1 Krais mene ndrabwese-ei maha-an tinan labai, ta aseben taha, eme ma aha ale kalokou aha ta bwese maha-an buku asahan taha. Aha katawi budon taha ki buku le Krais. Aha sanoh ta bwese maha-an, ndri-iy, tasah ndramak ndrabwese-ei maha-an, iy ndraruwaniy, ma iy kameh bwalen amekes kandriyen ndra-in ja. 2 Eme ma, na idah, ma i bwena, kala aha areu kon munyak dah kahis le, badeh, aha katehei budon ma bada aha mari kili bahandra tondrok ta Kindrei. Ya, aha sa-en hamon ta budon taha badu kon munyak ja ai. 3 Jaha solo-an labai aha amekes kandriyen buku iri lau badu leheleh amekes: Aha amekes karei, ma a-en hamon ta budon ndra-in taha. Ma aha manyah luluwen lawe-en labai, amekes nyamon tinan, ma aha a-un gwa boto-on ma amekes aha abo lolo-ou. Ma aha amekes kandriyen ndra-in solo-an labai. Ma aha asolom i tiri lakou laleyah, buku none sukumada kei, ma malawi nyam. Iri lakou doh, aha an hamon ta aliy luluwen lawe-en labai, arile na dah, bwili aha ama handru ta aliy, tasah bwena aha amekes i buku none Kindrei taha handru. 4 Ya idah iri lau badu leheleh mani iri atur ta aha bamekes kandriyen ndra-in buku le iri ja bwe, ma iri asehek sahou ma amekes kandriyen ndra-in solo-an ewek taha. 5 Arile, hamon kameh iri ales areu mada sahou hawe Kindrei, ya iri kameh asehek nyala iri lakou mari mene iri amekes i tan. Iy ndralokou iy kabwe ta anuhun sahou nyala kandriyen tataha lau koha taha kahis le, hawe iri lau ndramak ale. 6 Ehe, hamon kameh Kindrei atehei lau mari ala ta mada sahou. Eme ma sahou nyala Kindrei ndrasahan ndranye iri lau ndramak ale. Handru, taha lau mari badu munyak kameh amak, tasah Kindrei mene ndratiye, are lau amekes kandriyen ndra-in, iy kameh imek. Eme ma oda taha lau mari badu munyak kameh imek. Arile, sahou mwasin ta Krais ndrasahan tiri lau mwan ma badih nane, ta malawi iri kameh udu mwasin ma udu le buku doh, buku Kindrei ale ta udu le buku doh.

7 Len ta kon munyak ta ano ndrame mirihik labai, eme ma aha kabudon kamwenen, ma mada aha kaleu, ya aha katondrok iri kandriyen taha kamwenen. Idoh kameh aha winiyan asolom amwenen. 8 Bwele-e lakou mari badu munyak, aha katehei kandriyen ta aso-ok ndramak ari ja ta Kindrei kereu bwena. Tasah, kandriyen ta aso-ok ndramak ari ja badeh, tubuluhiy ma sakalawi kandriyen ndra-in mari, ma mesekei aha mani kandriyen ndra-in tiri. 9 Ya, buku none iri lau ra-on ja ta Kindrei ame areu hawe aha, mwasin, aha katondrok iri kamwenen. Ndrine aha sandra-i ta amekes kandriyen mwasin i tiri. 10 Aha ari, ari, ndrakohok ndramas na Malawin Ndrabun ta Kindrei. Eme ma, aha kamekes gok na ndramas nane, ta aseben lau ari ja ta Kindrei. Tasah, aha badeh, ndrasahan lau ta atondrok iri ndramas ari ari ta Kindrei nane. 11 Buku none ari ndramak ndrakohok ndramas ta Kindrei ta tiye sahou i ta lau, iy badeh, kasehek sahou ki ta lau, bwilin sama ndri-iy, tasah iy badeh, asehek buku le boho Kindrei. Buku none ari ndramak ibo gok ta aseben ndramak ari ja, mwasin, iy kibo gok ma boto-on na boto-on ta Kindrei ndratehei ndra tan. Buku none aha amekes i buku doh, iri lau kameh anyolom iri kandriyen mwasin asahan, ma iri kameh adeu nyaran tinan i ta Kindrei ta lakou mari Krais ndramesekei. Ma iy kameh akohok nyaran tinan, ma iy kameh atondrok lakou mari ereu le buku doh. Handru.

12 Aha kawas tek, na idah aha akohok iri maha-an, ma iri lakou solo-an asahan taha, ta none taha ta budon taha. Mani aha satur, ndri-iy. Ma aha sasehek anya, “Aden! Idah saba lakou handru? Sebwe iri lau ra-on ja ta Kindrei bakohok iri maha-an buku none ahi dah bwe, nadeh?” 13 Arile, aha kasekesek, tasah aha bwese iri maha-an buku none le Krais mene bwese. Ya, buku none iy eme hamon, ma nyaran i tinan, ma lomadan asahan eme lewan, aha kameh sekesek labai. 14 Aha kasekesek buku none iri lau asehek sahou ma aluhe aha. Tasah, aha badeh, an hamon ta Krais. Ma moson ta aliy i buku doh: Malawin Ndrabun ta Kindrei badeh, nyaran tinan, ya iy boto-on labai, ma iy ereu la-u aha handru. 15 Buku none aha ari akohok maha-an ta nyara Kindrei, mwasin, arile maha-an doh sasahan ta ou adai ndramak deh, ou lau ta bahana deh, ou ta amekes kandriyen ndra-in ra-on ja deh, ou ta bolowa gok ta ndramak ari ja. 16 Arile, buku none ou akohok maha-an, tasah iri aloh ou Kristen, ou bwilim sama, ndri-iy, ou adeu le wurah ki ta Kindrei, tasah ou bwese-ei nyara Krais.

17 Ya, aha mari kasekesek ki ta Kindrei, buku none iri lau badu kon munyak amekes ndra-in, ma adeu sisi-in ewek taha. Tasah, len ta Kindrei ta anuhun sahou ndrame ai, ya buku none Kindrei anuhun sahou tiri lau tan mwasin bwena, Kindrei kameh amekes saba lakou handru ili tiri lau ale banuhun sahou mwasin ta Krais bwe? Iy kameh anuhun sahou tiri ano, iri kameh ala bolo jih. 18 Ya, buku none buk ndrabun ndratiye,

19 Mwasin, buku none Kindrei aso-ok lau ra-on ta akohok sisi-in, iri kameh abo sah handru? Iri kabo gok kareu le buku doh, ta amekes kandriyen mwasin, ma kadeu koha iri ki mine Kindrei. Tasah Kindrei badeh, mesekei taha, ma na len mari, iy atondrok taha i mwasin handru. Eme ma, iy kameh aseben taha ta bwese iri maha-an ma sisi-in, ma iy anya kakohok taha kala hamon hawen.