1 Na len dah, jo aso-ok aha katehei keme tek ta amekes sahou laleyah op. Aha winiyan atehei deh? 2 Tasah, jo abudon solo-an ta tekedek taha, i buku Kindrei abudon boto-on labai tiri lau mwan ma badih tan, kora-on iri katelei san mwasin. Jo aso-ok aha ka-en hamon handru ta Jises Krais le ari. Jo anya katehei aha kala mine Krais, buku tama badih bihin atik nadun anya kili bahandra mwan tan. Jo aso-ok

5 Aha kanuhun! Jo amwenen abudon, jo badeh, bare bahandra iri aposel taha nane, aha abudon iri are bwele-en labai, bwe! 6 Handru, bohok badeh, winiyan basehek sahou hawe kandriyen ta andrek bwe. Arile, kandriyen tek ta sahou mwasin badeh, udu bwele-e tanan toro mara-ei ja. Ta iri kandriyen mara-ei ma bolo len mara-ei ahi ndraleheya aha ta iri tanan dah. Eme ma aha ndratanan mwasin labai ta tanan tahi.

7 Udu bolo len mwena jo atiye sahou mwasin ta Kindrei ewek taha, jo bandremenya aha ta luk ta amekes gok dah bwe. Jo amwenen atehei jo ili andri mara-ei ta amekes gok ta atudun aha. Sebwe kandriyen, jo amekes doh, ndra-in nadeh? 8 Jo aso-ok aha katanan. Jo mene akohok luk, ma hawe iri lakou badeh, tiri lau mwan ma badih ta Kindrei rayah labai, ta aseben jo ta amekes gok udu bolo aha. Ta kandriyen i buku doh le bwidi jo ariu lokowa iri lau laleyah. 9 Eme ma, buku bwena mene jo udu hawe aha, jo tek ari lakou bwe, jo batehei maha-an bala ta ari mwan o badih taha bwe. Iri nadu tine taha, iri lau ta Kindrei badu Masadoniya ame asahan Korin, iri badeh, atondrok jo ta lakou mara-ei, buku tek ano mara-ei. Jo badeh, abudon boto-on labai, ta jo bwalek edeu ari maha-an ewek taha ja. Ma jo badeh, in hamon ta budon doh le kahis. 10 Sahou handru ta Krais badeh, udu bolo ndrinek. Eme ma, ta idoh le, jo tiye taha handru ta loboho Akaya mara-ei, ari mwan o badih winiyan baturuki san ta jo atudun nyarak, ta kandriyen jo ale amekes ta adeu sahou mwasin laleyah ili tiri lau mwan ma badih, bwe. 11 Sebwe, budon taha kede-eh ta ndremenya, tasah handru jo amekes i buku doh? Aha anya, jo baso-ok aha bwe, ma jo amekes i buku doh? Bwe handru en! Kindrei tanan, jo badeh, aso-ok aha labai.

12 Katin ta jo amekes, i buku doh: Lau rayah badeh, asilah madasan ta atudun nyara iri le, ma iri anya kasahan buku le ahi, ta mada iri mwan ma badih. Jo badeh, ibo gok ta aturuk san tiri doh. Eme ma, jo kameh ibo gok udu le buku don ai, ma jo kameh winiyan bandrek luk taha ja bwai. 13 Iri lau doh, iri aposel handru bwe. Boho iri irek ta wasai. Iri wendreya ta amekes gok nane, ma tobolowe kandriyen tiri ta andrek iri mwan ma badih. Ma iri aseken iri mwan ma badih kabudon iri badeh, aposel handru ta Krais. 14 Taha winiya atanan, tasah handru iri asahan i buku doh. Balik le amwenen tobolowe kandriyen tan, ma iy bwidi iri mwan ma badih abudon i buku doh, “Sebwe, iy badeh, angelo ta Kindrei ari nadeh?” 15 Eme ma, ari lakou handru bwe, buku iri lau tan ale tubuni kandriyen tiri, ma bwidi iri mwan ma badih tan asahan i buku lau mwasin ta Kindrei le ai. Hamon kameh, Kindrei aleben iri, ma iri kameh akohok maha-an in hamon ta gok nane iri amekes.

16 Jo ndrasehek mwena ndra-au. Ya, nadah jo anya kasehek ja: Iri lau sabudon anya jo lolo-ou ndramak. Arile, buku aha anya jo lolo-ou eh, ka-iy ai. Arile, aha kabwidi san tek, ta jo winiya atudun nyarak sese. 17 Jo ba-en hamon ta tanan ta Laban ta amekes sahou i buku dah, bwe. Jo asehek sahou ma atudun nyarak i buku ndramak lolo-ou amekes. 18 Lau solo-an badeh, atudun nyara iri ta kandriyen, nane iri mwan ma badih badu kon munyak a-en hamon ta aliy. Eme ma, jo ale anya ki-in hamon ta kandriyen badu kon munyak ta atudun nyarak le amwenen.

19 Eme ma jo kameh amekes. Tasah, tanan taha mwan ma badih badeh, tinan labai. Budon taha ale mwasin mara-ei, eme ma aha aso-ok labai ta anuhun ndramak lolo-ou asehek sahou ewek taha. 20 Iri sahou mara-ei doh handru! Buku rayah lau ame ma atondrok aha, o iri kame kandrei lokowa aha mara-ei kano ki-iu, o iri kandrek aha ka-en hamon ta sahou tiri, o iri kati-i aha, o kaluhani aha, ma kasehek sahou ta bobose aha, aha batikahei iri bwe. Aha anyolom iri le ai. 21 Aha nadu tine, jo tikisiy tinan labai! Na len mene ahi are hawe aha, bwilik ama labai ta amekes iri kandriyen solo-an labai, iri lau doh, amekes ewek taha. Mwasin! Saba lakou iri anya katudun nyara iri, jo kameh amekes i buku le aliy.

22 Iri anya iri Juwis? Jo ale jo Juwis! Iri anya iri lau badu Isra-el? Jo ale, jo badu Isra-el! Iri anya tubu iri Abraham? Jo ale i buku aliy! 23 Iri anya iri ta amekes gok ta Krais? (Nadah, jo anya kasehek sahou buku ari ndramak lolo-ou ai.) Jo badeh, udu bwele-e iri ja, ta gok ta Krais. Jo ibo gok boto-on labai, ma jo mwasin mara-ei ja tiri lau ta atiye sahou mwasin. Len tek badeh, solo-an labai ja tiri, ta len sabe jo udu bolo asiu lulik. Iri lau adi jo na malou sakabuk i bek, san solo-an labai, jo winiyan bandromwei bwe. San solo-an labai, jo mirihik kimek. 24 Ya, iri lau ta bwena tiri Juwis badeh, adai jo na malou sakabuk i bek san limeh, ma androm ili asahan san ma tonoh ndro ari (39).*Sahou udu bolo Dutoronomi kalan 25:1-3 tiye i buku doh, buku iri Isra-el anya kadeu maha-an i ta ndramak nane amekes kandriyen ndra-in, iri winiyan ubwi iy na malou sakabuk i bek. Ya, iri winiyan ubwi iy san ma hanoh (40) le. Arile, iri Isra-el anoh, kora-on iri bandromwei bamwenen bwe, eme ya iri ubwi ndramak winiya san ma tonoh ndro ari (39) le. 25 San ma tulusin iri lau tinan badu Rom badeh, adai jo na kandro kei. San rasan ja badeh, iri lau orowei jo na bek, arile jo bamak bwe. San ma tulusin ndron atasah udu ndras ma jo amai udu bolo ndras. Ari ben, ari len jo ateheh laleyah udu bolo ndras. 26 San solo-an jo edek ili eme na le kati. Len rayah badeh, jo apou gwa, ma wadah teheyani jo ma jo amai. Len rayah ja, jo ndruni iri lalou, ma mirihik iri kadi jo kimek. Len rayah, iri Juwis, ahi boho kon ari le, iri badeh, anya kadai jo kimek ale. Len rayah iri lau badu kon rakon ja anya kadai jo kimek ale. Eme ma, jo anya kimek kudu kon tinan, ma jo anya kimek kudu kon lau aliy bwe. Len rayah jo anya kimek kudu bolo ndras. Len rayah jo anya kimek kudu mine iri lau iri anya iri lau ta Kindrei amwenen. 27 Ma jo ale andra-i mara-ei ta gok solo-an labai. Len solo-an labai jo ibo gok na ben, ma jo bamadin bamwenen bwe. Jo imeson, ma balek amar ta gwa. Len solo-an jo mani nyamon, jo akohok nyala ma jo awin solo-an bwe! 28 Iri lakou doh le bwe. Lakou rayah udu aliy ale! Na bolo len mara-ei, jo abudon solo-an ta atondrok iri mwan ma badih ta Kindrei atalan are bolo kon laleyah. Ma idoh atehei maha-an laba tinan labai eme tek. 29 Sebwe, budon tiri mwan ma badih rayah badeh, babadok bwe le, eme ma, jo amwenen atona sisi-in doh. Sebwe, iri lakou rayah ndraruwi budon tiri nadeh, ma iri amekes kandriyen ndra-in doh, eme ma bwidi ndrinek andra-i labai tiri lakou doh.

30 Aha mara-ei kanuhun! Sebwe, jo ari madasan ja bwai, ta atudun nyarak amwenen. Eme ma, jo winiyan batudun nyarak ta iri lakou leheya, jo nyamuk, bwe. Jo anya katudun nyarak ta iri lakou leheya jo i buku ari ndramak laleyah. 31 Ma Kindrei badeh, tama Laban Jises, iy le ari tanan, jo bawendreya bwe. Taha katudun nyaran kudu bolo len mara-ei! 32 Bwena mene jo udu Damaskus. Ndramak ari ta bahandra kabin, nyaran Aretas atehei ndrokei udu mada kou tinan badu Damaskus. Iri anya kateu jo, ma kadeu jo kili bolo asiu lulik. 33 Arile, iri lau ta Kindrei rayah badeh, anyuhi jo ili bolo ndrom sahin rahak, ano oro bawei malou i ta lu-u ndrom nane doh, ma oro atehei jo i san ta mada munu kowah le eme andri ma eme manan. Eme ma jo ruwani iy ndramak ta kabin doh ma jo atobwak iu.