri-iy labai.” Aisaya 8:12
15 Aha kabudon le Krais, ma aha kalelek iy, tasah iy badeh, Laban tataha handru. Ma len mari, aha kalokou aha ta asumon are lau, buku none iy ndremenya, saba kati kandriyen mwasin ereu taha, ma aha atondrok ta aliy. Aha kasumon kamunum, ma aha kalelek iri ale. 16 Arile, aha kasumon sahou tiri kamunum, idoh kandriyen mwasin. Ma budon taha kudu mwasin ale. Ya, buku none iri aluhe, ma adeu bwilima ewek taha, tasah aha amekes kandriyen mwasin ta nyara Krais, hamon kameh iri lau nane amekes ndra-in ewek taha, bwili iri kameh ama. 17 Ya, buku none Kindrei aso-ok ta taha kakohok maha-an ta kandriyen mwasin taha amekes, idoh lakou mwasin. Arile, buku none taha akohok maha-an ta kandriyen ndra-in taha amekes, idoh lakou ndra-in labai.
18 Aha abudon Krais ale. Kandriyen tan mwasin handru, arile iy akohok andra-i ale. Ma iy badeh, ndramak, san rasan le ta kandriyen ndra-in tataha. Iy bamekes ari kandriyen ndra-in bwe, arile iy ili i buku saluwe taha ta kandriyen ndra-in tataha. Eme ma, iy anya kakohok taha kala hawe Kindrei. Iri adai iy, odan buku none taha dah, arile iy amak eme awas ja na Malawin Mwasin. 19 Iy ndrasahan Malawin Mwasin, ma iy ili kon tiri su-u, ma iy atiye sahou i tiri su-u ereu bolo kou doh. Ma iy asehek i buku doh, “Jo ndrasakalawi lakou mari, iri mene anya kamekes kaliu keme tek.” 20 Iri su-u doh badeh, malawi iri lau ndra-in bwena mene iri banuhun sahou ta Kindrei bwe, kala Nowa mene amekes ndron tinan. Iri lau solo-an bala bolo ndron bwe, oro lau ma ndru la-uh le, ala bolo ndron nane doh. Oro bamak bwe, tasah gwa eme sebenei oro, bwese-ei ndron, ma ndron telebek. Arile, iri lau mari mene areu manan, amak an bolo wadah tinan. 21 Gwa doh badeh, i buku le gwa mene iri alomwa aha lau a bolon. Tasah, Kindrei ndrandrei aha ndrame hamon na gwa ta alomwa. Arile, gwa ta alomwa doh, ta sikine badam ndraka-an bwe, idoh ta leheya i tiri lau mari, buku none aha aso-ok Krais, ma aha anya ka-en hamon ta kandriyen tan mwasin. Ya, ta akohok aha ame hawe Kindrei handru badeh, iy ndramete-ei Jises ndrareu bolo lek ndrame loken. 22 Ya idah Krais ndrala loken ndrala bolo kandrah, iy ere loboho lim salin ta Kindrei. Ma Kindrei ndratehei nyaran ndra tinan, ma atehei boto-on i tan, ta iy atondrok iri angelo hawe iri lakou boto-on handru badu kandrah ma munyak. Iri lakou mari ja badeh, ereu bahandran ale.
None laba tinan asahan tiri lau ta Kindrei ma iri akohok sisi-in
(Kalan 4–5)